Read KITAB SUCI ZABUR INJIL ZABUR 85 Bible Online

ZABUR 85 - KITAB SUCI ZABUR INJIL bible

ZABUR 85

¹Umaq pemimpin kor. Zabur kaum Korah.

²Deside suke léq tanaq Deside, ya ALLAH, keadaan Israel sampun Deside tulakang malik.

³Deside sampun ngampunin dose-dose umat Deside; Deside maapang selapuq kesalaqanne.

⁴Deside nénten menggah malik léq ie pade; Deside sampun endukang murke Deside saq begelaur.

⁵Tulakang keadaan kaji pade, ya Allah penyelamet kaji pade, sampunang murke malik léq kaji pade.

⁶Napi seterusne Deside menggah léq kaji pade, dait tetep menggah turun-temurun?

⁷Teguqang kaji pade malik adéq umat Deside cemoh lantaran pertulungan Deside.

⁸Nyatayang kasih Deside tipaq kaji pade, ya ALLAH, icanin kaji pade keselametan léman Deside.

⁹Tiang mélé dengah manik ALLAH , Ie nike Tuhan; Ie janjiqang kedaméan léq ite, umat-Ne, asal ite ndéq gawéq dose malik.

¹⁰Tetu, Ie siep nyelametang dengan saq takut léq Ie, Allah saq agung gen meneng léq negerinte.

¹¹Kasih dait kesetiean gen bedait, keadilan dait damé gen saling kapong.

¹²Kesetiean manusie gen tiwoq léman gumi, dait keadilan Allah gen nidok léman langit.

¹³ALLAH ngicanin saq solah, make tanaqte gen nyugulang hasilne.

¹⁴Keadilan gen senjuluq ALLAH, dait nyiepang Ie langan.