Read KITAB SUCI ZABUR INJIL MARKUS 14 Bible Online

MARKUS 14 - KITAB SUCI ZABUR INJIL bible

MARKUS 14

¹ Due jelo sendéqman Jelo Paskah dait Perayaan Ruti Ndéq Beragi. Imam-imam kepale dait ahli-ahli Taurat kenyeke boyaq langan jari bau Deside Isa secare tedoq-tedoq dait nyematéq Ie.

²Ie pade bebase, “Ndaq laksaneang hal nike waktu dengan-dengan kenyeke ngerayeang Paskah, adéq rakyat ndéq jari biur lantur.”

³ Sewaktu Deside Isa araq léq Betania, léq gedéng Simon saq piranan sakit kuste, araq sopoq dengan nine parek tipaq Deside Isa. Ie jauq sopoq botol pualam berisi minyak sengéh saq mahel, tepiaq léman ramuan akah saq sengéh. Sewaktu Deside Isa kenyeke melinggih medaran, dengan nine nike belaqang botol nike dait tumpahangne minyak sengéh nike léq sirah Deside Isa.

⁴Pire dengan saq araq léq derike jari sili dait bebase sopoq kance saq lain, “Napi manpaatne minyak sengéh nike tesédaq-édaq?

⁵Minyak nike bau tejual siq aji lebih léman telu ratus képéng perak, dait képéngne tesedekahang tipaq dengan miskin!” Make ie pade sili léq dengan nine nike.

⁶Laguq Deside Isa bemanik, “Alurang ie! Kembéq side pade nyusahang ie? Ie ngelaksaneang hal saq solah tipaq Tiang.

⁷ Dengan miskin tetep araq léq antare side pade. Sebilang waktu lamun side pade mélé, side pade bau nulung ie pade. Laguq Tiang ndéq seterusne araq bareng kance side pade.

⁸Dengan nine niki sampun ngelaksaneang napi saq bau ie laksaneang. Awak Tiang sampun ie minyakin sebagé persiepan jari pemakaman Tiang.

⁹Tiang badaq side: Setetune léq seantéro dunie, léq mbé juaq Kabar Solah léman Allah tesiarang, perbuatan dengan nine niki gen teceriteang éndah jari nginget ie.”

¹⁰Beterus Yudas Iskariot, salaq sopoq léman kedue olas pengiring Deside Isa, lumbar ojok imam-imam kepale siq maksut jari nyerahang Deside Isa tipaq ie pade.

¹¹Ie pade seneng gati pireng maksut nike, dait bejanji gen ngebéng Yudas képéng. Sesampun nike Yudas mulai boyaq kesempatan jari behianat léq Deside Isa.

¹²Léq jelo penembéq Perayaan Ruti Ndéq Beragi -- léq waktu dengan sembeléh dombe Paskah -- pengiring-pengiring Deside Isa metakén léq Ie, “Junjungan Saq Mulie, léq mbé Pelungguh kayun adéq tiang pade siepang Pelungguh keloran Paskah?”

¹³Make Deside Isa ngemanikang due dengan léman ie pade, “Silaq lumbar ojok kote, léq derike araq sopoq dengan mame saq kenyeke jauq cérét berisi aiq gen bedait kance side pade. Turut ie

¹⁴ojok balé saq ie tamein, dait badaq épén balé nike, ‘Manik Guru tiang, léq mbé Ie dait pengiring-pengiring-Ne gen medaran keloran Paskah?’

¹⁵Dengan nike gen petitoq side sopoq kamar beléq saq araq léq atas. Kamar nike sampun tesiepang lengkap kance perabotanne. Siepang ite selapuqne léq derike.”

¹⁶Terus kedue pengiring Deside Isa nike lumbar ojok kote. Léq derike ie pade ndait selapuqne tepat maraq saq temanikang siq Deside Isa. Beterus ie pade nyiepang keloran Paskah.

¹⁷Kelemne, Deside Isa rauh teiring kedue olas pengiring-Ne.

¹⁸ Sewaktu ie pade kenyeke melinggih medaran, Deside Isa bemanik, “Tiang badaq side: Setetune salaq sopoq léq antare side pade, saq mangkin niki milu medaran kance Tiang, gen behianat léq Tiang.”

¹⁹Sesampun dengah hal nike pengiring-pengiring Deside Isa jari aséq gati. Terus sopoq-sopoq mulai metakén léq Deside Isa, “Junjungan Saq Mulie, pasti ndéqne tiang saq temaksut nike?”

²⁰Jawab Deside Isa, “Ie salaq sopoq léman side pade saq due olas niki, saq medaran sepiring kance Tiang.

²¹Mule Bije Manusie gen ninggal maraq saq tetulis léq Kitab Suci. Laguq celake gati dengan saq behianat léq Bije Manusie nike! Solahan lamun dengan nike ndéq tebijeang!”

²²Sewaktu Deside Isa dait pengiring-pengiring-Ne kenyeke medaran, Deside Isa bait ruti, terus ngucapang do'e syukur. Beterus Ie peleng-peleng ruti nike kadu gading-Ne, terus ngicanin tipaq pengiring-pengiring-Ne, sambil bemanik, “Silaq bait, niki ragen Tiang.”

