Read KITAB SUCI ZABUR INJIL ZABUR 95 Bible Online

ZABUR 95 - KITAB SUCI ZABUR INJIL bible

ZABUR 95

¹Silaq ite benyanyi bagi ALLAH, besurak-surak bagi penyelamette!

²Silaq ite parek tipaq Ie siq nyanyian syukur, besurak-surak bagi Ie siq lagu pujian.

³Séngaq ALLAH nike Tuhan saq agung, Raje perkase saq atasan léman selapuq déwe.

⁴Ie nguasein bagian-bagian gumi saq paling dalem, pucuk-pucuk gunung éndah jari dowé-Ne.

⁵Ie nguasein segare, séngaq Ie saq miaq, darat éndah tepiaq siq gading-Ne.

⁶Silaq ite sujut nyembah Ie, tokol bejengku léq arepan ALLAH, penciptente.

⁷ Séngaq Ie Tuhante, ite umat saq Ie peliharaq, maraq dombe saq Ie arat. Léq jelo niki lamun side dengahang manik-Ne:

⁸ “Ndaq side pagah maraq leluhurde léq Meriba, maraq waktu ie pade araq léq Masa, léq padang gurun.

⁹Léq derike ie pade cobe Tiang, timaq sampun serioq perbuatan Tiang.

¹⁰Petang dase taun ngonéqne Tiang pendaq serioq ie pade; manik Tiang: Mule tetu, bangse nike ndéq setie! Ie pade ndéq mélé taat léq préntah-préntah Tiang.

¹¹ Make Tiang besumpah léq dalem kemenggahan Tiang, ie pade ndéq gen tame ojok negeri nike jari mentelah bareng kance Tiang.”