Read KITAB SUCI ZABUR INJIL ZABUR 79 Bible Online

ZABUR 79 - KITAB SUCI ZABUR INJIL bible

ZABUR 79

¹ Zabur Asap. Ya Allah, bangse saq nénten kenal kance Deside sampun nguasein tanaq pusake Deside. Ie pade najisang Gedéng Deside saq suci, Yerusalem tejariang remuk.

²Mayit hambe-hambe Deside ie pade bilin jari kakenan kedit-kedit. Jenazah dengan-dengan saq Deside kasihin ie pade alurang jari kakenan binatang gamang.

³Léq sekelining kote Yerusalem daraq ie pade tumpah maraq aiq; nénten araq saq nguburang ie pade.

⁴Kaji pade jari oloqan bangse-bangse tetangge, ie pade ngeréréqang dait ngoloq kaji pade.

⁵Ya ALLAH, napi seterusne Deside menggah, dait rase tampe Deside ngelaur maraq api?

⁶Tumpahang kemenggahan Deside ojok bangse-bangse saq nénten kenal kance Deside, dait ojok kerajaan-kerajaan saq nénten bebakti léq Deside.

⁷Séngaq ie pade sampun binaseang umat Deside, dait ngancurang balé ie pade.

⁸Sampunang hukum kaji pade lantaran dose leluhur kaji pade. Gelis periak léq kaji pade, séngaq kaji pade putus ase.

⁹Tulung kaji pade ya Allah, penyelamet kaji pade, ampunin dose-dose kaji pade dait bébasang kaji pade demi kemuliean peséngan Deside mésaq.

¹⁰Sampunang menengang bangse lain beketuan mengenai kaji pade, “Léq mbé Allah ie pade?” Menengang kaji pade serioq pembalesan tipaq bangse-bangse saq nyematéq hambe-hambe Deside.

¹¹Pirengang suare dengan-dengan tahenan saq ngeluh; semoge dengan-dengan saq tetentuang gen ninggal tealurang idup lantaran kuase Deside.

¹²Ya Junjungan kaji Saq Mulie, bales bangse-bangse nike pituq kali lipet lantaran selapuq penghinean ie pade tipaq Deside.

¹³Make kaji pade umat Deside, dombe saq Deside arat, gen besyukur léq Deside selaéq-laéqne, dait memuji Deside turun-temurun.