Read KITAB SUCI ZABUR INJIL MATIUS 27 Bible Online

MATIUS 27 - KITAB SUCI ZABUR INJIL bible

MATIUS 27

¹Kelémaq gati, selapuq imam kepale dait pemimpin-pemimpin Yahudi sampun miaq keputusan jari nyematéq Deside Isa.

²Ie pade sékoq Deside Isa, terus jauq Ie dait nyerahang Ie ojok Pilatus, gubernur pemréntahan Roma.

³ Sewaktu Yudas penghianat nike nenaoq bahwe Deside Isa sampun tekeneang hukuman maté, ie jari nyesel. Beterus Yudas lumbar nulakang képéng perak saq telung dase nike ojok imam-imam kepale dait pemimpin-pemimpin Yahudi.

⁴Basene, “Tiang bedose sampun behianat léq dengan saq ndéq salaq jangke Ie tehukum maté!” Laguq jawab imam-imam dait pemimpin-pemimpin Yahudi nike, “Tiang pade ndéq araq urusan malik léq hal nike? Nike urusan side!”

⁵Yudas timpoh képéng nike ojok dalem Gedéng Allah. Beterus ie lumbar gantung diriqne.

⁶Imam-imam kepale ngembuq képéng nike, dait bebase, “Képéng niki képéng daraq, menurut Hukum Taurat, ndéq patut tetamaq ojok dalem taoq persembahan léq Gedéng Allah.”

⁷Beterus sesampun ie pade sepakat, ie pade kadu képéng nike jari beli tanaq saq tesebut Tanaq Tukang Keméq. Tanaq nike tekadu jari kuburan dengan-dengan pendateng.

⁸Nike lantaranne jangke jelo niki tanaq nike tesebut “Tanaq Daraq”.

⁹ Siq care nike telaksane napi saq sampun tesampéang siq Nabi Yeremia, “Ie pade nerimaq telung dase képéng perak, nike aji saq sampun tesepakatin siq bangse Israel jari bayah Ie.

¹⁰Dait képéng nike ie pade kadu jari beli Tanaq Tukang Keméq, maraq préntah Tuhan léq tiang.”

¹¹Sewaktu Deside Isa léq arepan Pilatus, gubernur negeri nike, Pilatus metakén léq Deside Isa, “Napi tetu Pelungguh raje dengan Yahudi?” “Maraq nike basen pelungguh,” jawab Deside Isa.

¹²Laguq sewaktu imam-imam kepale dait pemimpin-pemimpin Yahudi ngajuang macem-macem tuduhan léq Deside Isa, Ie nénten jawab napi-napi.

¹³Keranaq nike Pilatus bebase léq Ie, “Napi Pelungguh nénten pirengang selapuq saq ie pade tuduhang tipaq Pelungguh nike?”

¹⁴Laguq Deside Isa nénten kayun bejawab, sehingge gubernur nike bengaq gati.

¹⁵Léq sebilang Perayaan Paskah, biasene gubernur bébasang sopoq tahenan saq tepiléq siq rakyat.

¹⁶Waktu nike, araq sopoq tahenan saq kesohor lantaran pegawéanne saq jahat, aranne Isa Barabas.

¹⁷Jari, sewaktu dengan luwéq sampun bekumpul, Pilatus beketuan léq ie pade, “Silaq side pade piléq, sai saq gen tiang bébasang: Isa Barabas atao Isa saq tesebut Almasih?”

¹⁸Hal nike tesampéang siq Pilatus séngaq ie wikan bahwe penguase-penguase Yahudi nike nyerahang Deside Isa léq ie lantaran ie pade talon até.

¹⁹Waktu Pilatus kenyeke melinggih léq ruang pengadilan, sebiniqanne suruq dengan nyampéang pesen niki léq Pilatus, “Ndaq side turut campur léq pelekare dengan saq ndéq salaq nike. Séngaq lantaran Ie, tiang mauq ngimpi lengé jelo niki.”

²⁰Laguq imam-imam kepale dait pemimpin-pemimpin Yahudi nike terus ngasut dengan luwéq adéq Pilatus bébasang Barabas dait Deside Isa tehukum maté.

²¹Beterus Pilatus beketuan malik léq dengan-dengan nike, “Léman deduaqne nike, silaq side pade piléq, sai saq gen tiang bébasang?” “Barabas!” jawab ie pade.

