Read KITAB SUCI ZABUR INJIL MATIUS 25 Bible Online

MATIUS 25 - KITAB SUCI ZABUR INJIL bible

MATIUS 25

¹ “Hal Kerajaan Sorge, keadaanne maraq perumpamean niki: Sepulu dedare pengiring pengantén pade bait dilahne mésaq, beterus ie pade lumbar nyambut pengantén mame.

²Lime léq antare ie pade bodo, dait lime saq lainne bijaksane.

³Kelime dedare saq bodo nike jauq dilahne, laguq ndéq jauq cadangan minyak.

⁴Kelime dedare saq bijaksane jauq dilah dait cadangan minyak.

⁵Pengantén mame nike telat dateng, jari dedare-dedare nike ngantok terus ketindoqan.

⁶Tengaq kelem, baruq kedengahan suare dengan bekuih, ‘Pengantén mame dateng! Silaq sambut ie!’

⁷Kesepulu dedare nike ures, terus ie pade penyalaq dilahne.

⁸Dedare-dedare saq bodo nike bebase léq dedare-dedare saq bijaksane, ‘Béng tiang pade sekediq minyakde, séngaq dilah tiang pade gen pedaq.’

⁹‘Ndéq bau!’ jawab dedare-dedare saq bijaksane nike, ‘séngaq laun tiang pade éndah kurangan minyak. Solahan side lumbar ojok dagang minyak dait beli léq derike.’

¹⁰Beterus kelime dedare saq bodo nike lumbar beli minyak. Léq waktu ie pade lumbar beli minyak, pengantén mame nike dateng. Kelime dedare saq bijaksane nike tame ojok taoq gawé bareng kance pengantén mame nike, dait lawangne teimpet!

¹¹ Beterus dedare-dedare saq lainne nike dateng. Ie pade bekuih, ‘Paq! Paq! Tulung bukaqang tiang pade lawang.’

¹²Laguq jawab pengantén mame nike, ‘Tiang ndéq kenal side pade!’ ”

¹³Make Deside Isa tutuqang perumpamean nike dait bemanik, “Keranaq nike pade siep sedie, séngaq side ndéq nenaoq piran jelo dait jamne.”

¹⁴ “Hal Kerajaan Sorge nike maraq perumpamean niki: Araq sopoq majikan gen lumbar ojok negeri saq jaoq. Majikan nike ngempoh pelayan-pelayanne, terus ie pade tepercaye jagaq dowénne.

¹⁵Sebilang pelayan tebéng képéng siq majikanne menurut kemampuanne sopoq-sopoq. Pelayan saq sopoq béngne lime iyu képéng emas, sopoqne malik béngne due iyu képéng emas. Dait sopoqne malik béngne siyu képéng emas. Terus majikan nike berangkat.

¹⁶Pelayan saq nerimaq lime iyu képéng emas nike langsung lumbar bedagang, terus ie mauq bati lime iyu képéng emas malik.

¹⁷Maraq nike éndah pelayan saq nerimaq due iyu képéng emas nike, mauq bati due iyu képéng emas malik.

¹⁸Laguq pelayan saq nerimaq siyu képéng emas nike lumbar kaliq longkak léq tanaq, terus seboqne képéng majikanne léq derike.

¹⁹Ngonéq gati baruq majikanne tulak, dait mulai berékéngan kance pelayan-pelayanne.

²⁰Pelayan saq nerimaq lime iyu képéng emas nike dateng, terus ie serahang sepulu iyu képéng emas, dait bebase, ‘Paq, pelungguh ngebéng tiang lime iyu képéng emas. Mangkin silaq sereminang, tiang mauq bati lime iyu malik.’

²¹‘Bagus,’ basen majikan nike, ‘side pelayan saq bagus dait setie. Séngaq side bau tepercaye léq hal saq sekediq, tiang gen percayeang hal saq luwéqan malik léq side. Silaq tame, milu beseneng-seneng kance tiang!’

²²Terus pelayan saq nerimaq due iyu képéng emas nike dateng, dait matur, ‘Bapaq ngebéng tiang due iyu képéng emas. Mangkin silaq sereminang, tiang mauq bati due iyu malik.’

²³‘Bagus,’ basen majikan nike, ‘side pelayan saq bagus dait setie. Séngaq side bau tepercaye léq hal saq sekediq, make gen tiang percayeang léq side hal-hal saq luwéqan malik. Silaq tame, milu beseneng-seneng kance tiang!’

²⁴Beterus dateng éndah pelayan saq nerimaq siyu képéng emas nike, dait bebase, ‘Paq, tiang taoq pelungguh dengan saq kejem. Pelungguh mataq léq taoq saq nénten pelungguh sawur binéq, dait bait hasil léq taoq saq nénten pelungguh talet mésaq.

²⁵Tiang takut, jari tiang lalo seboq képéng pelungguh léq dalem tanaq. Niki képéng pelungguh nike.’

