Read KITAB SUCI ZABUR INJIL MATIUS 5 Bible Online

MATIUS 5 - KITAB SUCI ZABUR INJIL bible

MATIUS 5

¹Sewaktu Deside Isa cingakin dengan luwéq nike, Ie taék ojok atas bukit. Sesampun Ie melinggih, pengiring-pengiring-Ne parek ojok Ie,

²beterus Ie mulai bebaos dait ngajah ie pade:

³“Bahagie dengan saq miskin léq arepan Allah; séngaq ie pade saq dowéang Kerajaan Sorge!

⁴ Bahagie dengan saq sedih angenne; séngaq ie pade gen tehibur.

⁵ Bahagie dengan saq lemah lembut; séngaq ie pade gen dowéang gumi!

⁶ Bahagie dengan saq tetu-tetu melét ngelaksaneang kebenaran; séngaq ie pade gen tepuasang!

⁷Bahagie dengan saq murah até; séngaq ie pade gen nerimaq kemurahan!

⁸ Bahagie dengan saq suci aténe; séngaq ie pade gen serioq Allah.

⁹Bahagie dengan saq jauq damé; séngaq ie pade gen tesebut bije-bije dowén Allah!

¹⁰ Bahagie dengan saq teaniaye lantaran kebenaran, séngaq ie pade saq dowéang Kerajaan Sorge!

¹¹ Bahagie side pade, lamun lantaran Tiang side pade tecele dait teaniaye, dait tepitnah.

¹² Besukecite dait gembire, séngaq upaqde beléq léq sorge, séngaq maraq nike éndah sampun teaniaye nabi-nabi saq sendéqman side.”

¹³ “Side pade sie dunie. Lamun sie jari tawah, napi bau ie tepaéqang malik? Ndéq araq manpaatne malik, ie gen tetetéh dait teicaq-icaq siq dengan.

¹⁴ Side pade terang dunie. Kote saq araq léq atas bukit, ndéq bau teseboq.

¹⁵ Ndéq araq dengan saq nyalaqang dilah, terus kudungne dilah nike siq tepaq. Malahan ie gen toloq dilah nike léq naé dilah, adéqne bau ngebéng cahaye tipaq sebilang dengan léq dalem balé.

¹⁶ Maraq nike éndah cahayende harus besinar léq julu dengan, adéq ie pade serioq perbuatan-perbuatande saq solah, terus ie pade mulieang Bapa side léq sorge.”

¹⁷“Ndaq beranggepan bahwe Tiang dateng jari ngapus Hukum Taurat dait kitab nabi-nabi. Tiang dateng ndéqne jari ngapus hukum nike, laguq jari genepang hukum nike.

¹⁸ Setetune Tiang badaq side! Sengonéq langit dait gumi masih araq, timaq sopoq hurup atao titik saq paling kodéq léq dalem hukum nike ndéq gen teapus lamun selapuqne ndéqman telaksane!

¹⁹Keranaq nike, sai-sai saq ngelanggar salaq sopoq léman préntah-préntah nike, timaq nike bagian saq paling kodéq, dait ngajah dengan lain ngelaksaneang saq maraq nike éndah, ie gen araq léq taoq saq paling bawaq léq dalem Kerajaan Sorge. Laguq sai-sai saq taat ngelaksaneang dait ngajahang selapuq préntah-préntah Hukum Taurat, ie gen araq léq taoq saq paling atas léq dalem Kerajaan Sorge.

²⁰Make Tiang badaq side: Lamun idupde dalem beragame ndéqne solahan léman ahli-ahli Taurat atao dengan Parisi, setetune side ndéq bau tame léq dalem Kerajaan Sorge!”

²¹ “Side sampun dengah manik saq tesampéang langan leluhurte: Ndaq nyematéq; sai-sai saq nyematéq harus tehukum.

²²Laguq Tiang badaq side, sebilang dengan saq gedek léq semetonne harus tehukum; sai juaq saq bebase léq semetonne: Kapir! Harus teadilin léq julu Mahkamah Agame. Dait sai-sai saq bebase “Jahil”, harus tetetéh ojok dalem api nerake.

²³Keranaq nike, lamun side kenyeke ngaturang persembahan léq atas méje taoq kurban, terus inget bahwe araq dengan saq sakit até léq side,

²⁴side harus bilin juluq persembahande nike léq julu méje taoq kurban, terus lumbar bedamé kance dengan nike, terus tulak malik ngaturang persembahande nike.

