Read KITAB SUCI ZABUR INJIL MATIUS 28 Bible Online

MATIUS 28 - KITAB SUCI ZABUR INJIL bible

MATIUS 28

¹Sesampun liwat jelo Sabat, léq jelo Ahad kelémaq aru, Mariam Magdalena dait Mariam saq lain lumbar ojok makam nike.

²Selung-selung araq lindur saq beléq gati. Sopoq malaékat Tuhan turun léman sorge alih batu pengimpet lawang makam nike dait melinggih léq atasne.

³Muen malaékat nike maraq kisap dait kelambine putéq gati.

⁴Tentere pengawal saq bejage léq derike jari takut gati jangke ie pade ngijik dait jari maraq dengan maté.

⁵Malaékat nike bebase léq dengan-dengan nine nike, “Ndaq takut! Tiang taoq side pade boyaq Deside Isa saq sampun tepakuq léq kayuq salib nike.

⁶Ie ndéq araq léq deriki. Ie sampun idup malik maraq saq sampun Ie manikang laéq. Silaq serioq taoq-Ne tesaréang.

⁷Mangkin, becat side pade lumbar, kabarang tipaq pengiring-pengiring-Ne, ‘Deside Isa sampun idup malik, dait Ie sampun senjuluq side pade lumbar ojok Galilea. Léq derike side pade gen serioq Ie!’ Ingetang napi saq sampun tiang sampéang léq side.”

⁸Sesampun nike, dengan-dengan nine nike becat-becat bilin makam nike. Siq perasaan takut awor seneng ie pade pelai ngabarang selapuq hal nike léq pengiring-pengiring Deside Isa.

⁹Selung-selung Deside Isa bedait kance ie pade, dait bemanik, “Salam umaq side pade!” Beterus ie pade ngerapetin Deside Isa terus kapong cokor-Ne dait sujut nyembah Ie.

¹⁰“Ndaq takut,” manik Deside Isa léq ie pade, “silaq side pade lumbar kabarang léq selapuq sanak Tiang adéqne lumbar ojok Galilea. Léq derike ie pade gen bedait kance Tiang.”

¹¹Sewaktu dengan-dengan nine nike lumbar, araq pengawal-pengawal saq bejage léq makam nike lumbar ojok kote, dait ngelaporang peristiwe nike léq imam-imam kepale.

¹²Imam-imam kepale nike mupakat kance pemimpin-pemimpin Yahudi, terus ie pade ngebéng luwéq képéng léq pengawal-pengawal nike,

¹³dait bepesen, “Side pade harus badaqang bahwe pengiring-pengiring Deside Isa dateng léq tengaq kelem dait paling jenazah-Ne sewaktu side pade kenyeke tindoq.

¹⁴Dait lamun gubernur pireng hal nike, tiang pade gen badaq ie adéq side pade ndéq ndait masalah.”

¹⁵Jari, pengawal-pengawal nike bait képéng nike, terus ngelaksaneang maraq saq tepesen siq imam-imam nike. Nike lantaranne cerite niki nyebar léq antare dengan-dengan Yahudi jangke jelo niki.

¹⁶ Kesolas pengiring Deside Isa nike lumbar ojok sopoq bukit léq Galilea sesuai kance manik Deside Isa tipaq ie pade.

¹⁷Sewaktu ie pade serioq Deside Isa léq derike, selapuqne sujut nyembah Ie, laguq araq léq antarene saq masih bimbang.

¹⁸Deside Isa ngerapetin ie pade, dait bemanik, “Selapuq kuase saq araq léq sorge dait léq gumi sampun teserahang léq Tiang.

¹⁹ Keranaq nike, silaq side pade lumbar ojok selapuq bangse léq dunie, dait jariang ie pade pengiring-pengiring Tiang, dait baptis ie pade léq dalem peséngan Bapa dait Bije dait Roh Suci.

²⁰Ajah ie pade taat léq selapuq saq Tiang préntahang tipaq side pade. Dait pade inget bahwe Tiang gen tetep bareng kance side pade jangke ahir jaman.”