²³Sesampun nike Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike léq pengiring-pengiring-Ne. Beterus ie pade selapuq nginem anggur nike.

²⁴ Sesampun nike, Deside Isa bemanik, “Niki daraq Tiang saq ngesahang perjanjian Allah, daraq saq tetumpahang tipaq dengan luwéq.

²⁵Tiang badaq side, setetune Tiang ndéq gen nginem anggur niki malik, jangke dateng waktune Tiang nginem anggur saq baru bareng kance side pade léq Kerajaan Allah.”

²⁶Beterus ie pade nyanyiang lagu pujian. Dait sesampun nike ie pade lumbar ojok Bukit Zaitun.

²⁷ Beterus Deside Isa bemanik léq ie pade, “Side selapuq gen pelai bilin Tiang. Séngaq dalem Kitab Suci tetulis, ‘Tiang gen nyematéq pengaratne, dait selapuq dombe-dombene gen bekelin sopoq kance saq lain.’

²⁸ Laguq sesampun Tiang idup malik, Tiang gen senjuluq side pade ojok Galilea.”

²⁹“Nénten,” jawab Petrus, “timaq ie pade selapuq bilin Pelungguh, tiang nénten.”

³⁰Manik Deside Isa léq ie, “Tiang badaq side, setetune kelem niki éndah, sendéqman manuk ngungkung due kali, side sampun telu kali nilas Tiang.”

³¹Jawab Petrus secare teges, “Timaq tiang harus maté bareng kance Pelungguh, tiang nénten gen nilas Pelungguh!” Dait pengiring-pengiring saq lain éndah matur maraq nike.

³²Ie pade rauh léq sopoq taoq aranne Getsemani, dait Deside Isa bemanik léq pengiring-pengiring-Ne, “Tokol léq deriki, sewaktu Tiang bedo'e.”

³³Beterus Deside Isa ténaq Petrus, Yakub dait Yahya lumbar bareng kance Ie. Deside Isa takut gati dait osah.

³⁴Deside Isa bemanik léq pengiring-pengiring-Ne nike, “Angen Tiang sedih gati, idapne maraq gen maté doang. Ndot léq deriki dait bejage-jage!”

³⁵Deside Isa lumbar jaoqan sekediq, beterus sujut léq tanaq dait bedo'e. Léq dalem do'e-Ne, Ie tunas lamun bau Ie sampunang ngalamin waktu penderitean nike.

³⁶Ie matur, “Bapa, ya Bapa, nénten araq sopoq hal saq mustahil bagi Deside. Jaoqang cawan penderitean niki léman Tiang. Laguq sampunang menurut keméléq Tiang, laguq pekayunan Bapa.”

³⁷Sesampun nike, Deside Isa tulak dait-Ne pengiring-pengiring-Ne kenyeke tindoq. Ie bemanik léq Petrus, “Simon, napi side tindoq? Cume sejam doang, side ndéq sanggup bejage-jage?”

³⁸Terus Deside Isa bemanik léq ie pade, “Bejage-jage, dait bedo'e, adéq side pade ndéq ngalamin cobe. Mule roh side mélé ngelaksaneang saq kenaq, laguq side pade ndéq sanggup séngaq awakde nike lemah.”

³⁹Karing sekali Deside Isa lumbar bedo'e, ngucapang do'e saq pade.

⁴⁰Sesampun nike Ie tulak malik tipaq pengiring-pengiring-Ne, dait-Ne ie pade masih tindoq, séngaq ie pade ngantok gati. Jari ie pade ndéq nenaoq napi saq harus ie pade sampéang tipaq Deside Isa.

⁴¹Sewaktu Deside Isa tulak tipaq ie pade saq ketelu kaline, Ie bemanik, “Napi side pade masih tindoq dait mentelah? Sampun cukup! Sampun waktune Bije Manusie teserahang ojok ime dengan-dengan bedose.

⁴²Pade ures! Silaq ite lumbar. Serioq! Dengan saq behianat léq Tiang sampun dateng!”

⁴³Sewaktu Deside Isa masih bebaos, Yudas salaq sopoq léman kedue olas pengiring-Ne nike dateng. Bareng kance ie dateng éndah serombongan dengan saq jauq kléwang dait gegitik. Ie pade tesuruq siq imam-imam kepale, ahli-ahli Taurat dait pemimpin-pemimpin Yahudi.

⁴⁴Penghianat nike sendéqmanne sampun badaq tande niki tipaq ie pade, “Dengan saq tiang siduk, Ie uwah denganne. Bau dait onyaq-onyaq jauq Ie.”

⁴⁵Léq waktu Yudas dateng, ie langsung ojok Deside Isa, dait matur, “Bapaq Guru!” terus ie siduk Deside Isa.

⁴⁶Beterus dengan-dengan saq dateng bareng kance Yudas nike bau Deside Isa dait sékoq Ie.

