Read KITAB SUCI ZABUR INJIL MATIUS 24 Bible Online

MATIUS 24 - KITAB SUCI ZABUR INJIL bible

MATIUS 24

¹Léq waktu Deside Isa sugul léman Gedéng Allah, pengiring-pengiring-Ne parek tipaq Ie, dait nijoqang bangunan-bangunan Gedéng Allah nike.

²Deside Isa bemanik léq ie pade, “Napi side pade serioq selapuqne nike? Tiang badaq side: Setetune ndéq araq sopoq juaq batu léq bangunan-bangunan nike saq masih beronjoq maraq béngan. Selapuqne gen terobohang.”

³Beterus Deside Isa lumbar ojok Bukit Zaitun, dait waktu Ie kenyeke melinggih, pengiring-pengiring-Ne secare husus parek tipaq Ie jari matur. Ie pade matur léq Deside Isa, “Silaq Pelungguh sampéang léq tiang pade piran selapuqne nike gen telaksane dait napi saq jari tande-tande kerauhan Pelungguh dait ahir jaman?”

⁴Jawab Deside Isa, “Pade waspade, ndaq side pade jangke tetipu.

⁵Séngaq luwéq dengan gen dateng kadu aran Tiang dait bebase, ‘Tiang niki Almasih!’ Ie pade gen miaq luwéq dengan jari sesat.

⁶Side pade gen dengah suare-suare perang dait berite-berite mengenai perang, laguq ndaq takut. Séngaq hal-hal nike harus telaksane, laguq hal nike ndéq berarti bahwe sampun wayene kiamat.

⁷Bangse saq sopoq gen perang ngelawan bangse saq lain, dait negare saq sopoq gen nyerbu negare saq lain. Léq mbé-mbé gen araq bahle kelapahan dait lindur.

⁸Selapuqne nike baruq awal penderitean sendéqman dateng jaman saq baru.

⁹ Beterus side pade gen tebau dait teserahang jari tesiksaq dait tematéq. Seantéro dunie gen meriq léq side pade séngaq side pade jari pengiring Tiang.

¹⁰Léq waktu nike, luwéq dengan gen murtat, saling hianat dait saling meriqang sopoq kance saq lain.

¹¹Luwéq gen dateng nabi-nabi palsu dait ie pade gen miaq dengan luwéq jari sesat.

¹²Kejahatan gen jari sayan luwéq jangke luwéq dengan engkah ngasihin Allah dait sepade manusie.

¹³ Laguq dengan saq tahen jangke penutuqne, gen teselametang.

¹⁴Dait Kabar Solah mengenai Kerajaan Allah gen tekabarang ojok seantéro dunie, adéq selapuq dengan dengah hal nike. Sesampun nike baruq kiamat nike dateng.”

¹⁵ “Side pade gen serioq berembé ‘Perbuatan najis saq miaq binase’, maraq saq tesampéang siq Nabi Daniel, nganjeng léq taoq saq suci (hal niki saq harus teperhatiang siq dengan saq mace).

¹⁶Léq waktu nike dengan-dengan saq araq léq Yudea harus pelai ojok pegunungan.

¹⁷ Dengan saq araq léq atas atep balé, ndaq turun ojok dalem baléne bait napi juaq.

¹⁸Dengan saq kenyeke araq léq lendangne, ndaq tulak bait jubahne.

¹⁹Celake inaq-inaq saq kenyeke betian, atao inaq-inaq saq masih penyusuq bebéaqne léq waktu nike!

²⁰Pade bedo'e adéq ndaq jangke side harus pelai léq musim telih atao léq jelo Sabat!

²¹ Léq jelo-jelo saq luwéq sengsare nike, gen araq kesusahan beléq maraq saq ndéq uwah araq léman dunie tecipteang jangke mangkin niki, dait ndéq gen araq malik.

²²Seandéne Allah nénten pesingket waktune; make ndéq araq sopoq dengan juaq saq selamet. Laguq lantaran dengan-dengan saq sampun tepiléq siq Allah nike, make Ie pesingket waktune.

²³Léq waktu nike, lamun araq dengan badaq side, ‘Pade serioq, Almasih nike araq léq deriki!’ atao ‘Ie araq léq derike!’ — ndaq gati percaye léq dengan nike.

²⁴Séngaq almasih-almasih palsu dait nabi-nabi palsu gen dateng. Ie pade gen miaq tande-tande saq luar biase dait macem-macem muqjizat jari nipu, lamun bau dengan-dengan saq sampun tepiléq siq Allah éndah.

²⁵Jari, pade inget! Tiang sampun juluan badaq hal nike léq side pade sendéqman hal nike telaksane.

