Read KITAB SUCI ZABUR INJIL ZABUR 94 Bible Online

ZABUR 94 - KITAB SUCI ZABUR INJIL bible

ZABUR 94

¹Ya ALLAH, Deside Allah saq ngicanin pembalesan, nyatayang pembalesan Deside, ya ALLAH.

²Silaq bangkit, ya Hakim seantéro gumi, hukum dengan saq sombong setimpal perbuatan ie pade.

³Ya ALLAH, jangke piran dengan jahat besukecite? Jangke piran, ya ALLAH?

⁴Ie pade ngucapang ucapan-ucapan saq kasar, dait nyombongang kejahatan ie pade.

⁵Ie pade nindes umat Deside, ya ALLAH, dait ngeremukang dengan-dengan saq Deside piléq.

⁶Ie pade nyematéq bebalu dait anak iwoq dait dengan pendateng saq ndot léq negeri niki.

⁷Basen ie pade, “ALLAH nénten cingakin, Allah Yakub nénten merhatiang ie.”

⁸Hai bangse tiang, ndaq bodo maraq nike, pade berajah siq akalde!

⁹Allah saq miaq kentok, napi Ie nénten mirengang? Ie saq miaq penenteng, napi Ie nénten cingakin?

¹⁰Ie saq ngajah bangse-bangse, napi Ie nénten ngukum? Ie saq jari guru selapuq dengan, napi Ie nénten bedowé penenaoq?

¹¹ ALLAH wikanang pikiran manusie, Ie wikan selapuqne sie-sie doang.

¹²Bahagie dengan saq Deside didik, ya ALLAH, dengan saq Deside ajah préntah-préntah Deside.

¹³Deside miaq ie tenang léq jelo-jelo saq penoq siq bahle, jangke tekaliq loang jari bau dengan jahat.

¹⁴Séngaq ALLAH nénten gen bilin umat-Ne; Ie nénten gen ngelupaqang dowé pusake-Ne.

¹⁵Make hukum gen tulak malik ojok keadilan, selapuq dengan jujur gen dukung hal nike.

¹⁶Sai saq béle tiang léman dengan durhake? Sai saq bepihak léq tiang ngelawan dengan saq gawéq jahat?

¹⁷Seandéne ALLAH nénten nulung tiang, aroh tiang ngalih ojok dunie dengan maté.

¹⁸Waktu kaji mikir bahwe kaji gen geriq, kasih Deside, ya ALLAH miaq kaji kukuh nganjeng.

¹⁹Lamun atén kaji kuatir dait osah, Deside hibur dait miaq kaji cemoh.

²⁰Deside nénten besekongkol kance hakim-hakim saq jahat, saq ngerencaneang kejahatan siq dasar hukum.

²¹Ie pade besekongkol ngelawan dengan jujur, dait ngukum maté dengan saq ndéq salaq.

²²Laguq ALLAH nike pembéle tiang, Allah tiang jari pelindung tiang.

²³Ie ngukum dengan jahat setimpal kance kejahatanne, dait binaseang ie pade lantaran dosene. ALLAH , Tuhante gen binaseang ie pade.