Read KITAB SUCI ZABUR INJIL ZABUR 72 Bible Online

ZABUR 72 - KITAB SUCI ZABUR INJIL bible

ZABUR 72

¹Léman Sulaiman. Ya Allah, ajahang hukum Deside tipaq raje, icanin keadilan Deside tipaq bije raje.

²Semoge ie hakimin umat Deside menurut hukum, dait perlakuang dengan saq tetindes secare adil.

³Seandéne negeri tiang pade makmur dait sejahtere, dait araq keadilan umaq selapuq bangse.

⁴Semoge raje béle hak rakyat biase, nulung dengan-dengan miskin, dait binaseang dengan-dengan saq nindes ie pade.

⁵Semoge ie tetep tahen turun-temurun semasih araq jelo dait bulan.

⁶Semoge ie maraq ujan saq turun léq lendang pupaq, maraq ujan beléq saq peraiq lendang-lendang.

⁷Semoge keadilan telaksane sengonéq jamanne, dait kemakmuran belimpah sengonéq araq bulan.

⁸ Kerajaanne gen sayan beléq léman segare jangke dateng segare, mentang léman Timuq jangke dateng Bat.

⁹Penduduk padang gurun gen takluk léq ie dait musuh sujut léq bawaq cokorne.

¹⁰Raje-raje Tarsis dait pulao-pulao gen jauqang ie persembahan. Raje-raje Arab dait Etiopia dateng jauq upeti.

¹¹Selapuq raje gen sujut léq arepanne, selapuq bangse jari hambe-hambene.

¹²Séngaq ie ngelepasang dengan tetindes saq lemah, dait dengan miskin saq bekuih tipaq ie.

¹³Ie periak léq dengan miskin dait rakyat biase, dait nyelametang idup dengan saq miskin gati.

¹⁴Ie bébasang ie pade léman penindesan dait kekerasan, séngaq bagi ie idup ie pade beraji gati.

¹⁵Idup baginde raje! Semoge tipaq ie teaturang persembahan emas léman Arab. Semoge ie tedo'eang sebilang waktu dait tetep teberkahin.

¹⁶Semoge gandum belimpah léq selapuq negeri, dait bukit-bukitne penoq siq hasil gumi. Semoge tanaqne subur maraq Pegunungan Libanon, dait penduduk kotene sayan luwéq maraq pupaq léq lendang.

¹⁷Semoge peséngan raje teinget selaéq-laéqne, dait kesohoranne beromboq sengonéq araq jelo. Semoge bangse-bangse nunas adéq teberkahin maraq ie, dait selapuq dengan nyebut ie bahagie.

¹⁸Pade puji ALLAH, Tuhan Israel! Cume Ie saq ngelaksaneang hal-hal saq ajaip.

¹⁹Tepuji peséngan-Ne saq agung selaéq-laéqne; semoge seantéro gumi penoq siq kemuliean-Ne! Adéq telaksane maraq nike. Amin!

²⁰Maraq nike do'e-do'e Daud, bije Isai.