Read KITAB SUCI ZABUR INJIL MARKUS 8 Bible Online

MARKUS 8 - KITAB SUCI ZABUR INJIL bible

MARKUS 8

¹Ndéq ngonéq sesampun nike, araq malik sekelompoq dengan luwéq dateng bekumpul. Séngaq ie pade ndéq bedowé keloran, Deside Isa ngemanikang pengiring-pengiring-Ne dait bemanik,

²“Tiang periak léq dengan luwéq niki. Sampun telu jelo ngonéqne ie pade turut Tiang, dait mangkin ie pade ndéq bedowé keloran.

³Lamun Tiang suruq ie pade uléq kenyeke lapah, ie pade gen paleng léq tengaq langan, séngaq araq léq antare ie pade saq dateng léman jaoq.”

⁴Jawab pengiring-pengiring Deside Isa, “Léq taoq saq kesempil niki, léq mbé dengan mauq keloran saq cukup jari selapuq dengan niki?”

⁵Deside Isa beketuan léq ie pade, “Araq pire ruti léq side pade?” “Pituq,” jawab ie pade.

⁶Make Deside Isa manikang dengan luwéq nike tokol léq tanaq. Terus Ie bait kepituq ruti nike dait ngucap syukur tipaq Allah. Sesampun nike, Deside Isa peleng-peleng ruti nike kadu gading-Ne dait icanin-Ne tipaq pengiring-pengiring-Ne jari tebagi-bagiang ojok dengan-dengan. Make pengiring-pengiring-Ne ngelaksaneang hal nike.

⁷Ie pade éndah bedowé pire empaq kodéq. Deside Isa bait empaq-empaq nike dait ngucap syukur tipaq Allah, terus ngemanikang pengiring-pengiring-Ne bagi-bagiang empaq-empaq nike éndah.

⁸Ie pade bekelor jangke besuh -- araq kire-kire empat iyu dengan saq bekelor. Beterus pengiring-pengiring Deside Isa ngumpulang salo keloran -- araq pituq bakaq penoq. Beterus Deside Isa manikang dengan-dengan nike uléq,

¹⁰dait Ie kance pengiring-pengiring-Ne langsung taék perau dait lumbar ojok daérah Dalmanuta.

¹¹ Dengan-dengan Parisi parek ojok Deside Isa, dait mulai besoal jawab kance Ie jari boyaq kesalaqan adéq ie pade bau nyalahang Deside Isa. Ie pade tunas Deside Isa piaq tande ajaip léman sorge.

¹² Deside Isa ngeluh léq dalem até-Ne terus bejawab, “Kembéq dengan-dengan jaman niki tunas Tiang piaq tande? Tiang badaq side, ie pade ndéq gen teican tande napi-napi!”

¹³Beterus Deside Isa bilin ie pade, dait taék ojok perau; beterus berangkat ojok itoqan danao nike.

¹⁴Pengiring-pengiring Deside Isa lupaq jauq ruti. Ie pade cume bedowé sopoq ruti léq perau.

¹⁵ Deside Isa peringet ie pade, “Onyaq-onyaq siq ragi ruti dengan-dengan Parisi dait ragi Herodes.”

¹⁶Make pengiring-pengiring Deside Isa nike mulai ngeraosang hal nike. Ie pade bebase, “Ie bemanik maraq nike, séngaq ite ndéq bedowé ruti.”

¹⁷Deside Isa wikan napi saq ie pade raosang. Keranaq nike Ie beketuan léq ie pade, “Kembéq side pade ngeraosang mengenai ndéq bedowé ruti? Napi side pade ndéqman nenaoq dait ndéqman ngerti éndah? Napi pikirande sampun kongol gati?

¹⁸ Side pade bedowé penenteng -- kembéq ndéq serioq? Side pade bedowé kentok -- kembéq ndéq dengah? Napi side pade ndéq inget malik,

¹⁹lime ruti nike saq Tiang peleng-peleng jari lime iyu dengan? Pire bakaq penoq salo keloran saq side pade kumpulang?” “Due olas bakaq,” jawab ie pade.

