Read KITAB SUCI ZABUR INJIL ZABUR 71 Bible Online

ZABUR 71 - KITAB SUCI ZABUR INJIL bible

ZABUR 71

¹Léq Deside kaji berlindung, ya ALLAH, sampunang menengang kaji teperilaq.

²Bébasang kaji, séngaq Deside adil, pirengang dait selametang kaji.

³Deside gunung batu kaji, taoq kaji ndot, saq molah kaji boyaq. Séngaq Deside sampun mutusang jari nyelametang kaji, Deside taoq kaji berlindung dait bebao.

⁴Ya Allah kaji, luputang kaji léman dengan jahat, léman kuase dengan-dengan saq sewenang-wenang dait kejem.

⁵Séngaq Deside harepan kaji, ya Junjungan Saq Mulie, Ya Allah, kaji percaye léq Deside léman kaji masih bajang.

⁶Sengonéq kaji idup, kaji beharep léq Deside; Deside ngelindungin kaji léman kaji teanakang make kaji tetep memuji Deside.

⁷Idup kaji jari teladan dengan luwéq, séngaq Deside pelindung kaji saq kuat.

⁸Kaji tetep memuji Deside, sejeloan kaji nyampéang keagungan Deside.

⁹Sampunang Deside tetéh kaji léq waktu kaji toaq sampunang bilin kaji lamun kekuatan kaji sampun bis,

¹⁰séngaq musuh-musuh kaji ngeraosang kaji, dengan-dengan saq mélé nyematéq kaji bekomplot.

¹¹Basen ie pade, “Ie sampun tebilin siq Allah; silaq ite paléq dait ite bau ie, séngaq ndéq araq saq nyelametang ie.”

¹²Sampunang Deside jaoq léman kaji, ya Allah, Allah kaji, gelis tulung kaji.

¹³Menengang dengan saq nyerang kaji teperilaq dait temusnahang. Menengang dengan saq mélé nyelakeang kaji jari bingung dait tepenoqin siq kehinean.

¹⁴Laguq kaji tetep beharep léq Deside, dait sayan luwéq memuji Deside.

¹⁵Sejeloan gen kaji ceriteang perbuatan-perbuatan Deside saq adil, dait keselametan léman Deside saq nénten bau teitung.

¹⁶Kaji puji perbuatan Deside saq perkase, ya ALLAH Saq Maheagung, kaji cume mélé piaq kesohor keadilan Deside doang.

¹⁷Ya Allah, Deside ngajah kaji léman kaji bajang, jangke mangkin kaji nyeriteang karye Deside saq ajaip.

¹⁸Ya Allah, sampunang bilin kaji, jangke kaji toaq dait rambok, adéq kaji nyeriteang kuase dait keperkasean Deside tipaq selapuq keturunan saq mudian.

¹⁹Ya Allah, keadilan Deside atasne maraq langit; beléq gati perbuatan-perbuatan Deside; sai saq bau pade maraq Deside?

²⁰Deside ngicanin kaji luwéq penderitean saq berat, laguq Deside gen nulakang balung kaji dait nguresang kaji léman kuburan.

²¹Deside gen miaq kaji sayan tehormat, dait Deside hibur kaji malik.

²²Kaji gen memuji Deside kadu gambus, séngaq Deside setie, ya Allah kaji. Kaji mélé nyanyiang pujian tipaq Deside kadu kecapi, ya Allah Israel Saq Mahesuci.

²³Kaji besurak penoq sukecite, sambil nyanyiang Deside pujian. Jiwe dait awak kaji benyanyi siq sukecite, séngaq Deside sampun nyelametang kaji.

²⁴Sejeloan kaji gen nyeriteang keadilan Deside, séngaq dengan-dengan saq mélé nyelakeang kaji sampun tekalahang dait teperilaq.