Read KITAB SUCI ZABUR INJIL MARKUS 12 Bible Online

MARKUS 12 - KITAB SUCI ZABUR INJIL bible

MARKUS 12

¹ Beterus Deside Isa mulai bemanik kadu perumpamean léq imam-imam kepale dait ahli-ahli Taurat dait pemimpin-pemimpin Yahudi nike. Deside Isa bemanik, “Araq sopoq dengan saq nalet anggur léq kebonne. Terus ie miaq lambah léq sekelining kebon nike. Sesampun nike ie kaliq longkak jari taoqne peres anggur, terus ie penganjeng menare taoq dengan bejage. Sesampun nike séweangne kebon anggur nike léq penyakap-penyakap, beterus ie berangkat ojok negeri lain.

²Sewaktu sampun waktune musim buaq anggur, épén dowé kebon nike ngutus pelayanne tipaq penyakap-penyakap kebon nike, jari nerimaq bagianne.

³Laguq penyakap-penyakap nike bau pelayan nike. Beterus ie pade empuk pelayan nike, dait suruqne ie uléq ndéq jauq napi-napi.

⁴Épén dowé kebon nike ngutus malik pelayanne saq lain. Laguq penyakap-penyakap nike ngempuk ulu pelayan nike, terus suruqne nyedi sambil tesumpaq-senaq.

⁵Épén dowé kebon nike ngutus malik pelayanne saq lain. Laguq ie pade matéq pelayan nike. Dait maraq nike seterusne ie pade perlakuang luwéq pelayan saq lain éndah: araq saq tempuk dait araq éndah saq tematéq.

⁶Ahirne cume karing sopoq saq araq léq ie, bijene mésaq saq paling ie tunah. Jari ie ngutus bijene nike tipaq penyakap-penyakapne. Pikirne, ‘Pasti anak tiang gen tehormatin.’

⁷Laguq penyakap-penyakap nike bebase sopoq kance saq lain, ‘Niki ie ahli warisne, silaq ite matéq ie, adéq ite mauq warisanne!’

⁸Make ie pade bau ie terus tematéq. Mayitne ie pade tetéh ojok luah kebon nike.”

⁹Beterus Deside Isa beketuan, “Napi saq gen tepiaq siq épén dowé kebon nike? Pasti ie gen dateng dait nyematéq penyakap-penyakap nike, terus nyerahang kebon nike ojok penyakap-penyakap saq lain.

¹⁰ Side pade pasti sampun bace ayat niki léq Kitab Suci, ‘Batu saq tetetéh siq tukang bangunan sampun jari batu saq paling utame.

¹¹Niki karye Tuhan; sopoq karye saq ajaip léq julunte!’ ”

¹²Make pare pemimpin bangse Yahudi saq dengah perumpamean nike berusahe bau Deside Isa, séngaq ie pade nenaoq bahwe perumpamean nike tetujuang tipaq ie pade. Laguq ie pade takut léq dengan luwéq. Jari, ie pade lumbar bilin Deside Isa.

¹³Pire dengan Parisi dait anggote-anggote golongan Herodes tesuruq boyaq kesalaqan Deside Isa siq care besoal jawab adéqne bau nyalahang Deside Isa.

¹⁴Ie pade parek ojok Deside Isa dait matur, “Bapaq Guru, tiang pade nenaoq Pelungguh jujur dait nénten takut léq sai juaq. Pelungguh ngajahang secare terus terang mengenai langan saq kenaq tipaq Allah. Séngaq Pelungguh nénten piléq kasih. Silaq Pelungguh bemanik léq tiang pade, ‘Menurut aturan agamente, kanggo napi nénten bayah pajek léq kaisar? Napi pajek nike harus ite bayah atao nénten?’ ”

¹⁵Deside Isa wikan kemunapikan ie pade. Jawab-Ne, “Kembéq side pade boyaq-boyaq kesalaqan adéq bau nyalahang Tiang? Petitoqang léq Tiang sopoq képéng perak.”

¹⁶Make ie pade serahang léq Deside Isa sopoq képéng perak. Beterus Deside Isa beketuan, “Gambar dait aran sai niki?” “Kaisar,” jawab ie pade.

¹⁷“Nah, lamun maraq nike,” manik Deside Isa, “serahang ojok Kaisar napi saq jari dowén Kaisar, dait tipaq Allah napi saq jari dowén Allah.” Ie pade bengaq dengah jawaban-Ne.

¹⁸ Pire dengan léman golongan Saduki parek ojok Deside Isa. (Ie pade golongan saq bedowé pendapet bahwe dengan ninggal ndéq gen idup malik.) Ie pade metakén léq Deside Isa:

¹⁹ “Bapaq Guru, Musa nulis hukum niki tipaq ite: ‘Lamun sopoq dengan mame ninggal dait ie ndéq bedowé bije, make semetonne harus merariq kance bebalune adéq ie bau ngebéng keturunan tipaq dengan saq sampun ninggal nike.’

²⁰Sampun araq pituq dengan besemetonan. Saq sengake merariq, terus ninggal ndéq bedowé bije.

²¹Beterus saq kedue merariq kance bebalune, laguq ie éndah ninggal ndéq bedowé bije. Maraq nike éndah telaksane léq semetonne saq ketelu,

²²dait seterusne jangke saq kepituq. Ahirne dengan nine nike éndah ninggal.

