Read KITAB SUCI ZABUR INJIL MATIUS 20 Bible Online

MATIUS 20 - KITAB SUCI ZABUR INJIL bible

MATIUS 20

¹“Kerajaan Sorge nike seumpame maraq niki: Araq sopoq dengan bedowé kebon anggur. Léq waktu kelémaq ie sugul boyaq dengan saq mélé begawéan léq kebon anggurne.

²Sesampun ie sepakat bayah buruh-buruh nike siq sopoq képéng perak sejelo, dengan nike suruq ie pade begawéan léq kebon anggurne.

³Jam siwaq kelémaq, épén dowé kebon nike sugul malik, dait serioqne dengan-dengan nganggur léq peken.

⁴Jari épén dowé kebon nike bebase léq dengan-dengan nike, ‘Silaq side pade begawéan léq kebon anggur tiang. Tiang gen bayah side pade siq upaq saq pantes.’

⁵Dengan-dengan nike lumbar. Waktu jam due olas tengari dait jam telu kebian, épén dowé kebon nike sugul malik dait ngelaksaneang hal saq pade.

⁶Kire-kire jam lime kebian, ie sugul malik, dait serioqne masih araq dengan saq nganggur. Beterus épén dowé kebon nike beketuan léq ie pade, ‘Kembéq side pade nganjeng sejeloan léq deriki dait ndéq begawéan napi-napi?’

⁷Jawab dengan-dengan nike, ‘Ndéq araq dengan saq mélé béng tiang pade pegawéan.’ ‘Lamun maraq nike,’ basen épén dowé kebon nike, ‘silaq side pade begawéan léq kebon anggur tiang.’

⁸ Léq waktu serep jelo, épén dowé kebon anggur nike bebase léq mandorne, ‘Empoh buruh-buruh nike, dait bayah gajine sopoq-sopoq, mulai léman buruh saq paling mudi begawéan jangke saq paling julu begawéan.’

⁹Beterus dateng buruh-buruh saq begawéan mulai jam lime kebian. Sopoq-sopoq nerimaq upaq sopoq képéng perak.

¹⁰Beterus dateng éndah buruh-buruh saq begawéan léman kelémaq. Ie pade pikir gen nerimaq upaq saq lebihan. Laguq ie pade nerimaq upaq sopoq képéng perak éndah.

¹¹Sewaktu ie pade nerimaq képéng nike, ie pade ngerumun léq épén dowé kebon nike:

¹²‘Dengan saq dateng paling mudi nike begawéan cume sejam doang. Tiang pade begawéan sejeloan léq bawaq panas jelo, laguq Pelungguh bayah dengan-dengan nike pade maraq tiang!’

¹³Épén dowé kebon anggur nike bebase léq salaq sopoq dengan léman buruh nike, ‘Semeton, tiang ndéq gawéq saq ndéq adil léq side. Tekan side setuju tebayah siq sopoq képéng perak sejelo?

¹⁴Mangkin silaq bait upaqde, beterus side lumbar. Tiang mule beniat ngebéng gaji léq dengan saq begawéan paling mudi nike siq upaq saq pade maraq saq tiang béng léq side.

¹⁵Napi tiang ndéq kanggo gawéq semélé angen tiang siq dowén tiang mésaq? Atao side talon até, séngaq tiang murah até?’ ”

¹⁶ Beterus Deside Isa bemanik malik, “Maraq nike éndah dengan-dengan saq penutuq gen jari saq penembéq, dait dengan-dengan saq penembéq gen jari saq penutuq.”

¹⁷Sewaktu Deside Isa lumbar ojok Yerusalem, léq tengaq langan Ie ngemanikang kedue olas pengiring-Ne adéqne bekumpul bekelin léman dengan-dengan lain. Beterus Deside Isa bemanik léq ie pade,

¹⁸“Dengahang! Mangkin ite lumbar ojok Yerusalem. Léq derike Bije Manusie gen teserahang tipaq imam-imam kepale dait ahli-ahli Taurat. Terus Ie gen tehukum maté,

¹⁹sesampun nike Ie gen teserahang tipaq bangse-bangse saq ndéq kenal kance Allah, adéq Ie teoloq-oloq, dait tesiksaq, terus tepakuq léq kayuq salib. Laguq léq jelo saq ketelu, Ie gen teidupang malik.”

²⁰Sesampun nike, senine Zebedeus dait bije-bijene parek tipaq Deside Isa. Léq arepan Deside Isa ie sujut tunas sopoq hal.

²¹Manik Deside Isa, “Napi mélénde inaq?” Jawab inaq nike, “Préntahang adéqne deduaq anak tiang niki éraq bau tokol léq kiri dait kanan Pelungguh, léq dalem Kerajaan Pelungguh.”

²²“Side pade ndéq nenaoq napi saq side pade tunas,” manik Deside Isa léq ie pade. “Napi side pade sanggup nginem léman cawan penderitean saq harus Tiang inem?” “Sanggup!” jawab ie pade.

²³Deside Isa bemanik, “Mule side pade gen nginem éndah léman cawan penderitean Tiang. Laguq mengenai sai saq gen tokol léq kanan atao kiri Tiang, nike ndéqne Tiang saq berhak nentuang. Hal nike tesadangang tipaq dengan saq sampun tetentuang siq Bapa Tiang.”

²⁴Waktu kesepulu pengiring saq lain dengah hal nike, ie pade sili léq kedue dengan saq besemetonan nike.

²⁵ Keranaq nike, Deside Isa ngemanikang ie pade selapuq, dait bemanik, “Side pade nenaoq bahwe pemimpin-pemimpin bangse saq ndéq kenal kance Allah nindes rakyatne. Dait pembeléq-pembeléqne bedowé wewenang penoq tipaq ie pade.

²⁶ Laguq side pade ndéq kanggo maraq nike. Sebalikne, dengan saq mélé jari beléq léq antare side pade, ie harus jari pelayande.

²⁷Dait dengan saq mélé jari saq penembéq léq antare side pade, ie harus jari hambende.

²⁸Pade maraq Bije Manusie nike éndah; Ie rauh nénten jari telayanin, laguq jari ngelayanin, dait nyerahang nyawe-Ne jari tebusan tipaq dengan luwéq.”

²⁹Sewaktu ie pade sugul léman kote Yeriko, luwéq dengan ngiring Deside Isa.

³⁰Araq due dengan bute kenyeke tokol léq sedin rurung. Waktu ie pade dengah bahwe Deside Isa bemargi léq derike, ie pade bekuih, “Junjungan Saq Mulie, Keturunan Daud, periakang tiang pade!”

³¹Dengan luwéq saq araq léq derike peringet ie pade adéq ie pade tedoq. Laguq ie pade bekuih sayan keras, “Junjungan Saq Mulie, Keturunan Daud! Periakang tiang pade!”

³²Beterus Deside Isa mentelah, dait ngemanikang kedue dengan bute nike. Ie bemanik, “Napi saq side pade melétang adéq Tiang piaq léq side pade?”

³³Jawab kedue dengan bute nike, “Junjungan Saq Mulie, tiang pade melét tao nyerioq!”

³⁴Deside Isa periak léq deduaqne, terus Ie jamah penenteng ie pade. Langsung waktu nike éndah ie pade tao nyerioq. Beterus ie pade ngiring Deside Isa.