Read KITAB SUCI ZABUR INJIL ZABUR 77 Bible Online

ZABUR 77 - KITAB SUCI ZABUR INJIL bible

ZABUR 77

¹Umaq pemimpin kor. Menurut: Yedutun. Zabur Asap.

²Siq suare saq keras tiang bekuih tipaq Allah, siq suare saq keras tiang bekuih, dait Ie mirengang tiang.

³Léq waktu kebucuq tiang bedo'e tipaq Junjungan tiang Saq Mulie; sekeleman tiang ndéq pendaq-pendaq angkat imen tiang tipaq Ie, laguq atén tiang tetep ndéq mélé tehibur.

⁴Lamun tiang inget Allah, tiang beaduh-aduh, lamun tiang mikir, atén tiang sayan lemes.

⁵ALLAH miaq kaji ndéq iniq tindoq léq waktu kekelem, kaji osah jangke ndéq iniq ngeraos.

⁶Kaji mikirang jelo-jelo saq laéq, tiang nginget-inget dait kaji pikirang taun-taun saq laéq gati.

⁷Léq waktu kekelem kaji mikir-mikir, dait beketuan-tuan léq dalem angen,

⁸“Napi jari selaéqne Junjungan Saq Mulie nolaq dait nénten suke malik?

⁹Napi Ie sampun engkah ngasihin tiang pade? Napi Ie nénten nepatin janji-Ne malik?

¹⁰Napi Allah sampun lupaq periakang tiang pade? Napi Ie menggah sehingge nénten bedowé belas kasihan malik?”

¹¹Beterus tiang ngeraos, “Niki saq nyakitang angen tiang, bahwe Saq Maheagung nénten bekuase malik.”

¹²Tiang mélé inget léq perbuatan-perbuatan ALLAH, inget léq keajaipan-keajaipan-Ne léq jaman laéq.

¹³Kaji mélé mikirang selapuq saq Deside laksaneang, dait mikirang karye-karye Deside saq hébat.

¹⁴Ya Allah, selapuq perbuatan Deside suci, sai saq beléqne maraq Allah kaji pade?

¹⁵Deside Allah saq miaq keajaipan, kuase Deside sampun Deside nyatayang léq antare bangse-bangse.

¹⁶Siq kekuatan Deside, Deside bébasang umat Deside, keturunan Yakub dait Yusup.

¹⁷Aiq jari leger, serioq Deside, ya Allah, malahan, dasar segare éndah ngijik.

¹⁸Awan nurunang ujan, guntur begerudug; tekér nyamber ojok selapuq andang.

¹⁹Guntur begerudug, kisap besinar ojok mbé-mbé, gumi inggur dait ngijik.

²⁰Deside bemargi léq umbak, babar segare, laguq nénten penggitan onos cokor Deside.

²¹Maraq pengarat Deside déndén umat Deside, siq perantarean Musa dait Harun.