Read KITAB SUCI ZABUR INJIL MARKUS 9 Bible Online

MARKUS 9 - KITAB SUCI ZABUR INJIL bible

MARKUS 9

¹Deside Isa bemanik malik tipaq ie pade, “Tiang badaq side pade: Setetune léq antare side pade saq araq léq deriki araq saq ndéq gen ninggal, sendéqman serioq Kerajaan Allah rauh siq kuase!”

² Enem jelo sesampun nike, Deside Isa gadingang Petrus, Yakub dait Yahya, nyendiri ojok sopoq gunung saq atas. Beterus Deside Isa begentiq rue léq julun ie pade.

³Kuace-Ne jari putéq ngempor. Ndéq araq sopoq dengan tukang popoq léq dunie niki saq tao mopoq putéqne maraq nike.

⁴Beterus ketelu pengiring-Ne nike serioq Deside Isa kenyeke bebaos kance Elia dait Musa.

⁵Make Petrus matur tipaq Deside Isa, “Paq Guru, maiq gati ite léq deriki. Silaq tiang pade penganjeng telu kémah, sopoq umaq Pelungguh, sopoqne Musa dait sopoqne malik umaq Elia.”

⁶Setetune Petrus ndéq nenaoq napi saq harus ie ucapang, séngaq ie kance kedue baturne kenyeke takut gati.

⁷ Beterus awan turun léq atas ie pade, dait léman awan nike kedengahan suare, “Niki Bije Tiang saq Tiang kasihin. Pade dengahang Ie!”

⁸Becat-becat ie pade serioq sekelining ie pade, dait ndéq araq malik serioq sai-sai léq derike bareng ie pade, kecuali Deside Isa.

⁹Sewaktu ie pade turun léman gunung nike, ie pade teperinget siq Deside Isa, “Ndaq tuturang léq sai juaq napi saq side pade serioq nike, sendéqman Bije Manusie idup malik léman ninggal-Ne.”

¹⁰Ie pade taat léq pesen nike, laguq léq antare ie pade mésaq mulai ngeraosang napi maksut Deside Isa, “Idup malik léman ninggal-Ne”.

¹¹ Make ie pade metakén léq Deside Isa, “Kembéq ahli-ahli Taurat bebase bahwe Elia harus rauh juluan?”

¹²Jawab Deside Isa, “Mule tetu Elia gen dateng juluan dait ie gen siepang selapuqne. Laguq berembé halne siq Bije Manusie? Kembéq léq dalem Kitab Suci tetulis bahwe Ie gen luwéq menderite dait tehine siq dengan?

¹³Laguq Tiang badaq side: Elia sampun dateng, dait dengan-dengan perlakuang ie semélé angen ie pade. Nike sesuai kance saq sampun tetulis dalem Kitab Suci mengenai diriqne.”

¹⁴Sewaktu Deside Isa dait ketelu pengiring-Ne sampun araq malik bareng pengiring-pengiring saq lainne, ie pade serioq luwéq dengan léq derike. Araq ahli-ahli Taurat kenyeke besoal jawab kance pengiring-pengiring Deside Isa.

¹⁵Sewaktu dengan-dengan nike serioq Deside Isa, ie pade kemomotan, terus pelai nyambut Ie.

¹⁶“Napi saq side pade masalahang kance ahli-ahli Taurat nike?” Deside Isa beketuan léq pengiring-pengiring-Ne.

¹⁷Jawab salaq sopoq léman dengan luwéq nike, “Bapaq Guru, tiang jauq anak tiang tipaq Pelungguh. Ie tekuasein siq roh jahat saq miaq ie jari pakoq.

¹⁸Lamun roh nike nyerang ie, awakne tetimpak-timpak ojok tanaq, biwihne bekowok, gigine bekeretek dait selapuq awakne jari kojor. Tiang tunas pengiring-pengiring Pelungguh sediq roh jahat nike, laguq ie pade ndéq tao.”

¹⁹Make Deside Isa bemanik tipaq ie pade, “Luar biase side pade niki! Side pade tetu-tetu dengan saq ndéq percaye. Jangke piran Tiang harus araq kance side pade dait sabar tipaq side pade? Jauq kanak nike ojok deriki!”

²⁰Beterus ie pade jauq kanak nike ojok Deside Isa. Waktu roh jahat nike serioq Deside Isa, ie piaq awak kanak nike kojor-kojor sehingge kanak nike geriq begoloq-goloq léq tanaq. Biwihne bekowok.

²¹Terus Deside Isa beketuan léq amaq kanak nike, “Sampun pire ngonéq ie maraq niki?” “Léman ie masih kodéq!” jawab amaqne.

²²“Rimpes gati roh jahat nike berusahe nyematéq ie siq care geriqang ie ojok dalem api atao ojok dalem aiq. Keranaq nike lamun Pelungguh bau nulung, tulung tiang pade dait periak léq tiang pade!”

²³“Napi basende? Lamun Pelungguh bau?” jawab Deside Isa. “Ndéq araq saq mustahil umaq dengan saq percaye!”

²⁴Langsung amaq kanak nike bejawab siq suare saq beléq, “Tiang percaye! Laguq iman tiang kurang. Tulung tiang adéq tiang lebih percaye malik!”

