Read KITAB SUCI ZABUR INJIL ZABUR 80 Bible Online

ZABUR 80 - KITAB SUCI ZABUR INJIL bible

ZABUR 80

¹Umaq pemimpin kor. Menurut lagu: Kembang bakung. Zabur kesaksian Asap.

² Ya Pengarat Israel, pirengang niki, Deside saq mimpin keturunan Yusup maraq kumpulan dombe. Deside saq betahte léq atas kerub, silaq rauh siq cahaye saq menah tandur,

³léq julun Epraim, Benyamin dait Manasye. Nyatayang kekuasean Deside léq kaji pade, dait silaq rauh nyelametang kaji pade.

⁴Ya Allah, tulakang keadaan kaji pade; menahin kaji pade siq cahaye penjarupan Deside, make kaji pade gen selamet.

⁵Ya ALLAH, Tuhan Saq Mahekuase, jangke piran Deside menggah, timaq umat Deside bedo'e?

⁶Deside icanin kaji pade tangisan jari keloran, aiq mate belimpah jari ineman.

⁷Deside menengang bangse-bangse tetangge pegejuhang masalah tanaq kaji pade, dait kaji pade teoloq-oloq siq musuh-musuh kaji pade.

⁸Ya Allah Saq Mahekuase, tulakang keadaan kaji pade; menahin kaji pade siq cahaye penjarupan Deside, adéq kaji pade selamet.

⁹Umat Deside maraq lolo anggur saq Deside alih léman Mesir. Bangse-bangse lain Deside tundung, beterus Deside talet lolo nike léq negeri ie pade.

¹⁰Deside nyedieang ie tanaq; make ie berakah dalem-dalem dait mentang ojok selapuq negeri.

¹¹Ie piaq bao bukit-bukit, dait siq pémpang-pémpangne ngilipang lolo-lolo aras raksase.

¹²Béwéne bélo jangke dateng segare, pucuk-pucukne jangke dateng Kokoq Eprat.

¹³Ya Allah, kembéq Deside geriqang pagerne, sehingge sebilang dengan saq liwat iniq bau buaqne?

¹⁴Bawi gawah ngerongge jangke séde, dait binatang léq tanaq lendang ngaken ie.

¹⁵Ya Allah Saq Mahekuase, silaq rauh malik, cingakin léman sorge dait perhatiang umat Deside.

¹⁶Selametang umat saq maraq lolo anggur saq sampun Deside talet mésaq, dait suli lolo anggur saq Deside jariang kuat.

¹⁷Musuh sampun ngerebaq dait sedut ie; menengang ie pade tebinaseang siq kemenggahan Deside.

¹⁸Lindungin dengan saq sampun Deside piléq, anak manusie saq Deside jariang kuat bagi Deside.

¹⁹Make kaji pade nénten gen nyimpang malik léman Deside; jagaq idup kaji pade, make kaji pade gen memuji Deside.

²⁰Ya ALLAH, Tuhan Saq Mahekuase, silaq tulak tipaq kaji pade, menahin kaji pade siq cahaye penjarupan Deside, adéq kaji pade selamet.