Read KITAB SUCI ZABUR INJIL MARKUS 3 Bible Online

MARKUS 3 - KITAB SUCI ZABUR INJIL bible

MARKUS 3

¹Deside Isa tulak malik ojok balé ibadah. Léq derike araq sopoq dengan saq imene maté setowéq.

²Léq derike araq dengan-dengan saq mélé boyaq kesalaqan Deside Isa adéqne bau ngelaporang Ie. Jari, ie pade terus merhatiang Deside Isa, napi Ie gen nyelahang dengan léq jelo Sabat.

³Deside Isa bemanik léq dengan saq imene maté setowéq nike, “Silaq nganjeng léq deriki, léq julu.”

⁴Beterus Deside Isa beketuan léq dengan-dengan saq araq léq derike, “Menurut agamente, napi saq kanggo ite laksaneang léq jelo Sabat? Laksaneang hal saq solah atao saq jahat? Nyelametang dengan atao nyematéq?” Ie pade tedoq doang.

⁵Siq menggah Deside Isa cingakin sekelining-Ne, laguq Deside Isa éndah sedih séngaq ie pade pagah gati. Beterus Ie bemanik léq dengan nike, “Ulurang imende.” Dengan nike ngulurang imene, dait imene selah.

⁶Make dengan-dengan Parisi bilin balé ibadah nike, terus nyerepek berunding kance pire dengan anggote golongan Herodes jari nyematéq Deside Isa.

⁷Beterus Deside Isa dait pengiring-pengiring-Ne nyingkir ojok Danao Galilea. Luwéq gati dengan léman Galilea saq lumbar ngiring Deside Isa. Luwéq éndah saq dateng léman Yudea,

⁸léman Yerusalem, léman daérah Idumea, dait léman daérah léq bagian timuq Kokoq Yordan, dait léman sekiter kote-kote léq Tirus dait Sidon. Ie pade selapuq parek ojok Deside Isa, séngaq ie pade dengah mengenai hal-hal saq sampun telaksaneang siq Deside Isa.

⁹ Dengan-dengan nike luwéq gati, sehingge Deside Isa ngemanikang pengiring-pengiring-Ne siepang Ie perau, adéq Ie nénten tedesek siq dengan-dengan nike.

¹⁰Luwéq gati dengan teselahang siq Deside Isa, sehingge selapuq dengan sakit bedesek-desekan berusahe ngerapetin Deside Isa adéqne bau jamah Ie.

¹¹Sewaktu serioq Deside Isa, roh-roh jahat nike terus doang sujut léq arepan-Ne dait bekuih, “Pelungguh Bije saq asalne léman Allah!”

¹²Laguq roh-roh jahat nike tebalaq siq Deside Isa badaqang sai setetune Ie.

¹³Beterus Deside Isa taék ojok sopoq bukit. Ie ngemanikang dengan-dengan saq Ie kayunang dait dengan-dengan nike parek.

¹⁴Deside Isa piléq due olas dengan léq antare ie pade, dait bemanik, “Tiang piléq side pade, adéq side pade turut Tiang, adéq Tiang utus side pade jari nyebarang Kabar Solah léman Allah,

¹⁵dait side pade gen mauq kuase jari sediq sétan.”

¹⁶Niki aran kedue olas dengan nike: Simon (saq Ie sebut éndah Petrus),

¹⁷Yakub dait Yahya semetonne, ie pade bije-bije Zebedeus (ie pade niki tearanin siq Deside Isa Boanerges, artine “Anak guntur”),

¹⁸Andreas, Pilipus, Bartolomeus, Matius, Tomas, Yakub bije Alpeus, Tadeus, Simon dengan Zelot,

¹⁹dait Yudas Iskariot saq behianat léq Deside Isa.

²⁰Beterus Deside Isa tame ojok sopoq gedéng. Laguq dengan luwéq dateng malik bekumpul, jangke Deside Isa dait pengiring-pengiring-Ne ndéq araq waktu medaran.

²¹Sewaktu keluarge-Ne dengah hal nike, ie pade lumbar jari bait Deside Isa, séngaq dengan-dengan bebase, “Ie sampun jogang!”

²² Ahli-ahli Taurat saq dateng léman Yerusalem nimbal, “Ie tekuasein siq Beelzebul, dait siq kuase léman datune sétan Ie sediq sétan-sétan nike.”

²³Make Deside Isa ngemanikang dengan luwéq nike, dait bemanik kadu perumpamean-perumpamean léq ie pade. “Segerah Belis sediq Belis,” manik Deside Isa.

²⁴“Lamun sopoq negare araq golongan-golongan saq saling bemusuhan negare nike ndéq gen kuat.

²⁵Dait lamun dalem sopoq keluarge ndéq araq persatuan dait anggote-anggotene saling bemusuhan, keluarge nike gen ancur.

²⁶Lamun Belis ngelawan diriqne mésaq dait saling bemusuhan, ie ndéq bau tahen ngonéq, dait pasti gen musnah.

²⁷Ndéq araq sopoq dengan juaq saq bau tame ojok balé dengan saq kuat dait mélé ngerampas dowéne lamun ie ndéq juluan sékoq dengan saq kuat nike. Sesampun nike baruq ie bau ngerampas dowéne.

²⁸Tiang badaq side: Setetune selapuq dose dait penghinean manusie gen teampunin, seluwéq napi juaq penghinean saq ie pade ucapang.

²⁹ Laguq lamun ie menghine Roh Suci, ie ndéq bau teampunin! Séngaq penghinean nike dose saq kekel!” (

³⁰Deside Isa bemanik maraq nike séngaq araq dengan saq bebase bahwe Ie tekuasein siq roh jahat.)

³¹Sesampun nike, mamiq bini dait sanak-sanak Deside Isa rauh. Ie pade nganjeng léq luah, dait suruqne dengan ngempoh Deside Isa.

³²Waktu nike luwéq dengan kenyeke tokol léq sekelining Deside Isa. Ie pade matur léq Deside Isa, “Silaq cingakin, mamiq bini dait sanak-sanak Pelungguh araq léq luah. Ie pade boyaq Pelungguh.”

³³Jawab Deside Isa, “Sai mamiq bini Tiang? Sai sanak-sanak Tiang?”

³⁴Terus Deside Isa perhatiang dengan-dengan saq tokol léq sekelining-Ne terus bemanik, “Niki inaq dait semeton Tiang!

³⁵Dengan saq ngelaksaneang pekayunan Allah, ie saq jari semeton mame dait semeton nine serte inaq Tiang!”