Read KITAB SUCI ZABUR INJIL MATIUS 18 Bible Online

MATIUS 18 - KITAB SUCI ZABUR INJIL bible

MATIUS 18

¹ Léq waktu nike pengiring-pengiring Deside Isa parek dait metakén, “Sai saq paling beléq léq dalem Kerajaan Sorge?”

²Deside Isa ngemanikang sopoq kanak kodéq, dait penganjeng-Ne kanak nike léq julu ie pade.

³ Terus Deside Isa bemanik, “Tiang badaq side pade! Setetune lamun side pade ndéq betobat dait jari maraq kanak kodéq niki, side pade ndéq gen tame dalem Kerajaan Sorge.

⁴Dengan saq ngerendahang diriqne dait jari maraq kanak kodéq niki, ie saq jari paling beléq léq dalem Kerajaan Sorge.

⁵Dait dengan saq nerimaq sopoq kanak maraq niki lantaran Tiang, artine nerimaq Tiang.”

⁶“Sai-sai saq jari penyebap salaq sopoq léman kanak-kanak kodéq saq percaye léq Tiang niki bedose, solahan lamun batu penggilingan tetaliq léq belongne terus ie tetelepang léq segare saq dalem.

⁷Celake gati dunie niki lantaran hal-hal saq jari penyebap dengan gawéq dose. Mule hal-hal saq maraq nike gen tetep araq, laguq celake gati dengan-dengan saq jari penyebapne!

⁸ Lamun imende atao naénde miaq side bedose, araqan side peleng dait tetéh. Solahan side bedowé setowéq naé atao ime laguq side selamet idup bareng kance Allah, ketimbang side tetetéh ojok dalem api nerake lantong kedue ime dait naénde.

⁹ Dait lamun penentengde miaq side bedose, luwit dait tetéh. Solahan side bute setowéq laguq idup bareng kance Allah, ketimbang side tetetéh ojok dalem api nerake lantong kedue penentengde.”

¹⁰“Pade inget! Ndaq menghine salaq sopoq léman kanak-kanak kodéq niki. Tiang badaq side, malaékat-malaékat ie pade tetep araq léq arepan Bapa Tiang léq sorge. [

¹¹ Séngaq Bije Manusie rauh jari nyelametang dengan saq sesat!]

¹²Berembé pendapet side? Seandéne araq sopoq dengan saq bedowé satus dombe, terus sopoq léq antare dombe-dombe nike telang. Napi saq gen tepiaq siq dengan nike? Pasti ie gen bilin dombe-dombene saq siwaq pulu siwaq nike léq gunung dait lumbar boyaq saq telang nike.

¹³Tiang badaq side, setetune lamun ie ndait malik dombe nike, cemohne gen beléqan tipaq dombe saq sopoq nike ketimbang saq siwaq pulu siwaq lainne saq ndéq telang.

¹⁴Maraq nike éndah Bapa side saq léq sorge, nénten kayun salaq sopoq léman kanak-kanak niki telang.”

¹⁵ “Lamun semetonde bedose léq side, dateng badaq ie dait jelasang napi kepelihanne. Laksaneang hal nike tedoq-tedoq antare side kance ie doang. Lamun ie turut naséhat side, artine side berhasil mauq semetonde malik.

¹⁶ Laguq lamun ie ndéq mélé, dateng jauq sopoq atao due dengan malik. Séngaq araq tetulis léq dalem Kitab Suci, ‘Sekurang-kurangne due atao telu dengan saksi saq teperluang jari nyatayang kesalaqan sopoq dengan saq tetuduh.’

¹⁷Laguq lamun ie ndéq mélé nerimaq naséhat dengan-dengan nike, sampéang hal nike tipaq jemaah. Dait ahirne, lamun ie ndéq nerimaq naséhat jemaah, anggep doang ie sebagé penagih pajek atao dengan saq ndéq kenal Allah.”

¹⁸ Tiang badaq side: “Napi saq side pade taliq léq dunie niki, gen tetaliq éndah léq sorge. Dait napi saq side pade lekaq léq dunie niki, gen telekaq éndah léq sorge.

¹⁹Dait Tiang badaq side malik: Lamun léq antare side pade léq dunie niki araq due dengan sepakat mengenai napi juaq dait bedo'e, do'e nike gen tekabulang siq Bapa Tiang léq sorge.

²⁰Séngaq léq mbé araq due atao telu dengan bekumpul lantaran Tiang, Tiang araq léq tengaq-tengaq ie pade.”

²¹ Beterus Petrus parek ojok Deside Isa dait metakén, “Junjungan Saq Mulie, lamun semeton tiang bedose léq tiang, jangke pire kali tiang harus ngampunin ie? Napi jangke pituq kali?”

²²Jawab Deside Isa, “Ndéq, ndéqne cume pituq kali, laguq jangke pituq pulu kali pituq kali!

²³Séngaq hal Kerajaan Sorge seumpame maraq sopoq raje saq gen ngerékéng utang-utang hambe-hambene.

²⁴Sewaktu ie mulai ngaraqang pemeriksaan, tejauq ojok ie sopoq hambe saq bedowé utang jangke bejute-jute,

²⁵dait ie ndéq sanggup ngelunasin. Beterus raje nike ngican préntah adéq hambe nike tejual bareng seninene dait bijene, lantong selapuq dowéne jari bayah utangne.

²⁶Hambe nike sujut léq arepan raje nike dait tunas, ‘Tuan raje, sabar juluq, tiang gen ngelunasang selapuq utang tiang.’

²⁷Raje nike periak léq ie, sehingge ie bébasang selapuq utangne.

²⁸Sewaktu hambe nike sugul, ie bedait kance baturne pade pade jari hambe éndah saq berutang léq ie araq pire iyu luwéqne. Baune baturne nike, pekokne dait ie bebase, ‘Bayah selapuq utangde!’

²⁹Beterus baturne nike sujut ngéndéng tulung léq julune, ‘Sabar juluq batur, selapuqne pasti gen tiang bayah!’

³⁰Laguq hambe nike nolaq, sebalikne, ie tamaq baturne ojok dalem bui, jangke ie ngelunasang utangne.

³¹Sewaktu teserioq siq hambe-hambe saq lain napi saq sampun ie laksaneang léq baturne nike, ie pade aséq dait ngelaporang hal nike ojok raje.

³²Beterus raje nike ngempoh hambe saq jahat nike dait bebase léq ie, ‘Hambe saq jahat! Selapuq utangde sampun tiang apus cume lantaran petunasande léq tiang.

³³Seharusne side éndah periak léq baturde nike pade maraq tiang sampun periak léq side?’

³⁴Raje nike menggah gati. Hambe saq jahat nike tetamaq ojok dalem bui jangke ie ngelunasang selapuq utangne.”

³⁵Ahirne Deside Isa nutuqang cerite-Ne siq manik niki, “Maraq nike éndah side pade sopoq-sopoq gen teperlakuang siq Bapa Tiang léq sorge, lamun side pade ndéq ihlas ngampunin baturde.”