²⁶‘Side pelayan saq jahat dait mayus!’ basen majikan nike. ‘Tekan side nenaoq bahwe tiang mataq léq taoq saq ndéq uwah tiang sawur binéq, dait bait hasil léq taoq saq ndéq uwah tiang talet mésaq?

²⁷Seharusne side serahang képéng tiang nike ojok dengan saq ngelampaqang képéng, adéq léq waktu tiang tulak, tiang bau bait malik képéng tiang nike bareng réntenne.

²⁸Keranaq nike, bait képéng nike léman ie, terus béng pelayan saq bedowé sepulu iyu képéng emas nike.

²⁹ Séngaq sebilang dengan saq sampun bedowé gen teican luwéqan malik, dait ie gen bekelimpahan. Laguq dengan saq ndéq bedowé napi-napi, napi juaq saq araq léq ie gen tebait.

³⁰ Dait pelayan saq ndéq araq manpaatne nike, tetetéh ojok taoq saq peteng dedet léq luah. Léq derike ie gen nangis dait menderite!’ ”

³¹ “Lamun Bije Manusie rauh dalem kemuliean-Ne teiring siq selapuq malaékat-Ne, Ie gen melinggih léq atas tahte-Ne saq mulie.

³²Selapuq bangse gen tekumpulang léq arepan-Ne. Terus Ie gen kelin dengan-dengan nike jari due kelompoq, pade maraq pangarat saq kelin dombe kance bémbéq.

³³Dait Ie gen toloq dombe-dombe léq sedi kanan-Ne, bémbéq-bémbéq léq sedi kiri-Ne.

³⁴Beterus Raje nike gen bebase léq dengan-dengan saq léq sedi kanan-Ne, ‘Side pade saq teberkahin siq Bapa Tiang, silaq tame ojok Kerajaan saq sampun tesiepang umaq side léman dunie tecipteang.

³⁵Séngaq waktu Tiang seduk, side pade béng Tiang bekelor, dait waktu Tiang bedak, side pade béng Tiang nginem. Sewaktu Tiang jari dengan pendateng, side pade béng Tiang nyodoq léq balénde.

³⁶Sewaktu Tiang ndéq bekelambi, side pade béng Tiang kelambi. Sewaktu Tiang sakit, side pade ngerawat Tiang. Sewaktu Tiang tebui, side pade tulung Tiang.’

³⁷Beterus dengan-dengan soléh nike matur, ‘Junjungan Saq Mulie, piran tiang pade serioq Pelungguh seduk terus tiang pade aturin Pelungguh medaran? Atao tiang pade aturin nginem léq waktu Pelungguh bedak?

³⁸Piran éndah tiang pade serioq Pelungguh jari dengan pendateng, terus tiang pade aturin Pelungguh nyodoq léq balén tiang pade? Piran Pelungguh nénten bekuace, terus tiang pade aturin Pelungguh kuace?

³⁹Piran tiang pade serioq Pelungguh sungkan atao tebui, beterus tiang pade tulung Pelungguh?’

⁴⁰Raje nike gen bejawab, ‘Tiang badaq side: Setetune waktu side pade ngelaksaneang hal nike léq salaq sopoq sanak-sanak Tiang saq paling hine, artine side ngelaksaneang hal nike tipaq Tiang!’

⁴¹Beterus Raje nike gen bebase léq dengan-dengan saq araq léq sedi kiri-Ne, ‘Lalo léman té, side pade dengan-dengan saq tekutuk! Pade tame ojok dalem api saq ndéq iniq pedaq saq sampun tesiepang umaq Belis dait malaékat-malaékatne!

⁴²Séngaq sewaktu Tiang lapah, side pade ndéq béng Tiang bekelor; sewaktu Tiang bedak, side pade ndéq béng Tiang nginem.

⁴³Sewaktu Tiang jari dengan pendateng, side pade ndéq béng Tiang nyodoq léq balénde. Sewaktu Tiang ndéq bekelambi, side pade ndéq béng Tiang kelambi. Sewaktu Tiang sakit dait tebui side pade ndéq ngerawat Tiang.’

⁴⁴Beterus ie pade gen bejawab, ‘Junjungan Saq Mulie, piran tiang pade serioq Pelungguh seduk, atao bedak, atao jari dengan pendateng, atao nénten bekuace atao sungkan dait tebui? Terus tiang pade nénten tulung Pelungguh?’

⁴⁵Raje nike gen bejawab, ‘Tiang badaq side: Léq waktu side pade ndéq mélé tulung salaq sopoq dengan saq paling hine niki, artine side pade ndéq mélé tulung Tiang.’

⁴⁶ Make dengan-dengan nike gen tehukum siq hukuman saq kekel. Laguq dengan-dengan saq ngelaksaneang préntah Allah gen tame ojok dalem idup sejati dait kekel.”