Read KITAB SUCI ZABUR INJIL MATIUS 8 Bible Online

MATIUS 8 - KITAB SUCI ZABUR INJIL bible

MATIUS 8

¹Deside Isa turun léman bukit, dait luwéq dengan ngiring Ie.

²Léq waktu nike, dateng sopoq dengan saq sakit kuste. Ie sujut léq arepan Deside Isa, dait matur, “Paq, lamun Pelungguh kayun, Pelungguh bau nyelahang tiang.”

³Deside Isa jamah dengan nike, dait bemanik, “Tiang mélé, mangkin side selah!” Langsung waktu nike éndah penyakit dengan nike telang.

⁴ Beterus manik Deside Isa léq ie, “Inget, ndaq side tuturang hal nike léq sai-sai. Laguq silaq lumbar ojok imam, dait tunas ie pastiang bahwe side sampun selah. Sesampun nike, aturang kurban saq tepréntahang siq Musa, jari bukti léq dengan-dengan bahwe side tetu-tetu sampun selah!”

⁵Sewaktu Deside Isa tame ojok kote Kapernaum, sopoq prewire parek tipaq Deside Isa dait nunas tulung,

⁶“Paq,” atur prewire nike, “pelayan tiang sakit léq balé. Ie képaq dait tindoq léq petindoqanne dait menderite gati.”

⁷Manik Deside Isa, “Tiang gen dateng nyelahang ie.”

⁸Laguq prewire nike matur, “Paq, tiang nénten patut nerimaq Pelungguh léq balén tiang. Silaq Pelungguh manikang sopoq ucapan doang, laun pelayan tiang nike gen selah.

⁹Séngaq tiang éndah bedowé atasan dait tiang harus taat léq ie. Dait léq bawaq tiang éndah araq prajurit-prajurit saq harus taat léq préntah tiang. Lamun tiang suruq sopoq prajurit, ‘Lalo!’ ie pasti lalo. Dait lamun tiang suruq saq lain, ‘Dateng!’ ie pasti dateng; dait lamun tiang préntah pelayan tiang, ‘Laksaneang!’ pasti ie laksaneang.”

¹⁰Sesampun Deside Isa pirengang basen prewire nike, Deside Isa bengaq gati. Beterus Deside Isa bemanik léq dengan-dengan saq kenyeke ngiring Ie, “Tiang badaq side, iman sebeléq niki ndéq uwah Tiang ndait léq antare dengan Israel timaqne sopoq juaq!

¹¹ Tiang badaq side, luwéq dengan gen dateng léman Timuq dait Bat jari besukecite bareng-bareng kance Ibrahim, Ishak dait Yakub léq dalem Kerajaan Sorge.

¹² Padahal dengan-dengan Yahudi saq seharusne jari bije-bije Kerajaan gen tetetéh ojok taoq saq peteng dedet, léq derike ie pade gen nangis dait menderite.”

¹³Beterus manik Deside Isa léq prewire nike, “Silaq side uléq, napi saq side percaye nike gen telaksane.” Dait waktu nike éndah, pelayanne nike selah.

¹⁴Deside Isa lumbar ojok gedéng Petrus. Léq derike Deside Isa cingakin mentoaq nine Petrus kenyeke mesaré lantaran sakit telih panas leq petindoqane.

¹⁵Deside Isa negel imene, terus panasne telang. Beterus ie ures dait mulai ngelayanin Deside Isa.

¹⁶Léq waktu serep jelo, luwéq dengan saq tekuasein siq roh jahat tejauq ojok Deside Isa. Dait siq sopoq manik doang, Deside Isa sediq roh-roh jahat nike dait selapuq dengan saq sakit éndah teselahang.

¹⁷ Selapuqne nike telaksaneang siq Deside Isa, dait siq care nike telaksane napi saq sampun tesampéang siq Nabi Yesaya, “Ie nanggung penderiteante, dait nyelahang penyakitte.”

¹⁸Araq luwéq gati dengan léq sekelining Deside Isa. Sewaktu Deside Isa cingakin ie pade selapuqne, Deside Isa ngemanikang pengiring-Ne belayar ojok itoqan danao.

¹⁹Beterus sopoq ahli Taurat parek ojok Deside Isa, dait matur, “Paq Guru, tiang mélé ngiring Pelungguh ojok mbé juaq Pelungguh lumbar!”

²⁰Jawab Deside Isa, “Serigale bedowé loang, dait kedit bedowé kesebu, laguq Bije Manusie ndéq bedowé taoq begélaq.”

²¹Beterus sopoq pengiring-Ne saq lain éndah matur, “Junjungan Saq Mulie, ijinang tiang uléq juluq nguburang amaq tiang.”

²²Laguq jawab Deside Isa, “Silaq turut Tiang, alurang dengan-dengan ninggal nguburang dengan-dengan ninggal ie pade.”

²³Deside Isa taék ojok perau dait pengiring-pengiring-Ne milu ngiring Ie.

²⁴Selung-selung dateng angin pusut saq beléq gati ojok danao nike, sehingge perau nike teampes siq umbak. Waktu nike Deside Isa kenyeke merem.

²⁵Make pengiring-pengiring-Ne dateng ojok Deside Isa dait tangiang Ie. “Junjungan Saq Mulie! Tulung! Ite gen celake!”

²⁶“Kembéq side pade takut?” manik Deside Isa. “Side pade kurang percaye léq Tiang!” Beterus Deside Isa ngadeg, dait semprak angin dait danao nike, make danao nike jari tenang gati.

²⁷Pengiring-pengiring-Ne bengaq. Ie pade bebase sopoq kance saq lainne, “Dengan napi Deside Isa niki jangke angin dait umbak éndah taat léq Ie!”

²⁸Sesampun Deside Isa rauh léq itoqan danao, léq daérah dengan Gadara, araq due dengan saq tekuasein siq roh jahat parek ojok Deside Isa. Ie pade bahaye gati sehingge ndéq araq dengan saq bani liwat léq derike.

²⁹Ie pade sugul léman goe-goe léq kuburan dait bekuih, “Bije saq asalne léman Allah! Gen Pelungguh kumbéqang tiang niki? Napi Pelungguh gen siksaq tiang pade timaq ndéqman waktune?”

³⁰Ndéq jaoq léman derike, araq luwéq gati bawi saq kenyeke boyaq kakenan.

³¹Roh-roh jahat nike tunas léq Deside Isa, “Lamun Pelungguh gen ngemanikang tiang pade sugul léman dengan niki, préntahang tiang pade tame ojok dalem bawi-bawi nike.”

³²“Nyedi!” manik Deside Isa. Roh-roh jahat nike sugul léman kedue dengan nike, dait tame ojok bawi-bawi nike. Beterus bawi-bawi nike pelai dait nimproh léman sedin jurang ojok dalem danao, dait selapuq bawi nike maté ketelep.

³³Penjage-penjage bawi nike pelai ojok kote, nuturang selapuq peristiwe nike dait napi saq sampun telaksane léq due dengan saq tekuasein siq roh jahat nike.

³⁴Ahirne selapuq dengan léq kote nike lumbar ojok Deside Isa. Sanget siqne tunas siq ie pade adéq Deside Isa lumbar bilin daérah ie pade.