Read KITAB SUCI ZABUR INJIL MATIUS 15 Bible Online

MATIUS 15 - KITAB SUCI ZABUR INJIL bible

MATIUS 15

¹Sekelompoq dengan Parisi dait ahli-ahli Taurat léman Yerusalem parek ojok Deside Isa. Ie pade metakén léq Deside Isa,

²“Kembéq pengiring-pengiring Pelungguh ngelanggar adat istiadat pare leluhurte? Sewaktu ie pade bekelor, ie pade ndéq bisoq imene juluq menurut aturan!”

³Jawab Deside Isa, “Kembéq side pade éndah ngelanggar préntah Allah cume lantaran mélé turut adat istiadat leluhurde?

⁴ Séngaq Allah bemanik, ‘Pade hormatin amaq dait inaqde,’ dait ‘Sai-sai saq nyumpaq amaqne atao inaqne harus tehukum maté.’

⁵Laguq side pade ngajahang: Sai-sai saq bebase léq amaqne atao léq inaqne, ‘Napi saq seharusne tiang béng léq inaq dait amaq tiang, sampun tiang ngaturang tipaq Allah,’

⁶make dengan nike ndéq malik tewajibang hormatin amaqne atao inaqne. Jari, lantaran adat istiadat leluhurde, side pade nyatayang Manik Allah ndéq berlaku.

⁷Side pade dengan munapik! Mule kenaq gati napi saq sampun tenubuatang siq Nabi Yesaya mengenai side pade,

⁸ ‘Maraq niki manik Allah: Dengan-dengan nike cume nyembah Tiang siq ucapan-ucapan doang, laguq aténe jaoq léman Tiang.

⁹Percume ie pade nyembah Tiang, séngaq aturan manusie saq ie pade ajahang maraqne hal nike préntah Tiang.’ ”

¹⁰Beterus Deside Isa ngemanikang dengan-dengan nike, dait bemanik léq ie pade, “Dengahang niki adéq side pade ngerti!

¹¹Ndéqne saq tame léq biwih saq miaq dengan nike najis; laguq saq sugul léman biwihne, hal nike saq najisang dengan.”

¹²Beterus pengiring-pengiring Deside Isa parek dait metakén léq Ie, “Napi Pelungguh wikan bahwe dengan-dengan Parisi nike tandruh sewaktu ie pade pireng Pelungguh bemanik maraq nike?”

¹³Jawab Deside Isa, “Sebilang taletan saq ndéq tetalet siq Bapa Tiang léq sorge gen tembot.

¹⁴ Ndaq runguq dengan-dengan Parisi nike. Ie pade pemimpin-pemimpin saq bute; dait lamun dengan bute mimpin dengan bute, make deduaqne gen geriq ojok longkak.”

¹⁵Beterus Petrus matur, “Tunas Pelungguh jelasang arti perumpamean nike léq tiang pade!”

¹⁶Jawab Deside Isa léq ie pade, “Napi side pade ndéqman ngerti éndah?

¹⁷Napi side pade ndéq nenaoq bahwe napi saq tame ojok dalem biwih gen turun ojok dalem tian beterus gen sugul malik?

¹⁸ Laguq saq sugul léman biwih asalne léman até; dait hal nike saq jari penyebap dengan jari najis.

¹⁹Séngaq léman até timbul pikiran-pikiran jahat, saq jari penyebab dengan nyematéq, bezinah, gawéq perbuatan saq cabul, memaling, ngebéng kesaksian palsu dait pitnah.

²⁰Hal-hal nike saq miaq dengan jari najis, dait ndéqne lantaran bekelor siq ime saq ndéq tebisoq.”

²¹Beterus Deside Isa bilin taoq nike dait lumbar ojok daérah saq rapet léman kote Tirus dait Sidon.

²²Sopoq dengan nine léman Kanaan saq ndot léq daérah nike parek ojok Deside Isa, sambil bekuih-kuih, “Junjungan Saq Mulie, Keturunan Daud, periakang tiang, séngaq anak tiang saq nine tekuasein siq roh jahat dait sengsare gati.”

²³Deside Isa nénten bejawab napi-napi léq dengan nine nike. Beterus pengiring-pengiring-Ne parek dait tunas léq Deside Isa, “Manikang dengan nine nike lumbar. Ie cume bekuih-kuih doang léq mudinte.”

²⁴Jawab Deside Isa, “Tiang teutus cume tipaq bangse Israel, terutame tipaq ie pade saq sesat.”

²⁵Dengan nine nike parek terus sujut léq arepan Deside Isa dait matur, “Junjungan Saq Mulie, tulung tiang niki.”

²⁶Jawab Deside Isa, “Ndéqne patut bait keloran kanak-kanak terus tesaut tipaq acong.”

²⁷“Mule tetu, Junjungan Saq Mulie,” jawab dengan nine nike, “laguq acong éndah ngaken salo-salo saq geriq léman méje majikanne.”

²⁸Beterus Deside Isa bemanik léq dengan nine nike, “Inaq, tetu-tetu beléq iman side! Alurang adéqne telaksane napi saq side harepang!” Léq waktu nike éndah, bije dengan nine nike selah.

²⁹Deside Isa bilin taoq nike, dait bemargi léq sedin Danao Galilea, beterus Ie taék léq sopoq bukit dait melinggih léq derike.

³⁰Luwéq dengan parek ojok Deside Isa jauq dengan-dengan saq démpang, saq bute, saq képaq, saq pakoq dait luwéq malik dengan sakit saq lain. Ie pade toloq dengan-dengan nike léq arepan Deside Isa, dait ie pade teselahang.

³¹Dengan luwéq saq araq léq derike bengaq gati, waktu ie pade serioq dengan pakoq tao ngeraos, dengan démpang jari selah, dengan képaq iniq lampaq dait dengan bute iniq nyerioq. Beterus ie pade mulieang Allah bangse Israel.

³²Beterus Deside Isa ngemanikang pengiring-pengiring-Ne dait bemanik, “Tiang periak léq dengan luwéq niki. Sampun telu jelo ngonéqne ie pade turut Tiang, dait mangkin ie pade ndéq bedowé keloran. Tiang ndéq mélé suruq ie pade uléq dalem keadaan lapah, laun ie pade paleng léq tengaq langan.”

³³Beterus pengiring-pengiring-Ne metakén léq Deside Isa, “Léq taoq saq kesempil niki léq mbé ite gen mauq keloran jari dengan saq luwéqne maraq niki?”

³⁴“Araq pire ruti léq side pade?” Deside Isa beketuan léq ie pade. “Araq pituq,” jawab ie pade, “dait araq éndah empaq-empaq kodéq.”

³⁵Make Deside Isa manikang dengan-dengan nike tokol léq tanaq.

³⁶Beterus Deside Isa bait kepituq ruti dait empaq-empaq nike, dait ngucap syukur tipaq Allah. Sesampun nike Ie peleng-peleng ruti dait empaq nike siq gading-Ne, terus icanin-Ne tipaq pengiring-pengiring-Ne. Dait ie pade bagi-bagiang léq dengan luwéq nike.

³⁷Selapuq dengan nike bekelor jangke besuh. Sesampun nike, pengiring-pengiring Deside Isa ngumpulang salo keloran nike. Selapuqne araq pituq bakaq penoq.

³⁸Jumlah dengan mame saq milu bekelor waktu nike araq empat iyu dengan, ndéqman terékéng dengan nine dait kanak-kanak.

³⁹Sesampun nike, Deside Isa ngemanikang dengan-dengan nike uléq. Ie mésaq taék perau terus lumbar ojok daérah Magadan.