Read KITAB SUCI ZABUR INJIL MARKUS 1 Bible Online

MARKUS 1 - KITAB SUCI ZABUR INJIL bible

MARKUS 1

¹Niki awal Kabar Solah mengenai Deside Isa Almasih, Bije saq asalne léman Allah.

² Maraq saq tetulis siq Nabi Yesaya: “ ‘Serioq, Tiang ngirim utusan Tiang juluan léman Deside, ie gen nyiepang langan bagi Deside.’

³ Araq dengan saq bekuih-kuih léq padang gurun, ‘Pade siepang langan umaq Tuhan; dait rateang langan umaq Ie.’ ”

⁴Yahya dateng léq padang gurun dait nyampéang berite léman Allah. “Side pade harus tobat léman dose-dosende dait harus tebaptis, adéq Allah ngampunin side,” maraq nike basen Yahya.

⁵Selapuq dengan léman negeri Yudea dait kote Yerusalem lumbar dengahang hotbah Yahya. Ie pade ngaku dose-dose ie pade dait Yahya baptis ie pade léq Kokoq Yordan.

⁶ Yahya ngengadu jubah saq tepiaq léman bulu onte, dait sabukne tepiaq léman léndong. Keloranne balang serte madulani gawah.

⁷Yahya nyampéang berite niki, “Sesampun tiang, gen rauh Dengan saq beléqan kuase-Ne léman tiang, nunduk gen lekaq tali sepatu-Ne doang tiang ndéq patut.

⁸Tiang baptis side kadu aiq, laguq Ie gen baptis side kadu Roh Suci.”

⁹Léq waktu nike, Deside Isa rauh léman Nazaret léq daérah Galilea, dait Ie tebaptis siq Yahya léq Kokoq Yordan.

¹⁰Waktu Deside Isa sugul léman aiq, Ie cingakin langit kebukaq, dait Roh Allah turun maraq ruen kedit dare ojok atas-Ne.

¹¹ Beterus kedengahan suare léman sorge: “Side Bije Tiang saq Tiang kasihin. Side nyenengang Tiang.”

¹²Langsung sesampun nike, Roh Allah gadingang Deside Isa ojok padang gurun.

¹³Petang dase jelo Deside Isa araq léq derike tecobe siq Belis. Léq derike araq éndah binatang-binatang gamang bareng kance Deside Isa, dait malaékat-malaékat ngelayanin Ie.

¹⁴Sesampun Yahya tebui, Deside Isa lumbar ojok Galilea, dait léq derike Ie nyampéang Kabar Solah léman Allah.

¹⁵ Manik-Ne, “Kerajaan Allah sampun rapet. Pade tobat léman dose-dosende, dait pade percaye léq Kabar Solah saq léman Allah!”

¹⁶Sewaktu Deside Isa bemargi léq sedin Danao Galilea, Ie cingakin due nelayan aranne Simon dait Andreas adiqne. Ie pade kenyeke bau empaq kadu jaring léq danao nike.

¹⁷Deside Isa bemanik léq ie pade, “Silaq turut Tiang. Tiang gen jariang side pade penjaring manusie.”

¹⁸Langsung ie pade bilin jaringne terus ngiring Deside Isa.

¹⁹Deside Isa terus bemargi, dait cingakin éndah due dengan besemeton saq lain, Yakub dait Yahya, bije-bije Zebedeus. Ie pade kenyeke ngeremaq jaring léq dalem perau.

²⁰Deside Isa langsung ngemanikang ie pade. Dait ie pade bilin amaqne léq dalem perau bareng kance buruh-buruhne. Terus ie pade lumbar ngiring Deside Isa.

²¹Deside Isa dait pengiring-pengiring-Ne rauh léq kote Kapernaum. Sesampun mulai jelo Sabat, Deside Isa tame ojok balé ibadah, dait mulai ngajahang.

²² Dengan-dengan jari takjub dengahang pengajahan Deside Isa. Séngaq Ie ngajahang siq wibawe, nénten maraq ahli-ahli Taurat.

