Read KITAB SUCI ZABUR INJIL MATIUS 17 Bible Online

MATIUS 17 - KITAB SUCI ZABUR INJIL bible

MATIUS 17

¹ Enem jelo sesampun nike, Deside Isa gadingang Petrus, Yakub dait Yahya semetonne Yakub, taék ojok sopoq gunung saq atas. Cume ie pade saq araq léq derike.

²Beterus Deside Isa begentiq rue léq julun ie pade. Penjarupan-Ne jari menah maraq sinar jelo dait kuace-Ne jari putéq becahaye.

³Selung-selung ie pade serioq Musa dait Elia léq derike kenyeke bebaos kance Deside Isa.

⁴Petrus matur léq Deside Isa, “Junjungan Saq Mulie, maiq gati ite léq deriki, lamun Pelungguh kayun, gen tiang penganjeng telu kémah léq deriki: Sopoq umaq Pelungguh, sopoqne umaq Musa dait sopoqne malik umaq Elia.”

⁵ Léq waktu Petrus kenyeke matur, turun awan saq becahaye léq atas ie pade dait léman awan nike kedengahan suare saq ngeraos maraq niki, “Nikii Bije Tiang saq Tiang kasihin. Ie nyenengang Tiang. Pade dengahang Ie!”

⁶Sewaktu pengiring-pengiring Deside Isa dengah suare nike, ie pade takut gati jangke nyungkur ojok tanaq.

⁷Beterus Deside Isa rauh dait kintur ie pade sambil bemanik, “Pade ures, ndaq takut!”

⁸Sewaktu ie pade ures, ie pade ndéq serioq sai-sai kecuali Deside Isa.

⁹Waktu ie pade turun léman gunung nike, ie pade teperinget siq Deside Isa, “Ndaq tuturang sai juaq napi saq baruq side pade serioq nike, sendéqman dateng waktune Bije Manusie teidupang malik léman ninggal-Ne.”

¹⁰ Beterus pengiring-pengiring Deside Isa metakén léq Ie, “Kembéq ahli-ahli Taurat bebase bahwe Elia gen dateng juluan?”

¹¹Jawab Deside Isa, “Mule tetu Elia gen dateng dait ie gen siepang selapuqne.

¹² Laguq Tiang badaq side: Setetune Elia sampun dateng laguq dengan-dengan ndéq kenal ie. Elia saq dateng nike teperlakuang semélé angen ie pade. Dait maraq nike éndah ie pade gen perlakuang Bije Manusie.”

¹³Beterus pengiring-pengiring-Ne ngerti bahwe Deside Isa bebaos mengenai Yahya Pembaptis.

¹⁴Sewaktu Deside Isa dait ketelu pengiring-Ne tulak ojok dengan luwéq nike, sopoq dengan mame parek, sujut léq arepan Deside Isa,

¹⁵dait matur, “Junjungan Saq Mulie, periakang anak tiang. Ie sakit mopok, dait menderite gati sehingge ie rimpes geriq ojok dalem api dait rimpes éndah ojok dalem aiq.

¹⁶Tiang sampun jauq ie ojok pengiring-pengiring Pelungguh, laguq ie pade ndéq tao nyelahang ie.”

¹⁷Jawab Deside Isa, “Luar biase side pade niki! Side pade tetu-tetu dengan-dengan saq ndéq percaye dait sesat! Jangke piran Tiang harus araq kance side pade dait tetep sabar tipaq side pade? Jauq jauq kanak nike ojok deriki!”

¹⁸Sesampun kanak nike tejauq, Deside Isa préntahang sétan saq araq léq dalem kanak nike adéqne sugul. Dait sétan nike sugul, beterus kanak nike langsung selah.

¹⁹Sesampun nike, pengiring-pengiring Deside Isa secare husus parek dait metakén, “Kembéq tiang pade ndéq bau sediq sétan nike?”

²⁰ Jawab Deside Isa, “Séngaq side pade kurang percaye. Keranaq nike Tiang badaq side: Lamun side pade bedowé iman beléqne maraq tolang sawi, make side pade bau bebase léq gunung niki, ‘Ngalih ojok to!’ pasti gunung niki gen ngalih. Ndéq araq sopoq juaq saq ndéq bau side pade piaq! [

²¹Laguq roh jahat saq maraq niki cume bau tesediq siq do'e dait puase doang.]”

²²Sewaktu pengiring-pengiring Deside Isa bekumpul léq Galilea, Deside Isa bemanik tipaq pengiring-pengiring-Ne, “Bije Manusie gen teserahang tipaq kuase manusie.

²³Ie gen tematéq. Laguq léq jelo saq ketelu, Ie gen teidupang.” Make pengiring-pengiring-Ne jari aséq gati.

²⁴ Sewaktu Deside Isa dait pengiring-pengiring-Ne rauh léq Kapernaum, penagih-penagih pajek Gedéng Allah dateng tipaq Petrus dait beketuan, “Gurunde bayah pajek Gedéng Allah atao ndéq?”

²⁵Jawab Petrus, “Bayah!” Sewaktu Petrus uléq, ie teketuan juluan siq Deside Isa, “Simon, berembé menurut pendapet side? Sai saq harus bayah pajek tipaq raje-raje léq dunie niki? Rakyatne atao dengan pendateng?”

²⁶“Dengan pendateng,” jawab Petrus. “Lamun maraq nike,” manik Deside Isa, “rakyat ndéq perlu bayah.

²⁷Laguq ndaq ite singgung perasaan dengan-dengan nike. Jari, silaq lumbar mancing ojok danao. Bait empaq saq penembéq side bau. Léq dalem biwih empaq nike side gen ndait képéng logam saq cukup tekadu bayah pajekte kance due. Bait képéng nike dait bayah pajekte léq ie pade.”