Read KITAB SUCI ZABUR INJIL ZABUR 92 Bible Online

ZABUR 92 - KITAB SUCI ZABUR INJIL bible

ZABUR 92

¹Nyanyian jelo Sabat.

²Tetu-tetu solah besyukur léq Deside, ya ALLAH, dait memuji Deside, Allah Saq Maheagung;

³nyeriteang kasih Deside léq waktu kelémaq, dait kesetiean Deside léq waktu kekelem,

⁴sambil puniq gitar sepulu tali, teiringin gambus dait kecapi.

⁵Séngaq perbuatan Deside nyenengang atén kaji, siq gembirene kaji benyanyi lantaran karye Deside.

⁶Beléq gati perbuatan-perbuatan Deside, ya ALLAH, dalem gati pikiran-pikiran Deside!

⁷Dengan bodo ndéq gen iniq ngerti, dengan bongoh ndéq gen iniq paham hal nike.

⁸Bau doang dengan durhake tiwoq subur maraq pupaq, dait dengan jahat sayan sugih dait makmur; laguq ie pade gen bis tebinaseang,

⁹séngaq Deside, ALLAH, bekuase selaéq-laéqne.

¹⁰Kaji pade nenaoq musuh Deside gen temusnahang, ya ALLAH, selapuq dengan jahat gen tekelin sopoq kance saq lain.

¹¹Deside miaq kaji kuat maraq banténg gamang, dait ngicanin kaji berkah kebahagiean.

¹²Kaji serioq kekalahan musuh-musuh kaji, dengan-dengan saq sampun bangkit ngelawan kaji, rencane-rencane jahat ie pade sampun kaji dengah.

¹³Dengan jujur besuli maraq lolo korme, dait tiwoq subur maraq lolo cemare léq Libanon.

¹⁴Ie pade maraq lolo saq tetalet léq Gedéng ALLAH, dait besuli léq leléah Gedéng Tuhante,

¹⁵timaq ie sampun toaq, masih bebuaq, tetep ijo dait seger.

¹⁶Nike buktine bahwe ALLAH adil; Ie pembéle tiang, nénten araq hal saq jahat léq diriq-Ne.