Read KITAB SUCI ZABUR INJIL ZABUR 86 Bible Online

ZABUR 86 - KITAB SUCI ZABUR INJIL bible

ZABUR 86

¹Do'e Daud. Pirengang do'e kaji, ya ALLAH, dait jawab kaji, séngaq kaji miskin dait lemah.

²Jagaq idup kaji, séngaq Deside ngasihin kaji, selametang hambe Deside saq percaye léq Deside.

³Deside Allah kaji, periakang kaji ya Junjungan kaji Saq Mulie, séngaq sejeloan kaji bedo'e tipaq Deside.

⁴Ya Junjungan kaji Saq Mulie, senengang até hambe Deside, séngaq tipaq Deside kaji tujuang atén kaji.

⁵Ya Junjungan Saq Mulie, Deside solah, dait seneng ngampunin, dengan saq bedo'e tipaq Deside tetep Deside kasihin siq kasih saq belimpah.

⁶Perhatiang do'e kaji, ya ALLAH, pirengang kuihan kaji nunas tulung.

⁷Léq waktu kebucuq kaji bedo'e tipaq Deside, séngaq Deside jawab kaji.

⁸Ya Junjungan Saq Mulie, nénten araq déwe saq maraq Deside, nénten araq saq ngelaksaneang napi saq Deside laksaneang.

⁹ Selapuq bangse saq Deside cipteang gen dateng, ya Junjungan Saq Mulie, jari nyembah Deside dait memuji keagungan Deside.

¹⁰Séngaq Deside perkase dait miaq keajaipan-keajaipan, cume Deside Allah.

¹¹Ajahang pekayunan Deside léq kaji, ya ALLAH, adéq kaji setie turut hal nike; jariang kaji takut léq peséngan Deside siq sepenoq até.

¹²Kaji besyukur tipaq Deside siq sepenoq atén kaji, ya Allah Junjungan kaji Saq Mulie; kaji mélé mulieang peséngan Deside selaéq-laéqne.

¹³Séngaq Deside tetep ngasihin kaji siq kasih saq beléq; Deside sampun ngelepasang nyawen kaji léman loang kubur.

¹⁴Ya Allah, dengan sombong bangkit nyerang kaji, sekumpulan dengan kejem mélé nyematéq kaji; ie pade nénten peduli léq Deside.

¹⁵Laguq Deside, ya Allah Junjungan kaji Saq Mulie, pengasih dait penyayang, sabar, penoq kasih dait setie.

¹⁶Perhatiang dait periakang kaji, teguqang dait selametang kaji, séngaq maraq inaq kaji, kaji éndah bebakti léq Deside.

¹⁷Icanin kaji tande kesolahan Deside, ya ALLAH, adéq dengan saq meriq léq kaji jari ilaq, lamun ie pade serioq Deside nulung dait hibur atén kaji.