²⁵Seandéne araq dengan ngelaporang side ojok pengadilan, usaheang juluq bedamé kance ie sengonéq side masih bareng kance ie léq tengaq langan, adéq musuhde nike ndéq nyerahang side ojok hakim, saq gen nyerahang side ojok petugas, terus petugas nike gen tamaq side ojok dalem bui.

²⁶Tiang badaq side: Setetune side ndéq gen sugul léman bui sendéqman side bayah utangde jangke lunas.”

²⁷ “Side pade nenaoq bahwe araq Manik Allah maraq niki: Ndaq bezinah.

²⁸Laguq mangkin Tiang badaq side: Sai-sai saq serioq dengan nine siq napsu birahine, artine dengan nike sampun bezinah kance dengan nine nike léq dalem angenne.

²⁹ Lamun penentengde saq kanan jari penyebap side bedose, luit dait tetéh penenteng nike! Solahan side kélangan salaq sopoq bagian léman awakde ketimbang selapuq awakde tetetéh ojok api nerake.

³⁰ Lamun ime kanande jari penyebap side bedose, peleng dait tetéh ime nike! Solahan side kélangan imende setowéq ketimbang selapuq awakde tetamaq ojok api nerake.”

³¹ “Araq éndah Manik Allah maraq niki: Sebilang dengan saq séang seninene harus ngebéng ie surat séang.

³² Laguq mangkin Tiang badaq side: Sebilang dengan saq séang seninene kecuali lantaran zinah, ie jariang seninene bezinah; dait sai saq merariq kance dengan nine saq teséang nike, ie gawéq zinah.”

³³ “Side pade sampun nenaoq éndah bahwe léman jaman leluhurte sampun araq pengajahan saq maraq niki: Ndaq besumpah palsu, laguq tegel sumpahde léq arepan Tuhan.

³⁴ Laguq mangkin Tiang badaq side: Ndaq gati side besumpah demi langit, séngaq langit nike tahte Allah,

³⁵ atao demi gumi, séngaq gumi apah cokor-Ne; atao demi Yerusalem, séngaq nike kote Raje Agung.

³⁶Ndaq éndah besumpah demi ulunde, séngaq side ndéq tao miaq bulunde jari putéq atao bideng timaq cume sopoq uwat bulu.

³⁷Lamun enggih, badaq enggih, lamun ndéq badaq ndéq. Napi saq lebih léman nike asalne léman Belis.”

³⁸ “Side pade éndah sampun nenaoq bahwe araq pengajahan maraq niki: Penenteng gentiq penenteng, gigi gentiq gigi.

³⁹Laguq mangkin Tiang badaq side: Ndaq bales dendem léq dengan saq sampun gawéq jahat léq side. Malahan, lamun dengan nempélék sangképde saq kanan, béng ie éndah nempélék sangképde saq kiri.

⁴⁰Dait lamun dengan ngelaporang side ojok hakim séngaq melétang kelambinde, béng ie éndah jubahde.

⁴¹Dait sai juaq saq paksaq side lampaq jaoqne sopoq kilométer, lampaq kance ie due kilométer.

⁴²Lamun araq dengan saq nunas léq side, béng ie. Dait ndaq nolaq dengan saq mélé nyinggaq léq side.”

⁴³ “Sampun éndah side pade nenaoq pengajahan maraq niki: Kasihin batur-baturde dait meriq léq musuh-musuhde.

⁴⁴Laguq mangkin Tiang badaq side: Kasihin musuh-musuhde dait do'eang dengan saq nganiaye side pade,

⁴⁵séngaq siq care nike side pade jari bije-bije Bapa side saq léq sorge, saq tiwoqang jelo tipaq dengan saq solah dait tipaq dengan saq jahat. Allah nurunang ujan tipaq dengan saq kenaq perbuatanne dait tipaq dengan saq jahat.

⁴⁶Séngaq lamun side ngasihin dengan saq ngasihin side doang, napi saq gen jari upaqde? Tekan penagih pajek éndah ngelaksaneang hal maraq nike.

⁴⁷Dait lamun side pade ngucapang salam cume tipaq batur-baturde doang, napi istiméwene? Dengan-dengan saq ndéq kenal Allah éndah ngelaksaneang hal nike!

⁴⁸ Keranaq nike side harus sempurne, pade maraq Bapa side léq sorge nike sempurne.”