Read KITAB SUCI ZABUR INJIL LUKAS 1 Bible Online

LUKAS 1 - KITAB SUCI ZABUR INJIL bible

LUKAS 1

¹Teopilus saq budiman, Luwéq dengan sampun berusahe nulis secare teratur peristiwe-peristiwe saq sampun telaksane léq tengaq-tengaq ite.

²Ie pade nulis sesuai maraq saq tesampéang tipaq ite siq dengan-dengan saq serioq mésaq peristiwe-peristiwe nike léman penembéq dait sesampun nike nyiarang kabarne.

³Sesampun tiang selidik secare teliti selapuqne nike léman penembéqne, tiang anggep solah jari nulis sopoq laporan saq teratur umaq side.

⁴Tiang ngelaksaneang nike, adéq side nenaoq bahwe napi saq sampun teajahang tipaq side mule kenaq.

⁵ Sewaktu Herodes jari raje negeri Yudea, araq sopoq imam aranne Zakaria. Ie termasuk golongan imam-imam Abia. Sebiniqanne éndah asalne léman keturunan Harun, aranne Elisabet.

⁶Kehidupan senine-semame nike nyenengang Allah. Deduaqne taat léq selapuq préntah dait hukum-hukum Tuhan secare sempurne.

⁷Ie pade ndéq bedowé bije séngaq Elisabet bangkol dait deduaqne sampun lingsir.

⁸Léq sopoq jelo, sewaktu golongan Abia mauq giliran, Zakaria ngelaksaneang tugas sebagé imam léq arepan Allah.

⁹Siq undian, saq biasene telaksaneang siq imam-imam, Zakaria tetugasang tame ojok dalem Gedéng Allah dait tunuq menyan.

¹⁰Léq waktu upacare tunuq menyan telaksaneang, dengan luwéq bedo'e léq luah.

¹¹Léq waktu nike malaékat Tuhan nyatayang diriq tipaq Zakaria. Malaékat nike nganjeng léq sedi kanan méje taoq tunuq menyan.

¹²Sewaktu Zakaria serioq malaékat nike, ie bingung dait takut.

¹³Laguq malaékat nike bebase, “Ndaq takut, Zakaria! Allah sampun pireng do'ende. Elisabet, seninende gen bijeang sopoq kanak mame. Side harus aranin ie Yahya.

¹⁴Side gen bahagie dait cemoh gati, dait luwéq dengan gen besukecite lamun kanak nike tebijeang!

¹⁵ Ie gen jari dengan beléq léq arepan Tuhan, dait ie ndéq gen nginem anggur atao ineman keras. Ie gen tekuasein siq Roh Allah léman tepetianang siq inaqne.

¹⁶Luwéq dengan Israel gen ie bimbing tulak tipaq Allah, Tuhan ie pade.

¹⁷ Siq roh dait kuase Elia ie gen jari utusan Tuhan. Ie gen daméang dengan toaq kance bijene, dait dengan saq ndéq taat gen ie pimpin tulak ojok pikiran saq kenaq. Siq care nike ie nyiepang sopoq umat saq patut bagi Tuhan.”

¹⁸“Berembé tiang nenaoq bahwe hal nike gen telaksane?” Zakaria metakén léq malaékat nike. “Tiang sampun toaq dait senine tiang éndah sampun toaq.”

¹⁹ Jawab malaékat nike, “Tiang niki Jibril. Tiang ngelayanin Allah dait Ie saq ngutus tiang nyampéang kabar solah niki tipaq side.

²⁰Napi saq tiang sampéang gen telaksane léq waktune. Laguq lantaran side ndéq percaye, side ndéq tao ngeraos; side gen pakoq jangke napi saq tiang sampéang nike telaksane.”

²¹Léq waktu nike, dengan-dengan tetep ngantih Zakaria. Ie pade bengaq kembéq ie ngonéq gati léq dalem Gedéng Allah.

²²Dait léq waktu ie sugul, ie ndéq tao ngeraos kance ie pade. Ie tetep doang ngebéng isarat kadu imene, dait tetep pakoq. Make dengan-dengan éndah nenaoq bahwe Zakaria sampun serioq sopoq hal saq ajaip léq dalem Gedéng Allah.

