Read KITAB SUCI ZABUR INJIL ZABUR 88 Bible Online

ZABUR 88 - KITAB SUCI ZABUR INJIL bible

ZABUR 88

¹Nyanyian. Zabur kaum Korah. Umaq pemimpin kor. Menurut lagu: Mahalat Leanot. Nyanyian pengajahan Heman, dengan Ezrahi.

²Ya ALLAH , Tuhan saq nyelametang kaji, léq waktu kenjelo kaji bekuih tipaq Deside, léq waktu kekelem kaji parek tipaq Deside.

³Semoge do'e kaji rauh léq arepan Deside, pirengang kuihan kaji.

⁴Kaji tetimpe luwéq kesusahan; dait idup kaji sampun rapet dunie dengan maté.

⁵Kaji maraq dengan saq gen turun ojok loang kubur, maraq dengan saq bis balung.

⁶Kaji tebilin léq tengaq-tengaq dengan ninggal, maraq dengan saq tematéq, tetoloq léq dalem kubur, maraq dengan saq tetu-tetu Deside lupaqang, dengan saq nénten Deside tulung malik.

⁷Deside saut kaji ojok loang saq dalem, ojok loang kubur saq dalem dait peteng.

⁸Kemenggahan Deside berat gati ngendet kaji, kaji remuk tetindes siq murke Deside.

⁹Deside jaoqang léman kaji kenalan-kenalan kaji, dait Deside piaq kaji jari najis bagi ie pade. Kaji tekurung dait nénten iniq sugul,

¹⁰maten kaji jari rundam lantaran sengsare. Sebilang jelo kaji bekuih tipaq Deside, ya ALLAH, dait ngangkat ime jari bedo'e.

¹¹Napi Deside miaq keajaipan umaq dengan ninggal? Napi ie pade bangkit dait memuji Deside?

¹²Napi kasih Deside teberiteang léq dalem kubur, dait kesetiean Deside léq taoq kebinasean?

¹³Napi araq saq nenaoq keajaipan Deside léq dalem peteng, atao keadilan Deside léq negeri taoq dengan telupaqang?

¹⁴Laguq kaji nunas pertulungan Deside, ya ALLAH, sebilang kelémaq kaji bedo'e tipaq Deside.

¹⁵Ya ALLAH, kembéq Deside nolaq kaji? Kembéq Deside bebalik léman kaji?

¹⁶Léman kodéq kaji sengsare dait teincer siq maut, kaji kelelahan nanggung hukuman Deside.

¹⁷Kemenggahan Deside saq begelaur ngancurang kaji; serangan Deside saq hébat binaseang kaji.

¹⁸Sejeloan kemenggahan Deside maraq belabur ngiterin kaji, ngepung kaji léman selapuq andang.

¹⁹Sahabat-sahabat karib kaji Deside jaoqang léman kaji, cume peteng doang saq araq bareng kaji.