²³Léq dalem balé ibadah nike araq sopoq dengan saq tekuasein siq roh jahat. Dengan nike nyurak:

²⁴“Hai Deside Isa dengan Nazaret, napi saq gen Pelungguh piaq léq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh saq Suci léman Allah!”

²⁵Laguq Deside Isa semprak roh jahat nike, “Tedoq, sugul léman dengan niki!”

²⁶Beterus dengan nike tegerik keras-keras siq roh jahat nike, terus sugul léman dengan nike sambil nyurak-nyurak.

²⁷Selapuq dengan bengaq gati, sehingge ie pade ngeraos sopoq kance saq lain, “Napi niki? Sopoq pengajahan saq baru! Siq wibawe dait kuase, Ie mréntahang roh-roh jahat sugul, dait ie pade taat léq Ie!”

²⁸Make berite mengenai Deside Isa becat gati nyebar ojok selapuq daérah Galilea.

²⁹Deside Isa dait pengiring-pengiring-Ne bilin balé ibadah nike dait lumbar ojok gedéng Simon dait Andreas. Yakub dait Yahya éndah lumbar bareng ie pade.

³⁰Mentoaq nine Simon kenyeke mesaré lantaran sakit telih panas. Jari sewaktu Deside Isa dait pengiring-pengiring-Ne tame ojok balé nike, Ie tepajar mengenai hal nike.

³¹Beterus Deside Isa lumbar ojok mentoaq nine Simon, dait negel imene, terus tulung ie ures. Sakit telih panasne telang, dait ie mulai ngelayanin ie pade.

³²Léq waktu serep jelo, dengan-dengan jauq selapuq dengan saq sakit dait saq tekuasein siq sétan ojok Deside Isa.

³³Selapuq penduduk kote nike bekeriwung léq julu balé nike.

³⁴Beterus Deside Isa nyelahang luwéq dengan saq ngidap macem-macem penyakit, dait luwéq éndah sétan tesediq. Sétan-sétan nike ndéq teijinang ngeraos siq Deside Isa, séngaq ie pade nenaoq sai setetune Ie.

³⁵Jemaq kelémaqne, sewaktu masih subuh, Deside Isa metangi terus bilin gedéng. Ie lumbar ojok taoq saq sepi léq luah kote, dait bedo'e léq derike.

³⁶Laguq Simon dait batur-baturne lumbar boyaq Deside Isa.

³⁷Dait sesampun ie pade bedait kance Deside Isa, ie pade matur, “Selapuq dengan kenyeke boyaq Pelungguh.”

³⁸Laguq jawab Deside Isa, “Silaq ite terusang kelampante ojok kote-kote lain saq rapet léman deriki, adéq léq derike éndah Tiang nyampéang Kabar Solah, séngaq siq maksut nike Tiang dateng.”

³⁹ Beterus Deside Isa lumbar ojok mbé-mbé léq selapuq wilayah Galilea, dait nyampéang Kabar Solah léman Allah léq balé-balé ibadah dait sediq roh-roh jahat.

⁴⁰Araq sopoq dengan saq sakit kuste parek ojok Deside Isa. Dengan nike sujut dait matur, “Lamun Pelungguh kayun, Pelungguh bau nyelahang tiang.”

⁴¹Make angen Deside Isa penoq siq belas kasihan léq dengan nike. Ie jamah dengan nike sambil bemanik, “Tiang mélé, mangkin side selah!”

⁴²Langsung waktu nike éndah, penyakitne telang dait ie selah.

⁴³Terus Deside Isa manikang dengan nike lumbar siq peringetan niki,

⁴⁴ “Inget, ndaq tuturang léq sai-sai, laguq lumbar ojok imam, dait tunas adéq ie pastiang bahwe side sampun selah. Beterus lumbar ngaturang kurban maraq saq tepréntahang Musa jari bukti tipaq dengan-dengan bahwe side tetu-tetu sampun selah.”

⁴⁵Laguq dengan nike lumbar, dait tetep doang nyeriteang peristiwe nike léq mbé-mbé jangke Deside Isa nénten bau tame kote secare terang-terangan. Ie cume meneng léq luah kote léq taoq-taoq saq sepi. Laguq léman mbé-mbé dengan terus doang parek tipaq Ie.