Read KITAB SUCI ZABUR INJIL ZABUR 97 Bible Online

ZABUR 97 - KITAB SUCI ZABUR INJIL bible

ZABUR 97

¹ALLAH nike Raje! Gumi harus cemoh, dait pulao-pulao besukecite.

²Ie tekeliningin siq awan dait peteng; keadilan dait hukum nike dasar pemréntahan-Ne.

³Api ngelaur léq arepan-Ne, ngotongang musuh léq sekelining-Ne.

⁴Kisap-Ne menahin dunie, gumi ngijik serioq Ie.

⁵Gunung-gunung léléh maraq lilin léq arepan ALLAH, Junjungante Saq Mulie, penguase seantéro gumi.

⁶Langit nyeriteang keadilan-Ne, dait selapuq bangse serioq kemuliean-Ne.

⁷Selapuq dengan saq nyembah berhale gen teperilaq, saq banggeang barang-barang saq ndéq araq manpaatne; selapuq déwe gen sujut léq arepan ALLAH.

⁸Penduduk Sion dait kote-kote Yehuda seneng sewaktu dengah keputusan ALLAH.

⁹Séngaq Deside, ya ALLAH, penguase seantéro gumi; Deside agung lebihan léman selapuq déwe.

¹⁰Hai side saq ngasihin ALLAH, pade meriq léq kejahatan! Séngaq ALLAH ngelindungin idup dengan saq Ie kasihin, Ie bébasang ie pade léman kuase dengan durhake.

¹¹Terang sampun tiwoq bagi dengan saq tulus até, dait sukecite bagi dengan saq jujur.

¹²Pade besukecite, hai dengan-dengan saq tulus até lantaran napi saq sampun tepiaq siq ALLAH, dait besyukur tipaq peséngan-Ne saq suci.