²³Sesampun tutuq mase tugasne léq Gedéng Allah, Zakaria uléq ojok gedéngne.

²⁴Ndéq ngonéq sesampun nike, Elisabet seninene betian, terus ndéqne sugul-sugul léman lime bulan ngonéqne.

²⁵Elisabet bebase, “Ahirne Tuhan nulung tiang dait ngapus kehinean tiang léq julun dengan.”

²⁶Sewaktu Elisabet sampun betian enem bulan, Allah ngutus malaékat Jibril lumbar ojok Nazaret, sopoq kote léq daérah Galilea.

²⁷ Jibril teutus tipaq sopoq dedare genten, aranne Mariam. Mariam nike sampun betunangan kance sopoq dengan aranne Yusup, keturunan Raje Daud.

²⁸Malaékat nike rauh tipaq Mariam dait bebase, “Salam, side saq teican paice! Tuhan bareng kance side!”

²⁹Sewaktu dengah basen malaékat nike Mariam tinjot, sehingge beketuan-tuan dalem angenne napi arti salam nike.

³⁰Make malaékat nike bebase léq ie, “Ndaq takut Mariam! Séngaq side sampun mauq paice léman Allah.

³¹ Side gen betian dait bijeang sopoq kanak mame. Harus side aranin Isa.

³² Ie gen jari agung dait tesebut Bije saq asalne léman Allah Saq Maheagung. Allah, Tuhante gen jariang Ie raje maraq Raje Daud, leluhur-Ne.

³³Dait Ie gen mréntah jari raje léq keturunan Yakub selaéq-laéqne. Kerajaan-Ne ndéq gen tutuq.”

³⁴“Laguq tiang masih dedare genten,” basen Mariam tipaq malaékat nike, “berembé hal nike bau telaksane?”

³⁵Jawab malaékat nike, “Roh Suci gen rauh tipaq side, dait kuase Allah Saq Maheagung gen nguasein side. Keranaq nike bije saq gen tebijeang nike gen tesebut suci, Bije saq asalne léman Allah.

³⁶Setetune Elisabet, sanakde nike sampun betian enem bulan, timaq ie sampun lingsir dait dengan paran ie bangkol.

³⁷ Séngaq bagi Allah nénten araq saq mustahil.”

³⁸Beterus Mariam bebase, “Tiang niki pelayan Tuhan; menengang telaksane léq tiang maraq saq pelungguh sampéang.” Beterus malaékat nike lumbar bilin Mariam.

³⁹Pire waktu sesampun nike, Mariam lumbar ojok sopoq kote léq Yudea léq daérah pegunungan.

⁴⁰Ie lumbar ojok gedéng Zakaria, dait sewaktu ie tame, ie ngucapang salam tipaq Elisabet.

⁴¹Dait sewaktu Elisabet dengah salam Mariam, bebéaq saq léq dalem tianne nike berunjaq-runjaq. Make Elisabet tekuasein siq Roh Suci,

⁴²terus bebase siq suare saq beléq, “Side saq paling teberkahin léq antare selapuq dengan nine! Teberkahin bebéaq saq gen side bijeang nike!

⁴³Sai tiang niki sehingge mamiq bini Junjungan tiang Saq Mulie rauh tipaq tiang?

⁴⁴Sewaktu tiang dengah salamde, bebéaq dalem tian tiang berunjaq-runjaq saking cemohne.

⁴⁵Bahagie side, séngaq percaye bahwe napi saq temanikang siq Tuhan tipaq side gen telaksane!”

⁴⁶ Mariam bebase, “Atén tiang mulieang Tuhan,

⁴⁷dait jiwen tiang besukecite séngaq Allah, Juruselamet tiang.

⁴⁸ Ie iling léq tiang, hambe-Ne saq hine! Mulai mangkin selapuq bangse bebase tiang bahagie.

⁴⁹Séngaq Allah Saq Mahekuase ngelaksaneang hal-hal beléq léq tiang. Peséngan-Ne nike suci.

⁵⁰Keturunan demi keturunan Ie ngicanin rahmat tipaq dengan saq takut léq Ie.

⁵¹Siq gading-Ne saq perkase Ie miaq buyar dengan saq sombong, dait oreang rencane ie pade.

