Read KITAB SUCI ZABUR INJIL MARKUS 4 Bible Online

MARKUS 4 - KITAB SUCI ZABUR INJIL bible

MARKUS 4

¹ Deside Isa mulai malik ngajahang léq sedin danao. Luwéq gati dengan bekumpul léq sekelining-Ne. Keranaq nike Ie lumbar melinggih léq dalem sopoq perau léq atas aiq, dait dengan luwéq nike nganjeng léq sedin danao.

²Beterus Deside Isa ngajahang luwéq hal tipaq ie pade kadu perumpamean. Maraq niki Deside Isa ngajah ie pade.

³“Pade dengahang! Araq sopoq dengan lumbar sawur binéq.

⁴Sewaktu ie kenyeke sawur binéq nike, araq binéq saq geriq léq langan. Beterus dateng kedit ngaken binéq nike jangke bis.

⁵Araq éndah saq geriq léq taoq saq bebatu-batu saq tanaqne sekediq. Binéq-binéq nike becat tiwoq séngaq tanaqne sekediq,

⁶laguq sesampun panjeng jelo, suli-suli nike mulai layu beterus gero dait maté séngaq ndéq berakah.

⁷Araq éndah binéq saq geriq léq tengaq bebenes beduwi. Bebenes nike sayan beléq, dait gepit suli-suli nike sehingge ndéq bebuaq.

⁸Laguq araq éndah binéq saq geriq léq tanaq saq subur. Binéq nike tiwoq, terus jari beléq dait bebuaq, araq saq telung dase, araq saq enem dase, dait araq saq satus kali lipet.”

⁹Sesampun nyeriteang perumpamean nike, Deside Isa bemanik, “Sai-sai bedowé kentok jari dedengah, harus ie dengahang!”

¹⁰Sewaktu Deside Isa kenyeke mésaq-mésaq, pire dengan saq sampun dengah perumpamean nike parek tipaq Ie bareng kance kedue olas pengiring-Ne. Ie pade tunas adéq Deside Isa ngartiang perumpamean nike.

¹¹Make Deside Isa bemanik léq ie pade, “Side pade sampun teicanin jari nenaoq rahasie Kerajaan Allah. Laguq dengan-dengan luah teajah kadu perumpamean,

¹² adéq: ‘Timaq ie pade serioq laguq ndéq paham, timaq ie pade dengah laguq ie pade ndéq ngerti, adéq ie pade ndéq tobat dait Allah ngampunin ie pade.’ ”

¹³Beterus Deside Isa bemanik léq ie pade, “Lamun side pade ndéq ngerti perumpamean nike, berembé side pade bau ngerti perumpamean-perumpamean saq lain?

¹⁴Dengan saq sawur binéq nike dengan saq nyampéang Manik Allah.

¹⁵Binéq saq geriq léq langan ibarat dengan-dengan saq dengah Manik Allah. Sesampun dengah, dateng Belis dait bait napi saq sampun tesawur léq dalem até ie pade.

¹⁶Binéq saq geriq léq taoq saq bebatu-batu ibarat dengan-dengan saq dengah Manik Allah nike, dait langsung nerimaq siq seneng angenne.

¹⁷Laguq Manik Allah nike ndéq berakah léq até ie pade, sehingge ndéq tahen ngonéq. Sewaktu ie pade mauq penyusah atao penganiayean lantaran Manik Allah nike, ie pade langsung murtat.

¹⁸Binéq saq geriq léq tengaq bebenes saq beduwi nike ibarat dengan-dengan saq dengah Manik Allah nike,

¹⁹laguq kuatir mengenai idup ie pade dait melét idup méwah. Segale macem napsu tame ojok dalem até ie pade. Keranaq nike Manik Allah tegepit léq dalem aténe sehingge ndéq bebuaq.

²⁰Dait binéq saq geriq léq tanaq saq subur ibarat dengan-dengan saq dengah Manik Allah nike, dait nerimaq, ie pade bebuaq luwéq, araq saq telung dase, araq saq enem dase dait araq saq satus kali lipet hasilne.”