²³Léq jelo dengan ninggal teidupang malik, sai semame dengan nine nike? Séngaq kepituq-pituqne sampun merariq kance ie!”

²⁴Jawab Deside Isa, “Side pade keliru gati, lantaran side pade ndéq ngerti Kitab Suci dait kuase Allah.

²⁵Séngaq lamun dengan-dengan ninggal teidupang malik, ie pade ndéq gen merariq malik, laguq ie pade gen idup maraq malaékat léq sorge.

²⁶ Dait mengenai dengan ninggal teidupang malik, napi side pade ndéq uwah bace léq dalem kitab Musa mengenai bebenes saq nyale nike? Léq dalem ayat-ayat nike tetulis bahwe Allah bemanik tipaq Musa, ‘Tiang Allahne Ibrahim, Allahne Ishak dait Allahne Yakub.’

²⁷Allah nike nénten Allah dengan ninggal, laguq Allah dengan saq idup. Side pade keliru gati!”

²⁸ Beterus dateng sopoq ahli Taurat saq pirengang bebaosan antare Deside Isa kance dengan-dengan léman golongan Saduki nike. Ahli Taurat nike serioq bahwe Deside Isa sampun jawab dengan-dengan nike secare bagus. Make ie metakén tipaq Deside Isa, “Préntah mbé saq paling utame léq antare selapuq préntah?”

²⁹ Jawab Deside Isa, “Préntah saq utame: ‘Pade dengahang, hai bangse Israel! Allah, Tuhante, Tuhan Saq Mahe Esa!

³⁰Kasihin Allah, Tuhan side siq segenep aténde, dait siq segenep jiwende dait siq segenep akal budinde dait siq selapuq kekuatande.’

³¹ Préntah kedue: ‘Kasihin sepadende manusie, maraq side ngasihin diriqde mésaq.’ Ndéq araq malik préntah lain saq pentingan léman kedue préntah nike.”

³² Beterus ahli Taurat nike matur léq Deside Isa, “Tepat gati, Bapaq Guru! Mule kenaq napi saq Pelungguh manikang: Tuhan nike Allah saq esa, dait nénten araq malik Allah saq lain.

³³ Dait manusie harus ngasihin Allah siq sepenoq angenne, dait siq selapuq akalne, dait siq selapuq kekuatanne. Dait ie éndah harus ngasihin sepade manusie maraq ie ngasihin diriqne mésaq. Nike jaoq solahan ketimbang ngaturang kurban tunuqan dait kurban-kurban saq lain tipaq Allah.”

³⁴Deside Isa cingakin bahwe ahli Taurat nike sampun bejawab secare bagus gati. Dait Deside Isa bemanik léq ie, “Side ndéq jaoq léman Kerajaan Allah.” Sesampun nike, ndéq araq sopoq dengan juaq saq bani malik metakén léq Deside Isa.

³⁵Léq waktu kenyeke ngajahang léq Gedéng Allah, Deside Isa beketuan, “Berembé ahli-ahli Taurat iniq bebase bahwe Almasih nike keturunan Daud?

³⁶ Padahal Daud mésaq -- lantaran teilhamin siq Roh Suci -- bebase, ‘Tuhan bemanik léq Junjungan tiang: Melinggih léq sedi kanan Tiang, jangke Tiang piaq musuh-musuh Deside takluk léq Deside.’

³⁷Jari, lamun Daud mésaq nyebut Almasih nike ‘Junjungan Saq Mulie’, segerah Ie keturunan Daud?” Dengan saq araq léq Gedéng Allah nike seneng dengahang pengajahan Deside Isa.

³⁸ Ie bemanik léq ie pade, “Onyaq-onyaq léq ahli-ahli Taurat. Ie pade demen lampaq-lampaq kadu jubah saq bélo dait demen tehormatin léq peken-peken.

³⁹Ie pade seneng melinggih léq kursi saq paling julu léq balé-balé ibadah, dait seneng melinggih léq taoq saq paling tehormat léq taoq dengan-dengan begawé.

⁴⁰Ie pade tipu bebalu-bebalu dait ngerampas baléne. Dait jari seboq pegawéanne saq jahat nike, ie pade bedo'e bélo-bélo. Pasti ie pade gen nerimaq hukuman saq beratan!”

⁴¹Sewaktu Deside Isa melinggih andang kotaq persembahan léq Gedéng Allah, Deside Isa perhatiang dengan-dengan namaq képéng ie pade ojok dalem kotaq nike. Luwéq dengan sugih tamaqang luwéq képéng.

⁴²Beterus sopoq bebalu saq miskin dateng éndah tamaqang due képéng tembage, képéng récéh saq paling kodéq ajine.

⁴³Make Deside Isa ngemanikang pengiring-pengiring-Ne, terus bemanik léq ie pade, “Tiang badaq side: Setetune bebalu niki namaqang ojok dalem kotaq nike luwéqan tebanding saq tetamaqang siq selapuq dengan-dengan lain.

⁴⁴Séngaq ie pade selapuq ngebéng léman kelebihan dowéne. Laguq bebalu niki, timaq miskin gati, ie ngebéng selapuq saq araq léq ie -- saq ie perluang jari biaye idup.”