²²“Lamun maraq nike tiang kumbéqang Deside Isa saq tesebut Almasih?” basen Pilatus léq ie pade. “Pakuq Ie léq kayuq salib!” jawab ie pade selapuq.

²³“Laguq pegawéan jahat napi saq sampun Ie piaq?” basen Pilatus. Laguq siq suare saq beléqan malik dengan-dengan nike nyurak, “Pakuq Ie léq kayuq salib!”

²⁴ Ahirne Pilatus sadar bahwe ie ndéq bau piaq napi-napi malik, malahan dengan-dengan nike mulai ngore. Jari ie bait aiq, terus léq julu dengan luwéq nike ie bisoq imene dait bebase, “Tiang ndéq tanggung jawab léq ninggalne dengan niki! Nike urusan side pade!”

²⁵Jawab selapuq dengan luwéq nike, “Enggih, alurang tiang pade dait anak-anak tiang pade saq nanggung hukuman léq ninggal-Ne!”

²⁶Beterus Pilatus bébasang Barabas, dait préntahangne dengan mecut Deside Isa. Terus nyerahang Ie adéqne tepakuq léq kayuq salib.

²⁷Beterus prajurit-prajurit Pilatus jauq Deside Isa tame ojok istane gubernur, dait selapuq pasukan nike bekumpul ngiterin Ie.

²⁸Ie pade lekaq kuace-Ne, terus kaduang Ie jubah bewarne lempok lomaq.

²⁹Ie pade piaq sopoq mahkote léman pémpang-pémpang beduwi, dait kaduangne léq sirah Deside Isa. Beterus ie pade toloq sopoq tunjang léq gading kanan-Ne, terus sujut léq arepan-Ne dait ngoloq Ie. “Idup raje dengan Yahudi!” basen ie pade.

³⁰Ie pade tijuh Deside Isa dait bait tunjang nike, terus empukangne léq sirah-Ne.

³¹Sesampun ngoloq-oloq Deside Isa, ie pade lekaq jubah lempok lomaq nike, terus kaduangne malik kuace-Ne mésaq. Beterus Ie tejauq ojok luah jari tepakuq léq kayuq salib.

³²Léq tengaq langan, ie pade bedait kance dengan léman Kirene aranne Simon. Ie pade paksaq dengan nike ngelémbah kayuq salib Deside Isa.

³³Beterus ie pade dateng léq sopoq taoq aranne Golgota, saq artine “Taoq Jerangkong”.

³⁴ Léq derike ie pade ngaturin Deside Isa nginem anggur saq sampun tecampur siq pepeduq, laguq sesampun Ie ngerasaq sekediq anggur nike, Ie nénten kayun nginem malik.

³⁵ Beterus ie pade pakuq Deside Isa léq kayuq salib dait bagi-bagiang kuace-Ne kadu undian.

³⁶Sesampun nike, ie pade tokol jagaq Deside Isa léq derike.

³⁷Léq atas sirah-Ne ie pade toloq tulisan mengenai tuduhan tipaq Ie: “Niki Isa, Raje Dengan Yahudi”.

³⁸Bareng kance Deside Isa, ie pade éndah pakuq due perampok léq kayuq salib; sopoq léq sedi kanan, sopoq malik léq sedi kiri-Ne.

³⁹ Dengan-dengan saq liwat léq derike ngintek dait menghine Deside Isa.

⁴⁰ Basen ie pade, “Hai, Side saq mélé ngerobohang Gedéng Allah terus gen penganjeng dalem telu jelo! Lamun Side tetu-tetu Bije saq asalne léman Allah, cobaq turun léman kayuq salib nike dait selametang diriq-De!”

⁴¹Maraq nike éndah imam-imam kepale dait ahli-ahli Taurat kance pemimpin-pemimpin Yahudi ngoloq Deside Isa. Ie pade bebase,

⁴²“Ie nyelametang dengan lain, laguq diriq-Ne mésaq ndéq bau Ie selametang! Lamun Ie raje Israel, cobaq mangkin Ie turun léman kayuq salib nike, baruq tiang pade mélé percaye léq Ie.

⁴³ Ie percaye léq Allah dait bebase bahwe Ie Bije saq asalne léman Allah. Nah, silaq ite serioq, napi Allah kayun nyelametang Ie mangkin.”

