Read KITAB SUCI ZABUR INJIL MARKUS 7 Bible Online

MARKUS 7 - KITAB SUCI ZABUR INJIL bible

MARKUS 7

¹Sekelompoq dengan Parisi dait pire ahli-ahli Taurat léman Yerusalem, parek ojok Deside Isa.

²Ie pade serioq pengiring-pengiring Deside Isa bekelor kadu ime saq ndéq bersi secare agame, ndéq bisoq imene juluq, menurut aturan agame.

³Dengan-dengan Parisi, maraq nike éndah selapuq dengan Yahudi, taat gati léq adat istiadat leluhur ie pade. Ie pade ndéq gen bekelor sendéqman bisoq ime maraq saq sampun tetentuang.

⁴Lamun uléq léman peken, ie pade éndah ndéq bekelor lamun ndéq persiq diriqne juluq. Luwéq warisan lain malik saq ie pade tegel, umpamene hal bisoq jembung, cérét dait pekakas-pekakas tembage.

⁵Keranaq nike dengan-dengan Parisi dait ahli-ahli Taurat nike metakén léq Deside Isa, “Kembéq pengiring-pengiring Pelungguh nénten idup menurut adat istiadat leluhurte, laguq bekelor kadu ime saq najis?”

⁶ Jawab Deside Isa, “Side pade dengan-dengan munapik! Tepat gati napi saq tenubuatang siq Nabi Yesaya, mengenai side pade, ‘Maraq niki Manik Allah, Dengan-dengan nike nyembah Tiang cume siq ucapan doang, laguq aténe jaoq léman Tiang.

⁷Percume ie pade nyembah Tiang, séngaq aturan manusie ie pade ajahang, maraqne hal nike aturan Tiang!’

⁸Préntah-préntah Allah side pade ndéq perhatiang, dait aturan-aturan manusie side pade tegel pacu-pacu.”

⁹Beterus Deside Isa bemanik malik, “Side pade ceket gati nolaq préntah Allah adéq side pade bau pertahenang ajahande mésaq.

¹⁰ Musa sampun ngicanin préntah niki, ‘Pade hormatin amaq dait inaqde!’ dait ‘Sai-sai saq nyumpaq amaqne atao inaqne, harus tehukum maté.’

¹¹Laguq side pade ngajahang: Lamun dengan bebase léq amaqne atao léq inaqne, ‘Napi saq seharusne tiang béng léq inaq dait amaq tiang, sampun tiang aturang tipaq Allah,’

¹²make side pade bébasang dengan nike léman kewajibanne nulung amaqne atau inaqne.

¹³Jari, lantaran adat istiadat leluhurde, side pade nyatayang Manik Allah ndéq berlaku. Dait masih luwéq hal-hal maraq niki saq side pade laksaneang.”

¹⁴Beterus Deside Isa ngemanikang malik dengan luwéq nike, dait bemanik léq ie pade, “Pade dengahang adéq side pade ngerti!

¹⁵Ndéq araq napi juaq léman luah saq tame ojok dalem dengan saq bau piaq dengan nike jari najis. Sebalikne saq sugul léman sopoq dengan, nike saq piaq ie najis. [

¹⁶Lamun bedowé kentok jari dengah harus dengahang.]”

¹⁷Sewaktu Deside Isa bilin dengan luwéq nike, dait tame ojok gedéng, pengiring-pengiring-Ne metakén léq Ie mengenai maksut perumpamean nike.

¹⁸Make Deside Isa bemanik léq ie pade, “Napi side pade ndéqman ngerti éndah? Napi side pade ndéq iniq ngerti bahwe saq tame ojok dalem sopoq dengan ndéq bau piaq dengan nike najis?

¹⁹Séngaq saq tame nike ndéq liwat até, laguq liwat tian, beterus sugul malik.” Siq ucapan-ucapan nike Deside Isa nyatayang bahwe selapuq keloran halal.

²⁰Beterus Deside Isa bemanik malik, “Saq sugul léman dengan, hal nike saq piaq ie najis.

²¹Séngaq léman dalem até dengan, timbul pikiran-pikiran jahat saq jari penyebap dengan gawéq perbuatan saq cabul, memaling, nyematéq,

²²bezinah, nipu, pitnah, dait gawéq hal-hal saq jahat, serakah, licik, talon até, sombong dait sengke teajah.

²³Selapuq saq jahat nike dateng léman dalem, dait hal nike saq piaq dengan najis.”

²⁴Beterus Deside Isa bilin taoq nike, dait lumbar ojok daérah Tirus. Ie tame ojok sopoq gedéng dait nénten kayun tewikanang siq dengan bahwe Ie araq léq derike. Laguq Ie nénten bau ngerahasieang kerauhan-Ne.

²⁵Malahan, sopoq inaq saq bije ninene tekuasein siq roh jahat, dengah mengenai Deside Isa. Ie parek ojok Deside Isa dait sujut léq arepan-Ne.

²⁶Dengan nine nike dengan Yunani bangse Siro-Penisia. Ie tunas tipaq Deside Isa jari sediq roh jahat nike léman bijene.

²⁷Deside Isa bemanik léq dengan nine nike, “Kanak-kanak harus tebéng bekelor juluan. Ndéqne patut bait keloran kanak-kanak terus tesaut tipaq acong.”

²⁸“Mule tetu, Junjungan Saq Mulie,” jawab dengan nine nike, “acong-acong léq bawaq méje éndah ngaken salo-salo saq tegeriqang siq kanak-kanak!”

²⁹Beterus Deside Isa bemanik léq ie, “Lantaran jawabande nike, silaq side uléq; roh jahat sampun sugul léman bijende!”

³⁰Dengan nine nike uléq. Léq balé, daitne bijene kenyeke tindoq léq lasahne, dait sétan tetu-tetu sampun sugul léman kanak nike.

³¹Beterus Deside Isa bilin daérah Tirus, dait nerusang pemargian-Ne langan Sidon ojok Danao Galilea, léq tengaq-tengaq Dekapolis.

³²Léq derike dengan-dengan jauq sopoq dengan kedok dait pakoq ojok Deside Isa. Ie pade tunas léq Deside Isa adéq Ie noloq gading-Ne léq atas dengan nike.

³³Deside Isa gadingang dengan nike, pekelin ie léman dengan luwéq beterus noloq ranggot-Ne ojok dalem kedue kentok dengan nike, terus Deside Isa beludah, dait jamah élaq dengan nike.

³⁴Sesampun nike, Deside Isa nengadah andang langit sambil bebangsel dait bemanik tipaq dengan nike, “Epata!” artine, “Kebukaqan!”

³⁵Kentok dengan nike kebukaq dait élaqne jari lemes, dait ie mulai tao ngeraos.

³⁶Beterus Deside Isa balaq ie pade selapuq adéq ndaq nyeriteang hal nike léq sai-sai. Laguq sayan tebalaq siq Deside Isa, ie pade sayan nyebarang ie.

³⁷Dait selapuq dengan saq dengah hal nike bengaq gati. Ie pade bebase, “Selapuqne Ie laksaneang secare bagus! Malahan Ie piaq dengan kedok iniq dedengah dait dengan pakoq tao ngeraos!”