Read KITAB SUCI ZABUR INJIL MARKUS 2 Bible Online

MARKUS 2 - KITAB SUCI ZABUR INJIL bible

MARKUS 2

¹Pire jelo sesampun nike Deside Isa tulak ojok Kapernaum, make nyebar kabar bahwe Ie kenyeke léq gedéng.

²Beterus luwéq dengan dateng bekeriwung léq derike jangke ndéq araq taoq malik. Léq lawang éndah sampun penoq siq dengan. Beterus Deside Isa nyampéang Manik Allah tipaq ie pade.

³Sewaktu Ie kenyeke bebaos, empat dengan jauq sopoq dengan képaq tipaq Deside Isa.

⁴Laguq lantaran luwéq gati dengan, ie pade ndéq bau jauq ojok dékét Deside Isa. Make ie pade bungkar atep tepat léq atas taoq Deside Isa. Sesampun nike ie pade turunang dengan képaq nike bareng kance tipahne.

⁵Waktu Deside Isa cingakin beléq gati iman ie pade, Ie bemanik léq dengan képaq nike, “Anak Tiang, dose-dosende sampun teampunin.”

⁶Ahli-ahli Taurat saq kenyeke melinggih léq derike mulai beketuan léq dalem angenne,

⁷“Bani gati dengan niki bebase maraq nike! Ie menghine Allah. Sai saq bau ngampunin dose selain Allah?”

⁸Léq waktu nike éndah Deside Isa wikan pikiran ie pade. Terus Ie bemanik, “Kembéq side pade beketuan maraq nike léq dalem angende?

⁹Mbé saq molahan: ngucapang, ‘Dosende sampun teampunin’, atao ngucapang, ‘Ures, angkat tipahde dait lampaq’?

¹⁰Laguq adéq side pade nenaoq bahwe léq dunie niki Bije Manusie bedowé kuase ngampunin dose.” Beterus, Deside Isa bemanik léq dengan képaq nike,

¹¹“Ures, angkat tipahde dait uléq!”

¹²Dengan képaq nike ures, langsung bait tipahne terus sugul tesaksiang siq ie pade selapuq. Dengan-dengan nike takjub, terus melieang Allah, ie pade bebase, “Ite ndéq uwah serioq peristiwe maraq niki!”

¹³Deside Isa tulak malik ojok sedin Danao Galilea. Luwéq dengan parek tipaq Ie, dait Deside Isa ngajah ie pade.

¹⁴Sewaktu Deside Isa bemargi léq derike, Ie cingakin sopoq penagih pajek, aranne Lewi bije Alpeus, kenyekene tokol léq taoqne begawéan. Deside Isa bemanik léq ie, “Silaq turut Tiang!” Terus Lewi nganjeng dait ngiring Deside Isa.

¹⁵Sewaktu Deside Isa kenyeke medaran léq gedéng Lewi, luwéq dateng penagih pajek dait dengan-dengan bedose, milu medaran bareng Deside Isa dait pengiring-pengiring-Ne. Séngaq luwéq léq antare ie pade saq ngiring Deside Isa.

¹⁶Araq ahli-ahli Taurat léman golongan Parisi serioq Deside Isa bareng medaran kance penagih-penagih pajek dait dengan-dengan bedose. Jari ie pade beketuan léq pengiring-pengiring Deside Isa, “Kembéq gurunde teiring medaran siq penagih-penagih pajek dait dengan-dengan bedose nike?”

¹⁷Deside Isa pirengang napi saq teketuanang siq ie pade, terus Deside Isa bejawab, “Dengan saq séhat ndéq merluang tabib, cume dengan saq sakit doang. Tiang dateng ndéqne jari ngempoh dengan-dengan saq nganggep diriqne sampun kenaq, laguq dengan-dengan saq bedose.”

¹⁸Léq sopoq waktu pengiring-pengiring Yahya dait dengan-dengan Parisi kenyeke puase. Terus araq dengan parek tipaq Deside Isa dait metakén, “Kembéq pengiring-pengiring Yahya dait pengiring-pengiring dengan Parisi puase, laguq pengiring-pengiring Pelungguh nénten?”

¹⁹Jawab Deside Isa léq ie pade, “Segerah temué-temué pade puase lamun pengantén mame masih araq bareng ie pade? Sengonéq pengantén mame masih araq bareng ie pade, pasti ie pade ndéq puase.

²⁰Laguq gen dateng waktune pengantén mame nike tebait léman ie pade. Léq waktu nike baruq ie pade puase.

²¹Ndéq araq dengan saq nampel kelambi saq sampun lotoh kadu bakal saq masih baru. Séngaq bakal saq jari penampel nike gen keset dait ngeroékang kelambi nike sehingge gen miaq kelambi nike sayan beléq roékne.

²²Maraq nike éndah ndéq araq dengan saq ngisiq aiq anggur saq baru léq dalem kantong léndong saq lebung. Séngaq aiq anggur saq baru nike gen miaq kantong nike bedah sehingge deduaqne tetetéh. Anggur saq baru harus teisiq léq dalem kantong saq baru éndah!”

²³ Léq sopoq jelo, waktu nike jelo Sabat, Deside Isa kance pengiring-pengiring-Ne bemargi léq lendang gandum. Sambil bemargi pengiring-pengiring-Ne pade bau gandum.

²⁴Beterus dengan-dengan Parisi matur léq Deside Isa, “Kembéq pengiring-pengiring Pelungguh piaq hal saq ndéq kanggo telaksaneang léq jelo Sabat?”

²⁵ Jawab Deside Isa, “Napi side ndéq uwah bace napi saq telaksaneang siq Daud sewaktu Abyatar kenyeke betugas jari Imam Agung. Léq waktu Daud dait dengan-dengan saq ngiring ie lapah dait ie pade ndéq bedowé keloran, ie tame ojok Gedéng Allah, dait kelorang ruti saq sampun teaturang tipaq Allah. Dait ruti nike éndah béngne tipaq dengan-dengan saq ngiring ie. Padahal menurut agamente, imam-imam doang saq kanggo ngelorang ruti nike.”

²⁷Beterus Deside Isa bemanik malik, “Jelo Sabat tepiaq umaq manusie; ndéqne manusie umaq jelo Sabat.

²⁸Jari, Bije Manusie nike éndah Penguase jelo Sabat.”