⁴⁴Perampok-perampok saq bareng tepakuq léq kayuq salib nike éndah milu menghine Deside Isa maraq nike.

⁴⁵Mulai jam due olas tengari, sengonéq telu jam, selapuq wilayah negeri nike jari peteng.

⁴⁶ Jam telu kebian, Deside Isa bekuih keras-keras, “Eli, Eli lama sabaktani?” saq artine, “Ya Allah Tiang, ya Allah Tiang, kembéq Deside menengang Tiang?”

⁴⁷Pire dengan saq nganjeng léq derike, dengah suare nike dait bebase, “Ie ngempoh Elia!”

⁴⁸ Beterus salaq sopoq léq antare dengan-dengan nike becat-becat lumbar bait bunge karang terus celepne ojok dalem anggur saq pedis, beterus tancepne léq pucuk gegale dait jonjongne ojok cangkem Deside Isa.

⁴⁹Laguq dengan-dengan saq lain bebase, “Antih seberaq, cobaq serioq napi Elia rauh nyelametang Ie!”

⁵⁰Beterus Deside Isa bekuih malik keras-keras, terus nyerahang nyawe-Ne.

⁵¹ Kelambu saq araq begantung léq dalem Gedéng Allah soék jari due léman atas jangke ojok bawaq. Gumi inggur dait gunung-gunung batu belaq.

⁵²Kuburan-kuburan jari kebukaq dait luwéq dengan suci saq sampun ninggal teidupang malik.

⁵³Ie pade sugul léman kuburan-kuburan sesampun Deside Isa idup léman ninggal-Ne dait ie pade tame ojok Yerusalem. Dait léq derike luwéq dengan serioq ie pade.

⁵⁴Kepale pasukan bareng kance prajurit-prajurit saq kenyeke jagaq Deside Isa jari takut gati sewaktu serioq lindur dait selapuq hal saq telaksane nike. Ie pade bebase, “Tetu Ie niki Bije saq asalne léman Allah!”

⁵⁵ Léq derike araq éndah luwéq dengan nine saq kenyeke serioq hal nike léman jaoq. Ie pade sampun ngiring Deside Isa dait nulung Deside Isa mulai léman Galilea.

⁵⁶Léq antare dengan-dengan nine nike, araq Mariam Magdalena, Mariam inaqne Yakub dait Yusup, dait inaqne bije-bije Zebedeus.

⁵⁷Léq waktu serep jelo dateng dengan sugih léman Arimatea aranne Yusup, ie éndah pengiring Deside Isa.

⁵⁸Yusup lumbar ojok Pilatus dait tunasne jenazah Deside Isa. Terus Pilatus préntah pengawalne adéqne nyerahang jenazah Deside Isa léq Yusup.

⁵⁹Make Yusup bait jenazah nike, terus bungkusne siq kain lénen alus saq putéq bersi.

⁶⁰Beterus Yusup toloq jenazah Deside Isa léq dalem makam dowéne mésaq, saq baruq tepiaq léq dalem sopoq bukit batu. Sesampun nike Yusup gelompongang sopoq batu beléq ojok lawang makam nike, terus ie lumbar.

⁶¹Mariam Magdalena dait Mariam saq lain ndot tokol andang makam nike.

⁶²Jemaq kelémaqne, léq jelo Sabat, imam-imam kepale dait dengan-dengan Parisi lumbar bareng-bareng ngadep Pilatus

⁶³ dait matur, “Bapaq, tiang pade inget waktu penipu nike masih idup, Ie sampun bebase, ‘Sesampun telu jelo Tiang gen idup malik.’

⁶⁴Keranaq nike, utus dengan jagaq makam nike pacu-pacu jangke jelo saq ketelu, adéq pengiring-pengiring-Ne ndéq bau paling jenazah-Ne terus betutur léq dengan-dengan bahwe Deside Isa idup malik léman ninggal-Ne. Dait penipuan saq penutuq niki gen lengéan malik léman saq penembéq.”

⁶⁵Basen Pilatus léq ie pade, “Niki tiang beng side pengawal-pengawal, silaq lumbar dait jagaq makam nike pacu-pacu.”

⁶⁶Beterus ie pade lumbar ojok makam, dait ségelne batu pengimpet makam nike, terus suruqne pengawal bejage léq julune.