Read KITAB SUCI ZABUR INJIL MATIUS 3 Bible Online

MATIUS 3 - KITAB SUCI ZABUR INJIL bible

MATIUS 3

¹Léq waktu nike rauh Yahya Pembaptis léq padang gurun léq Yudea dait mulai behotbah.

² “Pade tobat léman dose-dosende, séngaq Kerajaan Sorge sampun rapet!”

³ Yahya niki saq temaksut siq Nabi Yesaya sewaktu ie nyampéang niki, “Araq dengan saq bekuih-kuih léq padang gurun, ‘Pade siepang langan umaq Tuhan; dait rateang langan umaq Ie.’ ”

⁴ Yahya ngengadu jubah saq tepiaq léman bulu onte dait sabukne tepiaq léman léndong. Keloranne balang dait madulani gawah.

⁵Luwéq dengan dateng ojok Yahya, araq dengan-dengan saq dateng léman Yerusalem, léman selapuq daérah Yudea, dait léman selapuq daérah sekiter Kokoq Yordan.

⁶Ie pade ngaku dose-dosene, beterus ie pade tebaptis siq Yahya léq Kokoq Yordan.

⁷ Luwéq éndah dengan Saduki dait Parisi dateng mélé tebaptis siq Yahya. Laguq sewaktu ie serioq dengan-dengan nike dateng, Yahya bebase léq ie pade, “Hai, side dengan jahat! Sai saq badaq bahwe side bau selamet léman hukuman Allah saq gen dateng?

⁸Nyatayang siq perbuatande bahwe side sampun betobat léman dose-dosende.

⁹ Ndaq paran, bahwe side bau bebase dalem angende: Ibrahim nike bapaq tiang pade! Tiang badaq side: Léman batu-batu niki éndah Allah sanggup miaqang Ibrahim keturunan!

¹⁰ Kandik sampun tesadangang jari ngerebaq lolo jangke akah-akahne. Sebilang lolo saq ndéq ngasilang buaq saq solah, gen terebaq dait tetetéh ojok dalem api.

¹¹Tiang baptis side kadu aiq jari tande bahwe side sampun betobat léman dose-dosende. Laguq Ie saq gen rauh pungkuran léman tiang, gen baptis side kadu Roh Suci dait api. Kuase-Ne beléqan léman tiang. Jari jauq sepatu-Ne doang tiang ndéq patut.

¹²Léq gading-Ne araq kléong jari nampiq selapuq gandum-Ne jangke bersi; selapuq gandumne gen Ie kumpulang léq dalem lumbung, laguq selapuq gambasne gen Ie tunuq léq dalem api saq ndéq iniq pedaq.”

¹³Beterus Deside Isa rauh léman Galilea ojok Kokoq Yordan gen bedait kance Yahya jari tebaptis siq ie.

¹⁴Laguq Yahya berusahe nolaq napi saq Deside Isa kayunang. Yahya matur léq Deside Isa, “Tiang niki saq sepatutne tebaptis siq Pelungguh, mangkin malahan Pelungguh saq rauh ojok tiang.”

¹⁵Laguq jawab Deside Isa, “Alurang hal nike telaksane, séngaq siq care nike ite ngelaksaneang selapuq saq tekayunang siq Allah.” Beterus Yahya baptis Deside Isa.

¹⁶Sesampun tebaptis, Deside Isa sugul léman aiq kokoq nike. Selung-selung langit kebukaq, beterus Deside Isa cingakin Roh Allah turun ojok atas-Ne maraq ruen kedit dare.

¹⁷ Beterus kedengahan suare léman sorge, “Niki Bije Tiang saq Tiang kasihin, Ie nyenengang Tiang.”