Read KITAB SUCI ZABUR INJIL MATIUS 22 Bible Online

MATIUS 22 - KITAB SUCI ZABUR INJIL bible

MATIUS 22

¹Deside Isa bemanik malik léq dengan luwéq kadu perumpamean,

²manik-Ne, “Kerajaan Sorge nike seumpame maraq niki: Sopoq raje ngaraqang gawé jari ngawinang bijene.

³Raje nike ngutus pelayan-pelayanne ngempoh dengan-dengan saq sampun tepesilaq ojok gawé nike, laguq dengan-dengan saq tepesilaq nike ndéq mélé dateng.

⁴Beterus raje nike ngutus malik pelayan-pelayan saq lain. Raje nike bebase léq pelayan-pelayanne, ‘Sampéang tipaq dengan-dengan saq tepesilaq nike: Pesajiq léq gawé nike sampun tesiepang. Sampi dait anak sampi tiang saq saq paling solah sampun tesembeléh. Selapuqne sampun tesiepang. Silaq side pade dateng ojok gawé ngawinang!’

⁵Laguq temué-temué saq tepesilaq nike ndéq ngerunguq ie. Ie pade selapuq lumbar ojok taoqne begawéan — araq saq ojok lendangne, saq lainne lumbar ojok taoqne berusahe;

⁶dait saq lainne bau pelayan-pelayan nike, terus tempuk dait ie pade tematéq.

⁷Raje nike jari menggah gati. Beterus ie ngutus tentere-tenterene jari nyematéq tukang nyematéq pelayan-pelayanne nike, dait sedut kote ie pade.

⁸Sesampun nike raje ngempoh pelayan-pelayanne, terus bebase, ‘Gawé niki sampun tesiepang laguq dengan-dengan saq tepesilaq ndéq pantes.

⁹Lalo ojok rurung-rurung beléq, dait pesilaq dengan seluwéq-luwéqne dateng ojok gawé niki.’

¹⁰Jari pelayan-pelayan nike lalo ojok rurung-rurung beléq, terus ngumpulang selapuq dengan saq daitne léq derike, saq soléh dait saq jahat. Make taoq gawé ngawinang nike jari penoq siq temué-temué.

¹¹Beterus raje nike tame serioq temué-temuéne nike. Laguq araq serioqne sopoq temué saq ndéq ngengadu kelambi begawé.

¹²Beterus raje nike beketuan léq ie, ‘Semeton, berembé entande jangke bau tame ojok deriki, padahal side ndéq kadu kelambi begawé?’ Dengan nike ndéq tao bejawab.

¹³ Beterus raje nike bebase léq pelayan-pelayanne, ‘Sékoq ime dait naén dengan niki, terus tetéh ie ojok luah léq taoq saq peteng dedet. Léq derike ie gen nangis dait menderite.’ ”

¹⁴Beterus maraq niki entan Deside Isa nutuqang perumpamean nike, “Mule luwéq dengan saq tempoh laguq sekediq saq tepiléq.”

¹⁵Beterus dengan-dengan Parisi lumbar dait berunding adéq ie pade mauq langan nyalahang Deside Isa siq care besoal jawab.

¹⁶Make ie pade ngutus pengiring-pengiring ie pade parek ojok Deside Isa bareng kance dengan-dengan golongan Herodes. Dengan-dengan nike matur léq Deside Isa, “Bapaq Guru, tiang pade nenaoq Pelungguh jujur. Pelungguh ngajahang secare terus terang mengenai langan saq kenaq tipaq Allah, dait nénten takut léq sai juaq. Séngaq Pelungguh nénten piléq kasih.

¹⁷Keranaq nike tunas Pelungguh ngendike léq tiang pade: Menurut aturan agamente, kanggo napi nénten bayah pajek léq Kaisar?”

¹⁸Deside Isa wikan maksut jahat dengan-dengan nike, make Ie bemanik léq ie pade, “Hai, dengan-dengan munapik! Kembéq side pade beniat boyaq-boyaq kesalaqan adéq bau nyalahang Tiang?

¹⁹Cobaq petitoqang léq Tiang sopoq képéng perak saq side pade kadu bayah pajek!” Beterus dengan-dengan nike ngaturin Deside Isa sopoq képéng perak.

²⁰Deside Isa beketuan léq ie pade, “Gambar dait aran sai niki?”