²¹ Selanjutne manik Deside Isa, “Dengan jauq dilah ndéqne jari tetoloq léq bawaq tepaq atao léq bawaq lasah, laguq adéq tetoloq léq atas naén dilah.

²² Ndéq araq saq teseboq, saq ndéq gen penggitan; dait ndéq araq saq terahasieang saq ndéq gen tebungkar.

²³Keranaq nike, lamun bedowé kentok, pade dengahang!”

²⁴ Beterus Deside Isa bemanik malik, “Perhatiang napi saq side pade dengah niki! Ukuran saq side pade kadu léq dengan lain, nike éndah gen tekadu siq Allah léq side pade -- malahan luwéqan malik.

²⁵ Séngaq dengan saq sampun bedowé, gen teican luwéqan malik; laguq dengan saq ndéq bedowé napi-napi, make napi juaq saq araq léq ie gen tebait.”

²⁶Deside Isa ngelanjutang penuturan-Ne, “Maraq niki halne Kerajaan Allah nike, keadaanne bau teumpameang maraq dengan saq sawur binéq léq lendangne.

²⁷Léq kekelem atao kenjelo, sewaktu ie tindoq atao ngase, binéq-binéq nike tiwoq dait sayan beléq. Laguq berembé entane binéq-binéq nike tiwoq dait jari sayan beléq dengan nike ndéq nenaoq.

²⁸Tanaq nike mésaq saq nyugulang hasil: Penembéq pémpangne, beterus motékne, terus buaqne.

²⁹ Dait lamun gandum nike sampun toaq, dengan nike éndah saq penembéq ngawis séngaq sampun wayene tepataq.”

³⁰Deside Isa beketuan, “Napi saq gen ite kadu bandingang Kerajaan Allah nike? Conto napi saq bau ite kadu jari jelasang ie?

³¹Kerajaan Allah setetune maraq perumpamean niki: Araq sopoq dengan bait sopoq tolang sawi, terus tesawur léq tanaq. Tolang sawi nike binéq saq paling kodéq léq dunie.

³²Laguq lamun sampun tiwoq, ie jari saq paling beléq léq antare selapuq tetaletan. Pémpang-pémpangne benes gati bau taoq kedit-kedit miaq kesebu léq dalemne.”

³³Maraq nike Deside Isa nyampéang Manik Allah kadu luwéq perumpamean, sesuai kance pengertian ie pade.

³⁴Deside Isa kereng kadu perumpamean lamun Ie ngajah dengan-dengan nike. Laguq lamun Ie kance pengiring-pengiring-Ne doang, Deside Isa jelasang selapuqne tipaq ie pade.

³⁵Léq kebian nike éndah, Deside Isa bemanik léq pengiring-pengiring-Ne, “Silaq ite belayar ojok itoqan danao.”

³⁶Make Deside Isa taék ojok perau, dait pengiring-pengiring-Ne bilin dengan luwéq léq sedin danao, terus taék ojok perau saq pade. Perau-perau lain éndah araq léq derike. Beterus Deside Isa dait pengiring-pengiring-Ne mulai belayar.

³⁷Ndéq ngonéq sesampun nike, dateng angin pusut. Umbak beléq mulai ngamuk dait tame ojok dalem sehingge perau nike gen penoq siq aiq.

³⁸Léq waktu nike Deside Isa kenyeke merem léq bagian mudi perau nike. Pengiring-pengiring-Ne tangiang Deside Isa. Ie pade matur, “Paq Guru! Napi Pelungguh nénten peduli, lamun ite celake?”

³⁹Deside Isa metangi, terus semprak-Ne angin nike dait bemanik léq danao nike, “Engkah, tenang!” Langsung angin nike telang dait danao nike jari tenang gati.

⁴⁰Beterus Deside Isa bemanik léq pengiring-pengiring-Ne, “Kembéq side pade takut? Kembéq side pade ndéq percaye?”

⁴¹Make ie pade jari takut, dait bebase sopoq kance saq lainne, “Sai setetune dengan niki jangke angin dait umbak éndah taat léq Ie.”