⁴⁷Laguq salaq sopoq dengan saq araq léq derike serét kléwangne, dait ngerantek pelayan Imam Agung jangke pegat kentokne.

⁴⁸Beterus Deside Isa bemanik tipaq ie pade, “Napi Tiang niki perampok, jangke side pade dateng jauq kléwang dait gegitik jari bau Tiang?

⁴⁹ Sebilang jelo Tiang ngajahang léq Gedéng Allah léq julu side pade dait side pade ndéq bau Tiang. Laguq mule seharusne maraq nike adéqne telaksane napi saq tetulis dalem Kitab Suci.”

⁵⁰Beterus selapuq pengiring-Ne pelai bilin Ie.

⁵¹Sopoq terune saq cume ngadu kéréng lénen jari ngilipang awakne, ngiring Deside Isa. Dengan-dengan mélé bau ie,

⁵²laguq ie lekaq kéréngne nike terus pelai belondan.

⁵³Deside Isa tejauq ojok gedéng Imam Agung. Léq derike selapuq imam kepale, pemimpin Yahudi dait ahli Taurat kenyeke bekumpul.

⁵⁴Petrus ngiring Deside Isa léman jaoq jangke tame ojok dalem leléah gedéng Imam Agung. Léq derike ie tokol sambil mindu dékét api bareng kance pengawal-pengawal.

⁵⁵Imam-imam kepale dait selapuq Mahkamah Agame berusahe boyaq bukti-bukti saq nyalahang Deside Isa adéqne bau mutusang hukuman maté tipaq Ie. Laguq ie pade ndéq mauq bukti.

⁵⁶Luwéq saksi saq tempoh jari ngebéng kesaksian palsu tipaq Deside Isa, laguq kesaksianne betentangan sopoq kance saq lain.

⁵⁷Beterus araq pire saksi nganjeng dait ngebéng kesaksian palsu niki mengenai Deside Isa,

⁵⁸ “Tiang pade dengah dengan niki bebase, ‘Tiang gen ngerobohang Gedéng Allah niki saq tepiaq siq manusie, terus dalem telu jelo, Tiang gen penganjeng saq lain saq ndéq tepiaq siq manusie.’ ”

⁵⁹Laguq kesaksian dengan-dengan nike éndah betentangan sopoq kance saq lain.

⁶⁰Beterus Imam Agung nganjeng léq julu ie pade selapuq dait metakén léq Deside Isa, “Pelungguh kayun jawab napi saq tetuduhang nike atao nénten?”

⁶¹Laguq Deside Isa meneng doang. Ie nénten bejawab same sekali. Beterus karing sekali Imam Agung nike metakén léq Ie, “Napi Pelungguh Almasih, Bije saq asalne léman Saq Maheagung nike?”

⁶² Jawab Deside Isa, “Tiang niki Ie, dait selapuq side pade gen serioq Bije Manusie melinggih léq sedi kanan Allah Saq Mahekuase dait rauh dalem awan léman langit!”

⁶³Sesampun nike Imam Agung ngeroék-roék kuacene, dait bebase, “Ndéq perlu saksi malik!

⁶⁴ Side pade sampun dengah mésaq ucapan-ucapan-Ne saq menghine Allah. Mangkin napi keputusande?” Ie pade selapuq mutusang Deside Isa patut tehukum maté.

⁶⁵Beterus pire dengan mulai tijuh Deside Isa, dait ie pade tungkem penjarupan-Ne dait ngempuk Ie, terus bebase, “Cobaq badéq, sai saq ngempuk Side?” Pengawal-pengawal éndah milu ngempuk Deside Isa.

⁶⁶Sewaktu Petrus masih araq léq leléah, salaq sopoq pelayan nine Imam Agung dateng ojok derike.

⁶⁷Waktu ie serioq Petrus mindu léq dékét api, ie perhatiang pacu-pacu muen Petrus, dait bebase, “Ndéq napi side éndah bareng-bareng kance Deside Isa dengan Nazaret nike?”

⁶⁸Laguq Petrus nilas. “Mindah tiang dait tiang ndéq ngerti napi maksut side,” basen Petrus léq pelayan nike. Beterus Petrus lumbar ojok jebak gedéng imam agung nike. [Léq waktu nike, manuk ngungkung.]

⁶⁹Pelayan nine nike serioq Petrus malik, dait bebase éndah tipaq dengan-dengan léq derike, “Ie mule salaq sopoq léman ie pade!”

⁷⁰Laguq Petrus nilas malik. Ndéq ngonéq sesampun nike, dengan-dengan léq derike bebase éndah tipaq Petrus, “Ndéq bau tetilas malik side mule salaq sopoq dengan léman ie pade, séngaq side léman Galilea!”

⁷¹Beterus Petrus mulai besumpah-sumpah, dait bebase, “Tiang ndéq kenal dengan saq side pade maksut nike!”

⁷²Waktu nike éndah manuk ngungkung saq kedue kaline. Dait Petrus inget bahwe Deside Isa sampun bemanik léq ie, “Sendéqman manuk ngungkung due kali, side telu kali nilas Tiang.” Beterus Petrus nangis éroq aséq.