Read KITAB SUCI ZABUR INJIL ZABUR 73 Bible Online

ZABUR 73 - KITAB SUCI ZABUR INJIL bible

ZABUR 73

¹Zabur Asap. Allah tetu-tetu solah bagi ie pade saq tulus aténe, bagi dengan saq bersi aténe.

²Laguq tiang sampun bimbang kepercayean tiang aroh gen telang,

³séngaq tiang tampe léq dengan sombong, sewaktu tiang serioq kemujuran dengan jahat.

⁴Séngaq ie pade ndéq menderite sakit, awak ie pade kuat dait séhat.

⁵Ie pade ndéq nanggung susah, ndéq tetimpe siq kesengsarean maraq dengan lain.

⁶Keranaq nike ie pade sombong, dait tetep gawéq kekerasan.

⁷Léman até ie pade tumpah kejahatan; ie pade répot siq rencane-rencane jahat.

⁸Ie pade ngoloq dait nyumpaq-nyumpaq, dait siq sombongne ngancem gen nindes.

⁹Ie pade menghine Allah léq sorge, dait nyombongang diriq tipaq dengan-dengan léq gumi,

¹⁰sehingge dengan-dengan éndah bebalik tipaq ie pade, dait percaye léq raos ie pade.

¹¹Basen ie pade, “Allah nénten wikan, Saq Maheagung nénten ngerti.”

¹²Maraq nike keadaan dengan jahat; idupne tenang, dowéne terus sayan beromboq.

¹³Percume doang tiang jagaq atén tiang bersi; ndéq araq manpaatne tiang jaoqin dose.

¹⁴Séngaq sejeloan tiang tetimpe siq kesengsarean; sebilang kelémaq tiang tesiksaq.

¹⁵Seandéne tiang bebase maraq nike, tiang behianat léq angkatan bije-bijende.

¹⁶Laguq waktu tiang berusahe adéq jari ngerti, hal nike sengke gati bagi tiang.

¹⁷Ahirne tiang tame ojok Gedéng Allah, terus tiang jari ngerti ahir idup dengan jahat.

¹⁸Deside toloq ie pade léq langan saq lolat, dait Deside menengang ie pade geriq binase.

¹⁹Dalem sekejep mate ie pade ancur, dahsyat gati ahir idup ie pade.

²⁰Maraq impi saq telang léq waktu kelémaq; sewaktu Deside bangkit, ya Junjungan Saq Mulie, ie pade musnah.

²¹Sewaktu kaji beridap sepaq dait atén kaji maraq tetusuk,

²²kaji bodo dait nénten ngerti, kaji maraq binatang léq arepan Deside.

²³Laguq kaji tetep léq dékét Deside, Deside negel ime kanan kaji.

²⁴Deside bimbing kaji siq naséhat, dait éraq Deside terimaq kaji dalem kemuliean.

²⁵Sai saq kaji épéang léq sorge kecuali Deside? Kecuali Deside nénten araq saq kaji melétang léq gumi.

²⁶Timaq jiwe dait awak kaji jari lemah, Deside kekuatan kaji, ya Allah; cume Deside doang saq kaji épéang selaéq-laéqne.

²⁷Dengan saq bilin Deside gen celake, Deside binaseang dengan saq nénten setie léq Deside.

²⁸Laguq kaji, kaji seneng araq léq dékét Allah, ALLAH Saq Maheagung, kaji jariang taoq perlindungan kaji, adéq kaji bau nyeriteang selapuq karye-Ne.