²⁶ Lamun dengan bebase léq side, ‘Serioq, Ie araq léq derike léq padang gurun!’ — ndaq side pade lumbar ojok derike. Atao lamun ie pade bebase, ‘Serioq, Ie araq léq dalem kamar niki!’ — ndaq percaye.

²⁷Séngaq kerauhan Bije Manusie maraq cahaye kisap saq ngempor léman timuq jangke dateng bat.

²⁸ Léq mbé araq bangké, léq derike araq kedit saq girang ngaken bangké.”

²⁹ “Ndéq ngonéq sesampun mase kesusahan nike, sinar jelo gen jari peteng, dait bulan ndéq becahaye. Bintang-bintang gen geriq léman langit, dait selapuq kuase saq araq léq langit jari biur lantur.

³⁰ Sesampun nike, tande Bije Manusie gen penggitan léq langit. Léq waktu nike selapuq bangse léq gumi gen nangis éroq aséq. Ie pade serioq Bije Manusie rauh léq atas awan siq kuase dait kemuliean saq beléq.

³¹Terompét beléq gen tepuniqang, dait Bije Manusie gen ngutus malaékat-malaékat-Ne ngumpulang dengan-dengan saq sampun Ie piléq léman keempat penjuru gumi, dait léman poton langit saq sopoq jangke poton langit saq lain.”

³²“Pade bait perajahan léman lolo are. Lamun pémpang-pémpangne ijo dait odaq, terus mulai besuli, side pade gen nenaoq bahwe musim panas sampun rapet.

³³Maraq nike éndah lamun side pade serioq hal-hal nike telaksane, side pade nenaoq bahwe waktune sampun rapet gati.

³⁴Tiang badaq side: Setetune hal-hal nike gen telaksane sendéqman dengan-dengan saq idup mangkin niki ninggal selapuqne.

³⁵Langit dait gumi gen musnah, laguq manik Tiang gen kekel selaéq-laéqne.”

³⁶“Ndéq araq saq nenaoq piran jelone dait jamne, malaékat-malaékat léq sorge nénten wikan, Bije saq asalne léman Allah éndah nénten wikan, cume Bapa doang saq wikan.

³⁷ Lamun Bije Manusie rauh éraq, keadaanne pade maraq jaman Nuh laéq.

³⁸Léq jelo-jelo sendéqman belabur beléq nike, dengan-dengan bekelor, nginem dait merariq. Tetep maraq nike jangke waktune Nuh tame ojok dalem kapalne.

³⁹ Sewaktu ie pade selapuq tetimpe siq belabur nike, baruq ie pade sadar napi saq kenyeke ie pade alamin. Maraq nike éndah keadaanne éraq lamun Bije Manusie nike rauh.

⁴⁰Léq waktu nike, lamun araq due dengan kenyeke begawéan léq lendang: Saq sopoqne gen tejauq dait saq sopoqne malik teadéqang.

⁴¹Lamun due dengan nine kenyeke nujaq gandum: Saq sopoqne gen tejauq, dait saq sopoqne malik gen teadéqang.

⁴²Jari, pade siep sedie, séngaq side pade ndéq nenaoq piran Tuhande rauh.

⁴³ Ingetang hal niki! Lamun épén balé nenaoq jam pire léq waktu kemalem maling gen dateng, pasti ie ndéq gen mesaré adéq maling nike ndéq tame ojok baléne.

⁴⁴Keranaq nike, side pade éndah harus tetep siep sedie. Séngaq Bije Manusie gen rauh léq waktu saq side pade ndéq badéq.”

⁴⁵Deside Isa bemanik malik, “Lamun maraq nike, sai pelayan saq setie dait bijaksane, saq teangkat siq majikanne jari kepale tipaq pelayan-pelayan lain, adéq ie ngebéng ie pade bekelor léq waktune?

⁴⁶Bahagie gati pelayan saq tedait kenyeke ngelaksaneang tugasne waktu majikanne tulak.

⁴⁷Tiang badaq side: Setetune pelayan nike gen tesaduq siq majikanne jari jagaq selapuq dowéne.

⁴⁸Laguq lamun pelayan nike jahat, ie gen bebase léq dalem angenne,

⁴⁹‘Majikan tiang masih ngonéq tulak,’ terus ie mulai ngempuk pelayan-pelayan saq lain, sesampun nike ie bekelor dait nginem kance dengan-dengan saq girang bowos.

⁵⁰Beterus majikanne tulak léq jelo dait jam saq ndéq ie badéq.

⁵¹Make pelayan nike gen tesiksaq jangke maté siq majikanne, terus tetetéh ojok taoq dengan-dengan munapik. Ie pade gen nangis dait menderite léq derike.”