Read KITAB SUCI ZABUR INJIL MATIUS 19 Bible Online

MATIUS 19 - KITAB SUCI ZABUR INJIL bible

MATIUS 19

¹Sesampun Deside Isa tutuq manikang selapuq hal nike, Ie lumbar léman Galilea ojok daérah Yudea, léq itoqan Kokoq Yordan.

²Luwéq dengan ngiring Deside Isa, dait Ie nyelahang ie pade léq derike.

³Beterus dengan-dengan Parisi dateng jari boyaq kesalaqan adéqne bau nyalahang Deside Isa. Dengan-dengan nike metakén, “Napi kanggo dengan séang seninene lantaran alasan napi juaq?”

⁴ Jawab Deside Isa, “Napi side pade ndéqman bace léq dalem Kitab Suci bahwe Allah cipteang manusie, léman penembéqne Allah jariang ie pade mame dait nine?

⁵ Dait manik-Ne, ‘Keranaq nike dengan mame gen bilin inaq amaqne dait besopoq kance seninene, make deduaqne jari sopoq.’

⁶Jari ie pade ndéqne due malik, laguq sopoq. Keranaq nike napi saq tepesopoq siq Allah, ndéq kanggo teséang siq manusie.”

⁷ Beterus dengan-dengan Parisi metakén léq Deside Isa, “Lamun maraq nike kembéq Musa suruq dengan ngebéng surat séang léq seninene saq ie séang?”

⁸Jawab Deside Isa, “Musa ngijinang side pade séang seninende séngaq side pade sengke gati teajah. Laguq setetune ndéq maraq nike léq penembéqne.

⁹ Tiang badaq side: Sai-sai saq séang seninene — padahal seninene nike ndéq nyeléwéng — beterus ie merariq malik kance dengan nine lain, artine dengan nike bezinah.”

¹⁰Make pengiring-pengiring-Ne matur léq Deside Isa, “Lamun maraq nike entan semame léq senine, bagusan ndaq merariq.”

¹¹Jawab Deside Isa, “Ndéq selapuq dengan bau terimaq hal nike, cume dengan-dengan saq sampun tetentuang siq Allah.

¹²Séngaq araq dengan saq ndéq mauq merariq, lantaran ie pade mule tebijeang maraq nike. Araq éndah dengan saq ndéq iniq merariq lantaran tepiaq siq dengan lain. Dait araq éndah saq ndéq merariq, lantaran keméléqne mésaq demi Kerajaan Sorge. Sai saq bau ngerti, alurang ie ngerti.”

¹³Araq dengan-dengan jauq kanak-kanak kodéq ojok Deside Isa adéq Deside Isa toloq gading-Ne léq atas ie pade dait do'eang ie pade. Laguq pengiring-pengiring Deside Isa siliq dengan-dengan nike.

¹⁴Make Deside Isa bemanik léq pengiring-pengiring-Ne, “Alurang kanak-kanak nike dateng ojok Tiang! Ndaq balaq ie pade séngaq dengan-dengan maraq niki saq bedowé Kerajaan Sorge.”

¹⁵Beterus Deside Isa toloq gading-Ne léq atas kanak-kanak nike. Sesampun nike Deside Isa margi léman derike.

¹⁶Araq sopoq terune parek tipaq Deside Isa dait matur, “Paq Guru, perbuatan solah napi saq harus tiang piaq adéq tiang mauq idup sejati dait kekel?”

¹⁷Jawab Deside Isa, “Kembéq side beketuan léq Tiang mengenai napi saq solah? Cume araq Sopoq saq solah. Lamun side mélé idup, side harus taat léq préntah-préntah Allah.”

¹⁸ “Préntah saq mbé nike?” basen dengan nike metakén. Jawab Deside Isa, “Ndaq nyematéq, ndaq bezinah, ndaq memaling dait ndaq jari saksi duste,

¹⁹ pade hormatin amaq dait inaqde; dait kasihin sepadende manusie maraq side ngasihin diriqde mésaq.”

²⁰“Selapuq préntah nike sampun tiang turut,” jawab terune nike. “Napi malik saq perlu?”

²¹Deside Isa bemanik léq terune nike, “Lamun side mélé jari sempurne, lumbar, jual selapuq dowénde. Béng képéngne tipaq dengan-dengan miskin, make side gen mauq harte léq sorge. Sesampun nike side dateng turut Tiang!”

²²Sesampun dengah manik Deside Isa nike, terune nike lumbar siq susah angenne séngaq ie sugih gati.

²³Beterus Deside Isa bemanik léq pengiring-pengiring-Ne, “Tiang badaq side, sengke gati dengan sugih tame ojok dalem Kerajaan Sorge.

²⁴Dait niki éndah saq Tiang gen sampéang léq side: Molahan onte tame ojok dalem loang jarum, ketimbang dengan sugih tame ojok dalem Kerajaan Allah.”

²⁵Sewaktu pengiring-pengiring-Ne dengah manik Deside Isa nike, ie pade bengaq. “Lamun maraq nike,” atur ie pade, “sai saq bau selamet?”

²⁶Deside Isa merhatiang ie pade terus bemanik, “Bagi manusie hal nike mustahil! Laguq bagi Allah nénten araq sopoq juaq saq mustahil.”

²⁷Beterus Petrus matur, “Pelungguh cingakin, tiang pade sampun bilin selapuq-lapuqne jari ngiring Pelungguh. Dait napi saq gen tiang pade terimaq?”

²⁸ Deside Isa bemanik léq ie pade, “Tiang badaq side: Setetune léq Dunie saq Baru, Bije Manusie gen melinggih léq atas tahte-Ne saq mulie. Léq waktu nike side pade pengiring-pengiring Tiang gen tokol léq atas due olas tahte jari hakimin kedue olas suku bangse Israel!

²⁹Dait sebilang dengan saq sampun bilin balé, atao semeton mame atao nine, atao inaq amaqne, atao bije-bijene, atao kebon bangketne lantaran Tiang, dengan nike gen nerimaq satus kali lipet. Dait ie gen nerimaq éndah idup saq sejati dait kekel.

³⁰ Laguq luwéq dengan saq mangkin niki jari penembéq, gen jari saq penutuq dait luwéq saq mangkin niki jari penutuq gen jari saq penembéq.”