²⁰Deside Isa beketuan malik, “Dait waktu Tiang peleng-peleng pituq ruti jari empat iyu dengan, pire bakaq salo keloran saq side pade kumpulang?” “Pituq,” jawab ie pade.

²¹“Nah, napi side pade ndéqman ngerti éndah?” manik Deside Isa malik.

²²Ie pade rauh léq Betsaida. Léq derike sopoq dengan jauq dengan bute tipaq Deside Isa, dait tunas adéq Ie jamah dengan bute nike jari nyelahang ie.

²³Beterus Deside Isa tegel ime dengan bute nike dait ie tedéndén siq Deside Isa ojok luah dése nike. Terus Deside Isa beludah léq penenteng dengan nike, dait noloq gading-Ne léq penenteng dengan bute nike, terus beketuan léq ie, “Napi araq saq side serioq?”

²⁴Dengan nike serioq ojok julu, terus matur, “Enggih. Tiang serioq dengan lampaq-lampaq; laguq ie pade penggitan maraq lolo.”

²⁵Deside Isa noloq malik gading-Ne léq penenteng dengan nike. Mangkin niki dengan nike tetu-tetu nyerioq. Penentengne selah dait ie pedas serioq selapuqne.

²⁶Beterus Deside Isa bemanik léq ie, “Uléq, dait ndaq tame ojok kampung nike malik.”

²⁷Deside Isa dait pengiring-pengiring-Ne lumbar ojok dése-dése léq sekiter Kaisarea Pilipi. Léq tengaq langan Deside Isa beketuan léq ie pade, “Menurut basen dengan, sai Tiang niki?”

²⁸ Jawab ie pade, “Araq saq bebase: Yahya Pembaptis. Araq éndah saq bebase Elia, saq lain malik bebase: salaq sopoq nabi.”

²⁹ “Laguq menurut side pade mésaq, Tiang niki sai?” Deside Isa beketuan. Jawab Petrus, “Pelungguh Almasih!”

³⁰Beterus Deside Isa bemanik léq pengiring-pengiring-Ne, “Ndaq gati badaqang hal nike léq sai-sai.”

³¹Sesampun nike, Deside Isa mulai ngajah pengiring-pengiring-Ne bahwe Bije Manusie harus luwéq menderite, dait tetentang siq pemimpin-pemimpin, imam-imam kepale, dait ahli-ahli Taurat. Ie gen tematéq, laguq léq jelo saq ketelu Ie gen idup malik.

³²Secare jelas gati Deside Isa nyeriteang hal nike tipaq pengiring-pengiring-Ne. Make Petrus ngantuq Deside Isa ojok lempéng dait peringet Ie.

³³Laguq Deside Isa cingakin dait merhatiang pengiring-pengiring-Ne, terus menggah léq Petrus, “Lalo léman té, Belis! Pikirande pikiran manusie, ndéqne pikiran Allah!”

³⁴ Beterus Deside Isa ngemanikang dengan luwéq saq araq léq derike bareng kance pengiring-pengiring-Ne. Beterus Ie bemanik léq ie pade, “Sebilang dengan saq mélé turut Tiang, ie harus ngelupaqang kepentinganne mésaq, ngelémbah salibne, dait tetep turut Tiang.

³⁵ Séngaq dengan saq mélé nyelametang nyawene, gen kélangan nyawene. Laguq dengan saq kélangan nyawene lantaran Tiang dait demi Kabar Solah léman Allah, dengan nike gen nyelametang nyawene.

³⁶Napi untungne léq sopoq dengan, lamun seantéro dunie niki jari dowéne, laguq ie kélangan nyawene?

³⁷Napi araq saq bau tekadu siq dengan jari tukah nyawene?

³⁸Lamun dengan ilaq ngakuq Tiang dait manik Tiang léq jaman durhake dait jahat niki, Bije Manusie éndah gen ilaq ngakuq dengan nike, léq waktu Ie rauh éraq dalem kemuliean Bapa-Ne, teiring malaékat-malaékat saq suci.”