²¹“Gambar dait aran Kaisar,” jawab ie pade. Make Deside Isa bemanik tipaq ie pade, “Lamun maraq nike serahang ojok Kaisar napi saq jari dowén Kaisar, dait tipaq Allah napi saq jari dowén Allah.”

²²Waktu ie pade dengah penjelasan nike ie pade bengaq. Ahirne dengan-dengan nike lumbar bilin Deside Isa.

²³ Léq jelo nike éndah, araq dengan-dengan Saduki parek ojok Deside Isa. Ie pade golongan saq bedowé pendapet bahwe dengan ninggal ndéq gen idup malik.

²⁴ Ie pade metakén léq Deside Isa, “Bapaq Guru, Musa ngajahang maraq niki: Lamun araq dengan mame ninggal, dait ie ndéq bedowé bije, semetonne harus merariq kance bebalune adéq ie bau ngebéng keturunan tipaq dengan saq sampun ninggal nike.

²⁵Laguq léq antare tiang pade araq pituq dengan besemetonan. Saq sengake merariq, terus ninggal ndéq bedowé bije, beterus bebalune tebait siq semetonne.

²⁶Semetonne nike éndah ninggal ndéq bedowé bije. Maraq nike éndah léq semetonne saq ketelu dait seterusne jangke saq kepituq.

²⁷Ahirne dengan nine nike éndah ninggal.

²⁸Léq waktu dengan ninggal teidupang malik, sai semame dengan nine nike? Séngaq kepituq-pituqne sampun merariq kance ie.”

²⁹Jawab Deside Isa, “Side keliru gati, séngaq side pade ndéq ngerti Kitab Suci dait kuase Allah.

³⁰Séngaq éraq lamun dengan ninggal teidupang malik, ie pade ndéq gen merariq malik, laguq ie pade gen idup maraq malaékat léq sorge.

³¹Napi side pade ndéqman bace napi saq temanikang siq Allah mengenai dengan ninggal teidupang malik? Allah bemanik,

³² ‘Tiang niki Allah Ibrahim, Allah Ishak dait Allah Yakub.’ Allah nike nénten Allah dengan ninggal, laguq Allah dengan saq idup!”

³³Sewaktu dengan luwéq nike dengah penjelasan Deside Isa, ie pade takjub siq pengajahan-Ne.

³⁴Sewaktu dengan-dengan Parisi pireng bahwe Deside Isa sampun miaq dengan-dengan Saduki ndéq tao bejawab malik, ie pade bekumpul.

³⁵ Salaq sopoq léq antarene, ahli Taurat, ie metakén léq Deside Isa jari boyaq kesalaqan-Ne:

³⁶Ie bebase, “Paq Guru, préntah napi saq paling utame léq dalem Hukum Taurat?”

³⁷ Jawab Deside Isa, “Kasihin Allah, Tuhan side siq segenep aténde, dait siq segenep jiwende, dait siq segenep akal budinde.

³⁸Nike préntah saq utame dait saq paling penting!

³⁹ Préntah kedue pade maraq saq utame nike: Kasihin sepadende manusie, maraq side ngasihin diriqde mésaq.

⁴⁰Selapuq isi Hukum Taurat dait kitab nabi-nabi dasarne léq kedue préntah nike.”

⁴¹Sewaktu dengan-dengan Parisi masih bekumpul léq derike, Deside Isa beketuan léq ie pade,

⁴²“Napi pendapet side pade mengenai Almasih? Ie keturunan sai?” “Keturunan Daud,” jawab ie pade.

⁴³Deside Isa bemanik léq ie pade, “Lamun maraq nike, kembéq Roh Allah ngicanin Daud ilham jari nyebut Almasih nike ‘Junjungan Saq Mulie’? Séngaq Daud bebase,

⁴⁴ ‘Tuhan sampun bemanik léq Junjungan tiang: Melinggih léq sedi kanan Tiang, jangke Tiang piaq musuh-musuh Deside takluk léq Deside.’

⁴⁵Jari lamun Daud nike nyebut Almasih nike, ‘Junjungan Saq Mulie’, segerah Junjungan Saq Mulie nike keturunan Daud?”

⁴⁶Ndéq araq sopoq dengan juaq saq tao jawab Deside Isa. Dait léman jelo nike ndéq araq dengan bani metakén napi-napi léq Deside Isa.