⁵² Raje-raje turunang-Ne léman tahte dait dengan hine teatasang kedudukanne.

⁵³Dengan lapah tepuasang siq selapuq kebajikan, dengan sugih tesediq nénten teicanin jauq napi-napi.

⁵⁴Ie nulung Israel, hambe-Ne, séngaq Ie iling léq rahmat-Ne,

⁵⁵ maraq saq Ie janjiqang tipaq leluhurte, tipaq Ibrahim dait keturunanne jangke selaéq-laéqne.”

⁵⁶Kire-kire telu bulan ngonéqne Mariam ndot bareng Elisabet, baruq ie uléq ojok gedéngne.

⁵⁷Sampun waktune Elisabet bebije. Ie bijeang sopoq kanak mame.

⁵⁸Tetangge-tetanggene dait kadang jarine dengah bahwe Tuhan sampun nyatayang rahmat-Ne saq beléq gati léq Elisabet, ie pade éndah milu besukecite bareng kance ie.

⁵⁹ Sewaktu bebéaq nike beumur baluq jelo, ie pade dateng jari sunat kanak nike. Ie pade mélé ngaranin bebéaq nike Zakaria, maraq aran bapaqne,

⁶⁰laguq Elisabet bebase, “Ndaq, ie harus tearanin Yahya!”

⁶¹“Ndéq sopoq dengan juaq léq antare keluargende bedowé aran maraq nike,” basen ie pade léq Elisabet.

⁶²Beterus kadu isarat ie pade beketuan léq Zakaria aran napi saq mélé ie béng tipaq bebéaq nike.

⁶³Zakaria tunas sopoq batu tulis, terus nulis, “Aranne Yahya.” Ie pade selapuq bengaq.

⁶⁴Waktu nike éndah Zakaria tao ngeraos malik beterus ie mulieang Allah.

⁶⁵Tetangge-tetanggene selapuq takut, dait kabar nike nyebar ojok selapuq wilayah pegunungan Yudea.

⁶⁶Selapuq dengan saq dengah berite nike beketuan léq dalem angenne, “Jari napi bebéaq nike éraq?” Séngaq Tuhan araq bareng kance ie.

⁶⁷Zakaria, bapaq bebéaq nike tekuasein siq Roh Suci, sehingge ie nyampéang pesen léman Tuhan. Ie bebase,

⁶⁸“Silaq ite memuji Allah, Tuhan bangse Israel, séngaq Ie sampun rauh tipaq umat-Ne dait bébasang ie pade.

⁶⁹Ie ngicanin ite penyelamet saq perkase, léman keturunan Daud, hambe-Ne.

⁷⁰Jaman laéq, langan nabi-nabi-Ne saq suci, Ie sampun ngicanin janji-Ne

⁷¹jari nyelametang ite léman musuhte, dait léman kuase dengan-dengan saq meriq léq ite.

⁷²Jari nyatayang rahmat-Ne tipaq leluhurte, janji-Ne saq suci nike gen Ie tepatin.

⁷³Ie besumpah tipaq Ibrahim, bapaq leluhurte, dait bejanji jari nyelametang ite léman musuhte, adéq ite ndéq takut ngelayanin Ie,

⁷⁴

⁷⁵tetep suci dait tejariang kenaq léq arepan-Ne seumur idupte.

⁷⁶ Side, anak tiang, gen tesebut nabi Allah Saq Maheagung, séngaq side teutus juluan léman Tuhan jari nyiepang Ie langan,

⁷⁷dait jari ngebéng pengertian tipaq umat-Ne mengenai keselametan saq tedasarang pengampunan dose-dose ie pade,

⁷⁸siq rahmat dait belas kasihan léman Allahte, Ie rauh jari nyelametang ite. Maraq jelo saq tiwoq léq kelémaq aru,

⁷⁹ maraq nike Ie ngicanin cahaye-Ne tipaq selapuq dengan saq idup léq dalem peteng dait ketakutan. Ie pimpin ite tipaq langan damé sejahtere.”

⁸⁰Bije Zakaria nike sayan beléq dait sayan kuat rohne. Ie ndot léq padang gurun, jangke dateng waktune ie harus nyatayang diriqne tipaq bangse Israel.