²⁵Sewaktu Deside Isa cingakin dengan luwéq mulai dateng bekerimpun léq derike, Ie préntahang roh jahat nike. Manik-Ne, “Roh pakoq dait kedok, Tiang préntahang sugul léman kanak niki dait ndaq gati tame malik ojok dalemne.”

²⁶Roh jahat nike nyurak, dait awak kanak nike kojor-kojor, beterus sugul léman kanak nike. Kanak nike penggitan maraq mayit sehingge selapuq dengan bebase, “Ie sampun milinang!”

²⁷Laguq Deside Isa negel imene dait tulung ie ures. Beterus kanak nike ures.

²⁸Sesampun Deside Isa léq gedéng, pengiring-pengiring-Ne secare husus parek dait metakén, “Kembéq tiang pade ndéq bau sediq roh jahat nike?”

²⁹Jawab Deside Isa, “Roh jahat saq maraq niki cume bau tesediq siq do'e.”

³⁰Deside Isa dait pengiring-pengiring-Ne bilin taoq nike, dait lanjutang pemargian-Ne langan Galilea. Ie nénten kayun araq dengan saq nenaoq hal nike;

³¹séngaq Ie kenyeke ngajah pengiring-pengiring-Ne. Deside Isa bemanik tipaq pengiring-pengiring-Ne, “Bije Manusie gen teserahang tipaq kuase manusie dait Ie gen tematéq, laguq léq jelo ketelu Ie gen idup malik!”

³²Pengiring-pengiring Deside Isa ndéq ngerti napi arti manik Deside Isa nike, laguq ie pade takut nakénang hal nike léq Deside Isa.

³³Deside Isa dait pengiring-pengiring-Ne rauh léq Kapernaum. Sesampun léq gedéng, Deside Isa beketuan léq pengiring-pengiring-Ne, “Napi saq side pade raosang léq tengaq langan onéq?”

³⁴ Ie pade ndéq bejawab, séngaq léq tengaq langan ie pade betungkasan mengenai sai saq paling beléq léq antare ie pade.

³⁵ Deside Isa melinggih, beterus ngemanikang kedue olas pengiring-Ne nike. Ie bemanik léq ie pade, “Dengan saq mélé jari saq penembéq, ie harus jari saq penutuq dait harus jari pelayan selapuq dengan.”

³⁶Beterus Deside Isa bait sopoq kanak kodéq, dait penganjeng-Ne kanak nike léq julu ie pade selapuq. Deside Isa kapong kanak nike dait bemanik léq pengiring-pengiring-Ne,

³⁷ “Dengan saq nerimaq sopoq kanak maraq niki lantaran Tiang, artine nerimaq Tiang. Dait dengan saq nerimaq Tiang, ie ndéq nerimaq Tiang doang, laguq nerimaq éndah Ie saq ngutus Tiang.”

³⁸Beterus Yahya matur léq Deside Isa, “Paq Guru, tiang pade serioq dengan sediq roh jahat siq peséngan Pelungguh. Terus tiang pade balaq ie séngaq ie ndéq léman kelompoq ite.”

³⁹Laguq jawab Deside Isa, “Ndaq balaq ie, séngaq ndéq araq sopoq dengan juaq saq miaq keajaipan siq aran Tiang, léq waktu nike éndah ngucapang hal saq lengé tipaq Tiang.

⁴⁰ Séngaq dengan saq ndéq ngelawan ite, artine bepihak léq ite.

⁴¹ Pade inget! Dengan saq ngebéng nginem tipaq side lantaran side pade pengiring Almasih, ie pasti gen nerimaq upaqne.”

⁴²“Sai-sai saq jari penyebap salaq sopoq léman kanak-kanak kodéq saq percaye léq Tiang niki bedose, solahan lamun batu penggilingan tetaliq léq belongne, dait ie tetetéh ojok dalem segare.

⁴³ Lamun imende miaq side bedose, peleng ime nike! Solahan side ndéq bedowé ime setowéq laguq idup bareng kance Allah, ketimbang bedowé due ime, laguq tetetéh ojok api nerake saq kekel. [

⁴⁴Léq derike api ndéq iniq pedaq, dait ulet ndéq iniq maté.]

⁴⁵Dait lamun naénde miaq side bedose, peleng naé nike. Solahan side ndéq bedowé naé setowéq laguq side idup bareng kance Allah, ketimbang bedowé due naé, laguq tetetéh ojok dalem api nerake. [

⁴⁶Léq derike api ndéq iniq pedaq dait ulet ndéq iniq maté.]

⁴⁷ Lamun penentengde miaq side bedose, luit penentengde! Solahan side tame Kerajaan Allah bedowé sopoq penenteng, ketimbang side dait kedue penentengde tetetéh ojok dalem api nerake.

⁴⁸ Léq derike api ndéq iniq pedaq dait ulet ndéq iniq maté.

⁴⁹Sebilang dengan gen tesiaq siq api.

⁵⁰ Sie nike solah, laguq lamun jari tawah, napi bau tepaéqang malik? Jari, side pade harus jari maraq sie dait -- idup damé sopoq kance saq lain.”