Read KITAB SUCI ZABUR INJIL ZABUR 74 Bible Online

ZABUR 74 - KITAB SUCI ZABUR INJIL bible

ZABUR 74

¹Nyanyian pengajahan Asap. Ya Allah, napi jari selaéqne Deside bilin kaji pade? Kembéq Deside terus menggah tipaq umat Deside mésaq?

²Iling léq umat Deside saq Deside piléq léman laéq, bangse saq Deside bébasang adéq jari dowén Deside. Iling léq Bukit Sion, saq Deside jariang taoq Deside meneng.

³Margi léq taoq saq sampun remuk; selapuq saq araq léq Gedéng Deside sampun teancurang siq musuh.

⁴Musuh-musuh Deside bekuih-kuih léq Gedéng Deside, dait miaq panji-panji kemenangan léq derike.

⁵Ie pade maraq tukang rebaq kayuq saq kadu kandikne, jari ngerebaq leloloan léq gawah.

⁶Selapuq ukiran kayuq ie pade ancurang siq kandik dait palu.

⁷Ie pade sedut Gedéng Deside jangke musnah; dait najisang taoq Deside tesembah.

⁸Ie pade mélé naklukang kaji pade selapuq, dait nyedut jangke bis selapuq taoq ibadah léq negeri niki.

⁹Nabi-nabi dait tande-tande ajaip nénten penggitan malik, dait nénten araq sopoq dengan juaq nenaoq jangke piran tetep maraq niki.

¹⁰Jangke piran, ya Allah, musuh ngoloq Deside? Napi jangke selaéqne ie pade menghine peséngan Deside?

¹¹Kembéq Deside nénten nulung kaji pade malik? Kembéq Deside nénten kayun ngerunguq kaji pade malik?

¹²Léman semule Deside raje kaji, ya Allah, Deside saq nyelametang kaji pade.

¹³ Siq kekuatan saq beleq Deside belaq segare, dait belaqang otak nage-nage segare.

¹⁴ Deside ngeremukang otak-otak ulah nage dait jariang ie kakenan penghuni padang gurun.

¹⁵Deside élékang pengembulan aiq dait kokoq; kokoq saq beléq Deside jariang sat.

¹⁶Deside saq cipteang kenjelo dait kekelem, dait nentuang taoq jelo dait bulan.

¹⁷Deside netepang bates-bates gumi, miaq musim gero dait musim ujan.

¹⁸Iling berembé musuh menghine Deside, ya ALLAH, bangse saq nénten kenal kance Deside menghine peséngan Deside.

¹⁹Sampunang nyerahang umat Deside saq lemah ojok musuh saq kejem. Sampunang selaéq-laéqne ngelupaqang nasib umat Deside saq sengsare.

²⁰Iling léq perjanjian saq Deside piaq kance kaji pade, séngaq dengan gawéq kekerasan léq sebilang taoq saq peteng léq negeri niki.

²¹Sampunang menengang dengan tetindes dait teperilaq, semoge dengan sengsare dait miskin memuji Deside.

²²Silaq bangkit ya Allah, béle pelekare Deside! Séngaq sejeloan Deside tehine siq dengan-dengan saq nénten percaye léq Deside.

²³Sampunang lupaq surakan musuh-musuh Deside, lawan-lawan Deside saq jari sayan uyut!