Read KITAB SUCI ZABUR INJIL ZABUR 78 Bible Online

ZABUR 78 - KITAB SUCI ZABUR INJIL bible

ZABUR 78

¹Nyanyian pengajahan Asap. Dengahang pengajahan tiang, hai bangse tiang, perhatiang ucapan-ucapan tiang.

² Tiang mélé ngucapang sesenggak dait perumpamean, dait jelasang badéq-badéqan jaman laéq,

³hal-hal saq tiang pade dengah dait tiang pade terimaq, saq teceriteang siq leluhur tiang pade.

⁴Tiang pade ndéq mélé ngerahasieang léq anak-anak tiang pade; tiang pade mélé nyeriteang léq keturunan saq gen dateng mengenai kuase ALLAH dait karye-karye-Ne saq beléq, dait perbuatan-perbuatan-Ne saq ajaip.

⁵Tipaq Yakub Ie ngicanin peringetan, dait tipaq Israel icanin-Ne préntah. Ie préntahang leluhurte ngajahang hal nike léq bije-bije ie pade,

⁶adéq keturunan saq mudian kenal kance Ie, dait nerusang ojok anak-anak ie pade.

⁷Siq care nike ie pade éndah, gen beharep léq Allah, dait ndéq ngelupaqang perbuatan-Ne, laguq tetep taat léq préntah-Ne,

⁸adéq ie pade ndéq maraq leluhur ie pade saq girang ngelawan dait durhake; dengan-dengan saq ndéq tetep imanne, dait ndéq setie léq Allah.

⁹Suku Epraim saq kadu senjate panaq dait busur, pelaiqang diriqne léq waktu betempur.

¹⁰Ie pade ngelanggar perjanjian Allah kance ie pade, dait ndéq mélé taat léq préntah-Ne.

¹¹Ie pade lupaq léq perbuatan-perbuatan-Ne, dait hal-hal ajaip saq Ie nyatayang tipaq ie pade.

¹² Léq arepan leluhur ie pade, Allah miaq keajaipan léq negeri Mesir, léq tanaq Zoan.

¹³ Ie belaq segare, terus liwatang ie pade; aiq anjengang-Ne jari maraq tembok.

¹⁴ Ie nuntun ie pade siq awan léq kenjelo dait siq menahne api léq kekelem.

¹⁵ Ie belaq gunung batu léq padang gurun, dait ngicanin ie pade nginem jangke belimpah-limpah.

¹⁶Ie miaq bukit batu nyugulang aiq, beterus ngélék aiq maraq kokoq.

¹⁷Laguq ie pade tetep bedose léq Allah, léq gurun ie pade ngelawan Saq Maheagung.

¹⁸ Ie pade sediah cobe Allah, siq care nuntut keloran saq ie pade melétang.

¹⁹Ie pade ngelawan Allah siq ucapan, “Napi Allah sanggup ngicanin ite ngelor léq padang gurun?

²⁰Mule Ie ngempuk gunung batu saq keras, sehingge aiq ngélék deres gati. Laguq napi Ie bau nyedieang ruti dait ngicanin daging tipaq umat-Ne?”

²¹Mirengang hal nike, ALLAH menggah dait nyerang umat-Ne kadu api; kemenggahan-Ne tipaq ie pade jari sayan beléq,

²²séngaq ie pade ndéq percaye léq Allah, léq kuase-Ne saq bau nyelametang ie pade.

²³Timaq maraq nike Ie mréntahang langit jari lekaq lawang-lawangne.

²⁴ Ie nurunang gandum léman sorge, manna jari keloran ie pade.

²⁵Ie ngicanin ie pade keloran saq belimpah; ie pade kelorang ruti malaékat.

²⁶Ie éndah miaq angin Timuq ngalih ojok taoq saq lain léq langit; siq kuase-Ne angin Lauq ngalih ojok taoq saq lain.

²⁷Ie nurunang kedit-kedit tipaq umat-Ne, luwéqne maraq gerés ndéqne bau terékéng.

²⁸Ie geriqang kedit-kedit nike léq perkémahan léq sekelining taoq ie pade ndot.

²⁹Beterus ie pade bekelor jangke besuh, séngaq Allah sampun ngicanin napi saq ie pade melétang.

³⁰Laguq napsu ie pade ndéqman éndah tepuasang; jari sewaktu ie pade masih bekelor,

³¹Allah menggah dait ngelawan ie pade; Ie matéq dengan-dengan Israel saq bajang dait saq perkase.

³²Timaq maraq nike umat-Ne tetep bedose, keajaipan-keajaipan-Ne nénten miaq ie pade percaye.

³³Make Allah nutuqang idup ie pade maraq embok, taun-taun ie pade bis léq dalem ketakutan.

³⁴Sewaktu Allah nyematéq pire dengan léq antare ie pade, saq lain nyesel dait tulak ojok Ie.

³⁵Ie pade inget bahwe Allah pelindung ie pade, dait Saq Maheagung penyelamet ie pade.

