Read KITAB SUCI ZABUR INJIL ZABUR 89 Bible Online

ZABUR 89 - KITAB SUCI ZABUR INJIL bible

ZABUR 89

¹ Nyanyian pengajahan Etan, dengan Ezrahi.

²Ya ALLAH, belas kasihan Deside, gen kaji nyanyiang selaéqne, kesetiean Deside gen kaji beriteang turun-temurun.

³Séngaq kaji nenaoq kasih Deside kekel abadi, kesetiean Deside kukuh maraq langit.

⁴Deside bemanik, “Tiang sampun miaq perjanjian kance dengan-dengan saq Tiang piléq; Tiang sampun besumpah tipaq Daud, hambe Tiang:

⁵ ‘Tahte side Tiang pertahenang selaéq-laéqne, turun-temurun anak bainde gen bekuase.’ ”

⁶Keranaq nike langit besyukur lantaran keajaipan-keajaipan Deside, ya ALLAH, malahan lantaran kesetiean Deside, léq antare jemaah dengan-dengan suci.

⁷Léq langit, sai saq maraq Deside, ya ALLAH, nénten araq mahluk sorge saq pade kance Deside.

⁸Deside tehormatin léq antare dengan-dengan suci, tetakutin lebih léman selapuq saq araq léq sekelining Deside.

⁹Ya ALLAH, Tuhan Saq Mahekuase, sai saq kuat maraq Deside? Deside setie léq dalem selapuq-lapuqne ya ALLAH.

¹⁰Deside nguasein segare saq kenyeke beléq umbakne, dait engkahang umbakne saq beléq.

¹¹Rahab, nage segare, Deside remukang dait Deside matéq, siq gading Deside saq kuat Deside kalahang musuh-musuh Deside.

¹²Langit dait gumi nike dowén Deside, dunie dait selapuq isine Deside saq cipteang.

¹³Deside saq jariang Lauq dait Daye, Gunung Tabor dait Hermon besurak-surak lantaran peséngan Deside.

¹⁴Beléq gati kuase Deside, dait hébat gati kekuatan Deside!

¹⁵Keadilan dait hukum nike dasar kerajaan Deside, kasih dait kesetiean nyate léq dalem selapuq perbuatan Deside.

¹⁶Bahagie dengan saq nyembah Deside siq nyanyian, ya ALLAH, saq idup léq dalem cahaye Deside.

¹⁷Sejeloan ie pade besukecite dait tetep kuat, Lantaran kesolahan Deside.

¹⁸Deside ngicanin kaji pade kemenangan saq luar biase, lantaran kesolahan Deside nike kaji pade menang.

¹⁹Séngaq perlindungan kaji pade dateng léman ALLAH; dait raje kaji pade dowén saq Mahesuci Allah Israel.

²⁰Léq jaman laéq, léq dalem sopoq penyerioqan, Deside bemanik tipaq hambe Deside saq setie, “Sampun Tiang toloq sopoq mahkote léq atas ulu sopoq pahlawan, sampun Tiang jariang raje sopoq dengan saq Tiang piléq léman bangse nike.

²¹ Tiang sampun ndait hambe Tiang, Daud, dait Tiang ngesahang ie siq minyak upacare.

²²Kekuatan Tiang gen tetep ngelindungin ie, kuase Tiang gen neguqang ie.

²³Ie ndéq gen tekalahang siq musuh, dait ndéq gen tetindes siq dengan jahat.

²⁴Selapuq musuhne gen Tiang binaseang, Tiang matéq sai juaq saq meriq léq ie.

²⁵Tiang gen tetep ngasihin ie dait setie léq ie, dait miaq ie sayan bekuase.

²⁶Kerajaanne gen Tiang galuhang, léman Segare Tengaq jangke dateng Kokoq Eprat.

²⁷Ie gen bebase léq Tiang, ‘Deside Bapa kaji, Allah kaji, pelindung dait penyelamet kaji.’

²⁸ Gen Tiang jariang ie bije Tiang saq sengake, saq paling agung léq antare selapuq raje.

²⁹Ie gen tetep Tiang kasihin jangke selaéq-laéqne, perjanjian Tiang kance ie tetep teguq.

³⁰Tahtene Tiang pertahenang sengonéq langit araq léq atas gumi, turun-temurun anak baine gen bekuase.

³¹Laguq lamun keturunanne ngelanggar préntah Tiang, dait ndéq idup menurut hukum Tiang,

³²lamun ie pade ngelanggar keputusan Tiang dait ndéq ngelaksaneang aturan Tiang,

³³ie pade Tiang hukum siq gegade lantaran pelanggaranne, dait Tiang timpe siq bahle lantaran dose-dosene.

³⁴Laguq Tiang gen tetep ngasihin Daud, dait ndéq gen tilas kesetiean Tiang.

³⁵Perjanjian Tiang kance ie ndéq gen Tiang batalang, janji Tiang nike ndéq sopoq juaq gen Tiang robah.

³⁶Sekali Tiang besumpah demi aran Tiang saq suci; Tiang ndéq gen beduste léq Daud.

³⁷Tahtene gen tetep araq sengonéq araq jelo, turun-temurun anak baine gen bekuase.

³⁸Kerajaanne tetep araq maraq bulan, saksi setie léq atas awan.”

³⁹Laguq mangkin Deside menggah léq raje, Deside tetéh dait nolaq dengan saq Deside piléq.

⁴⁰Deside batalang perjanjian Deside kance hambe Deside, mahkotene Deside saut ojok dalem reraok.

⁴¹Deside runtuhang témbok-témbok kotene, bénténg-bénténgne Deside remukang.

⁴²Selapuq dengan saq liwat ngerampas dowéne, ie jari oloqan tetanggene.

⁴³Deside ngicanin kemenangan léq musuh-musuhne, dait miaq selapuq musuhne cemoh.

⁴⁴Malahan senjatene Deside jariang nénten araq manpaatne, Deside nénten nulung ie léq dalem perang.

⁴⁵Deside engkahang kesohoran kuasene, tahtene Deside tetéh ojok tanaq.

⁴⁶Deside kontéqang mase bajangne, dait Deside kudung ie siq ilaq.

⁴⁷Jangke piran Deside nyeboq, ya ALLAH? Jangke piran kemenggahan Deside ngelaur maraq api?

⁴⁸Kaji inget berembé singketne idup kaji niki, Deside cipteang manusie jari mahluk saq nénten kekel.

⁴⁹Sai saq bau idup terus dait nénten ninggal? Sai saq bau luput léman kuburan?

⁵⁰Ya Junjungan Saq Mulie, léq mbé tande kasih Deside saq semule, saq Deside janjiqang tipaq Daud demi kesetiean Deside?

⁵¹Ilingang ya Junjungan Saq Mulie, berembé hambe Deside niki tewade, kaji nanggung penghinean luwéq bangse.

⁵²Musuh-musuh Deside menghine raje saq Deside piléq, ya ALLAH, ngoloq ie ojok mbé doang ie lumbar.

⁵³Pade puji ALLAH selaéq-laéqne. Adéq telaksane maraq nike! Amin!