Read KITAB SUCI ZABUR INJIL ZABUR 90 Bible Online

ZABUR 90 - KITAB SUCI ZABUR INJIL bible

ZABUR 90

¹Do'e Musa, hambe Allah. Ya Junjungan Saq Mulie, Deside taoq kaji pade berlindung turun-temurun.

²Sendéqman gunung-gunung tecipteang, sendéqman gumi dait dunie Deside jariang, Deside Allah saq kekel, léman selaéq-laéqne jangke selaéq-laéqne.

³Deside manikang manusie tulak ojok asalne, jari kerepuk maraq semule.

⁴ Bagi Deside siyu taun maraq sejelo, pade maraq jelo saq rubin, lamun sampun liwat; maraq sopoq giliran jage léq kekelem.

⁵Deside éléhang kaji pade; kaji pade maraq ngimpi, maraq pupaq saq besuli;

⁶léq waktu kelémaq ie tiwoq dait bekembang, laguq jari layu léq kebian.

⁷Kaji pade tinjot siq kemenggahan Deside, dait bis binase siq murke Deside.

⁸Deside toloq kesalaqan kaji pade léq arepan Deside, dose kaji pade saq teseboq Deside cingakin.

⁹Idup kaji pade kontéq lantaran kemenggahan Deside, idup kaji pade gen tutuq maraq sekali berembok doang.

¹⁰Umur kaji pade cume pituq pulu taun, lamun kaji pade kuat, baluq pulu taun. Dait saq jari kebanggeanne penderitean dait kesulitan; sesampun idup saq singket, kaji pade nénten araq malik.

¹¹Sai saq kenal kance kekuatan murke Deside, atao sadar léq akibat kemenggahan Deside?

¹²Piaq kaji pade sadar bahwe idup niki singket adéq kaji pade jari dengan saq bijaksane.

¹³Ya ALLAH, jangke piran Deside menggah? Silaq tulak dait periakang hambe-hambe Deside.

¹⁴Limpahang kasih Deside léq kaji pade sebilang kelémaq, adéq kaji pade cemoh dait benyanyi seumur idup kaji pade.

¹⁵Icanin kaji pade kebahagiean saq seimbang kance penderitean saq kaji pade tanggung léq dalem taun-taun sengsare.

¹⁶Nyatayang karye Deside léq kaji pade, hambe-hambe Deside, dait kuase Deside saq mulie tipaq keturunan kaji pade.

¹⁷Semoge kemurahan ALLAH, Tuhan kaji pade, ngicanin kaji pade berkah, adéq selapuq pegawéan kaji pade berhasil.