³⁶Laguq ie pade beduste léq Ie, ucapan-ucapan ie pade duste selapuqne.

³⁷ Ie pade ndéq setie léq Ie dait ndéq betegelan léq perjanjian-Ne.

³⁸Laguq Allah ngasihin dait ngampunin umat-Ne, dait nénten binaseang ie pade. Kereng gati Allah nahen kemenggahan-Ne, dait nénten ngelampiasang murke-Ne.

³⁹Ie iling bahwe ie pade cume manusie saq ndéq kekel, maraq angin saq liwat dait ndéq tulak.

⁴⁰Sampun pire kali ie pade ngelawan Ie, dait nyakitin até-Ne sewaktu léq padang gurun.

⁴¹Sampun kereng gati ie pade cobe Allah, nyusahang Saq Suci, Allah Israel.

⁴²Ie pade ndéq inget léq kekuasean-Ne, léq jelo Ie bébasang ie pade léman musuh,

⁴³sewaktu Ie miaq keajaipan-keajaipan léq Mesir, dait muqjizat-muqjizat léq gumi Zoan.

⁴⁴ Ie robah kokoq-kokoq ie pade jari daraq, sehingge ie pade ndéq bau nginem aiqne.

⁴⁵ Ie nyiksaq ie pade siq kelikit saq luwéq, dait menengang gumi ie pade temusnahang siq lépang.

⁴⁶ Ie datengang ulet dait balang, saq nyembihang pataqan dait hasil lendang.

⁴⁷ Ie sédaq lolo anggur ie pade siq ujan batu, dait lolo-lolo are ie pade siq awun-awun saq tegéng.

⁴⁸Ie menengang ujan és nimpe sesatoan ie pade, dait kisap nyamber héwan-héwan ie pade.

⁴⁹Ie ngelampiasang kemenggahan-Ne saq ngelaur maraq api siq care ngutus pasukan malaékat maut saq miaq ie pade putus ase.

⁵⁰Ie nénten nahen kemenggahan-Ne atao sayang léq idup ie pade, laguq binaseang ie pade siq wabah penyakit.

⁵¹ Ie nyematéq anak-anak mame saq sengake léq sebilang keluarge dengan Mesir.

⁵² Beterus Ie mimpin umat-Ne maraq kumpulan dombe, dait déndén ie pade liwatin padang gurun.

⁵³ Léq dalem bimbingan-Ne ie pade aman dait ndéq takut, laguq musuh ie pade ketelep léq dalem segare.

⁵⁴ Terus Ie gadingang umat-Ne ojok tanaq-Ne saq suci, ojok pegunungan saq Ie rebut mésaq.

⁵⁵ Léq julu umat-Ne Ie tundung penduduk saq araq léq derike terus bagi-bagiang-Ne negeri nike ojok selapuq suku bangse Israel, umat-Ne, sehingge ie pade bau ndot léq kémah-kémah musuh.

⁵⁶ Laguq ie pade ngelawan dait nguji Allah Saq Maheagung, ie pade ndéq taat léq préntah-préntah-Ne.

⁵⁷Ie pade behianat maraq leluhur ie pade, dait ndéq bau tesaduq maraq busur saq béngkok.

⁵⁸Ie pade nantang Allah siq care miaq taoq penyembahan berhale, dait miaq Ie tampe siq tetato-tetato ie pade.

⁵⁹Cingakin hal nike, Allah menggah gati, dait ie pade tetolaq kataq-kataq.

⁶⁰ Ie bilin kémah-Ne léq Silo, taoq-Ne meneng léq antare manusie.

⁶¹ Ie menengang Peti Perjanjian-Ne tetahen siq musuh; lambang kemuliean-Ne terebut siq musuh.

⁶²Ie menggah léq umat-Ne, dowé pusake-Ne, dait menengang ie pade tematéq kadu kléwang.

⁶³Terune-terune ie pade tekaken siq api; ndéq araq saq merariq kance dedare-dedare ie pade.

⁶⁴Imam-imam ie pade tematéq kadu kléwang, bebalu-bebalu ie pade ndéq iniq nangis.

⁶⁵Make Junjungan Saq Mulie bangkit maraq dengan saq baruq ngase léman tindoq, maraq dengan kuat sesampun nginem anggur.

⁶⁶Ie ngempuk musuh-Ne jangke mundur, dait ngalahang ie pade selaéq-laéqne.

⁶⁷Laguq Ie nolaq keturunan Yusup dait nénten miléq suku Epraim.

⁶⁸Saq Ie piléq suku Yehuda, dait Bukit Sion saq Ie kasihin.

⁶⁹Ie penganjeng Gedéng-Ne saq suci atasne maraq langit, maraq gumi kukuh, selaéq-laéqne.

⁷⁰ Ie miléq Daud hambe-Ne, dait bait ie léman kumpulan ternak,

⁷¹léman taoq Ie meliharaq inen dombe, jari ngarat Israel, umat-Ne.

⁷²Daud meliharaq ie pade secare tulus ihlas, dait bimbing ie pade secare bagus.