Read KITAB SUCI ZABUR INJIL ZABUR 9 Bible Online

ZABUR 9 - KITAB SUCI ZABUR INJIL bible

ZABUR 9

¹Umaq pemimpin kor. Menurut lagu Mut-Laben. Zabur Daud.

²Siq sepenoq angen kaji mélé besyukur léq Deside, ALLAH, dait beriteang karye Deside saq ajaip.

³Kaji mélé begembire dait besukecite lantaran Deside dait memuji peséngan Deside, TUHAN Saq Maheagung.

⁴Léq arepan Deside musuh kaji bebalik dait pelai; ie pade kedampes geriq dait maté.

⁵Séngaq Deside mréntah sebagé hakim saq adil; Deside sampun béle pelekare kaji.

⁶Deside sampun ngukum bangse-bangse dait binaseang dengan-dengan jahat; ie pade telupaqang selaéq-laéqne.

⁷Musuh kaji pade sampun bis tepunahang, kote-kote ie pade Deside remukang; nénten araq saq nginget ie malik.

⁸ALLAH mréntah selaéq-laéqne; Ie miaq tahte-Ne jari hakimin dunie.

⁹Ie mréntah bangse-bangse secare adil dait hakimin ie pade secare jujur.

¹⁰ALLAH nike taoqne berlindung dengan saq tetindes, taoq perlindungan waktu kebucuq.

¹¹Dengan saq kenal kance Deside beharep léq Deside, ya ALLAH, dengan saq nyembah Deside nénten Deside bilin.

¹²Pade puji ALLAH saq mréntah léq Sion! Ceriteang karye-Ne tipaq bangse-bangse!

¹³Séngaq Ie iling léq dengan saq menderite dait nénten ngelupaqang kuihan ie pade; dengan saq gawéq kekerasan Ie hukum.

¹⁴Cingakin, musuh nyengsareang kaji; periakang kaji, ya ALLAH, selametang kaji léman maut,

¹⁵adéq kaji memuji Deside léq julun penduduk Yerusalem. Kaji gen besurak gembire séngaq Deside nyelametang kaji.

¹⁶Bangse-bangse saq nénten kenal kance Deside geriq ojok dalem longkak saq ie pade keduk mésaq; ie pade tejeret léq dalem jaring saq ie pade pasang mésaq.

¹⁷ALLAH sampun nyatayang diriq-Ne séngaq keputusan-Ne saq adil. Dengan jahat tejeret siq pegawéanne mésaq.

¹⁸Maut nike jari penutuq dengan-dengan jahat, bangse-bangse saq nénten merhatiang Allah.

¹⁹Ndéq selaéq-laéqne dengan miskin telupaqang; ndéq selaéq-laéqne dengan sengsare ndéq bedowé harepan.

²⁰Silaq bangkit ya ALLAH, hakimin bangse-bangse, sampunang menengang manusie nyombongang diriqne.

²¹Menengang ie pade jari takut, ya ALLAH, dait sadar bahwe ie pade cume manusie.