Read KITAB SUCI ZABUR INJIL LUKAS 11 Bible Online

LUKAS 11 - KITAB SUCI ZABUR INJIL bible

LUKAS 11

¹Léq sopoq jelo Deside Isa bedo'e léq sopoq taoq. Sesampun Ie inggas bedo'e, salaq sopoq léman pengiring-pengiring-Ne matur, “Junjungan Saq Mulie, tunas Pelungguh ajahang tiang pade bedo'e maraq Yahya ngajahang pengiring-pengiringne bedo'e.”

²Make Deside Isa bemanik léq ie pade, “Lamun side bedo'e, ucapang maraq niki, ‘Bapa, tesuciang peséngan Deside. Rauhang Kerajaan Deside.

³Icanin tiang pade sebilang jelo keloran saq tiang pade perluang,

⁴dait ampunin dose tiang pade, séngaq tiang pade éndah ngampunin dengan saq salaq tipaq tiang pade; dait sampunang gadingang tiang pade ojok dalem cobe.’ ”

⁵Beterus Deside Isa bemanik léq pengiring-pengiring-Ne, “Lamun araq sopoq dengan léq antare side pade lumbar ojok balén baturne léq tengaq kelem, dait bebase, ‘Semeton, béng tiang singgaq telu ruti,

⁶séngaq batur tiang saq kenyeke bekelampan, nyelaloq léq balén tiang dait tiang ndéq bedowé napi-napi jari béng ie ngelor.’

⁷Seandéne batur saq side datengin nike bejawab maraq niki, léman dalem baléne, ‘Ndaq nyusahang tiang! Lawang sampun telenting tiang kance anak-anak tiang sampun tindoq. Tiang ndéq bau kawe ngebéng side ruti.’

⁸Tiang badaq side, timaq side niki baturne, ie ndéq gen mélé ures dait ngebéng side napi-napi. Laguq lantaran ndéq araq ilaqde terus doang side ngéndéng léq ie, make ie gen ures éndah dait ngebéng side napi saq side perluang.

⁹Keranaq nike Tiang badaq side: Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang.

¹⁰Séngaq dengan saq nunas gen nerimaq; dengan saq boyaq gen mauq; dait dengan saq ketok lawang, gen tebukaqang lawang.

¹¹Léq antare side pade napi araq bapaq saq ngebéng ulah léq bijene, lamun ie ngéndéng empaq?

¹²Atao ngebéng teledu, lamun ie ngéndéng teloq?

¹³Jari, lamun side pade saq jahat, tao ngebéng saq bagus léq bije-bijende. Lebih-lebih Bapa side pade léq sorge! Ie lebihan malik gen ngicanin Roh Suci tipaq sebilang dengan saq nunas léq Ie!”

¹⁴Léq sopoq jelo, Deside Isa sediq sétan léman sopoq dengan pakoq. Sesampun sétan nike sugul, dengan nike mulai ngeraos. Luwéq dengan bengaq,

¹⁵ laguq araq saq bebase, “Ie sediq sétan siq kuase Beelzebul, datune sétan nike.”

¹⁶ Araq éndah dengan-dengan lain saq mélé boyaq kesalaqan Deside Isa, jari ie pade tunas Deside Isa piaq sopoq tande léman sorge.

¹⁷Laguq Deside Isa wikan maksut ie pade. Make Deside Isa bemanik léq ie pade, “Lamun sopoq negare léq dalemne araq golongan-golongan saq saling bemusuhan, pasti negare nike ndéq bau tahen ngonéq. Dait sebilang keluarge saq saling bemusuhan sopoq kance saq lain, pasti gen ancur.

¹⁸Maraq nike éndah léq dalem kerajaan Belis; lamun sopoq kelompoq besiaq kance kelompoq saq lain, kerajaan nike gen runtuh. Side pade bebase bahwe Tiang sediq sétan siq kuase Beelzebul.

¹⁹Lamun maraq nike, siq kuase sai pengiring-pengiringde sediq sétan nike? Pengiring-pengiring side mésaq saq buktiang bahwe side pade salaq!

²⁰Laguq Tiang sediq sétan siq kuase Allah, dait setetune Kerajaan Allah sampun rauh tipaq side pade.

²¹Lamun sopoq dengan saq kuat, jagaq baléne mésaq kadu gegaman saq lengkap, selapuq dowéne gen selamet.

²²Laguq lamun sopoq dengan saq kuatan nyerang dait ngalahang ie, make dengan saq kuatan nike gen ngerampas selapuq gegaman saq teandelang siq épén balé nike, terus bagi-bagiang selapuq barang-barangne.

²³ Dengan saq ndéq bepihak léq Tiang, setetune ie ngelawan Tiang. Dait dengan saq ndéq nulung Tiang setetune ie sédaq karye Tiang!”

²⁴“Lamun roh jahat sugul léman sopoq dengan, roh nike begelining ojok taoq-taoq saq gero jari boyaq taoqne mentelah, laguq ie ndéq mauq. Keranaq nike ie gen muni, ‘Tiang gen tulak ojok balé saq sampun tiang bilin!’

²⁵Waktu ie tulak ojok derike, daitne balé nike sampun bersi dait teratur.

²⁶Beterus ie lalo dait jauq pituq roh lain saq jahatan léman ie. Terus ie pade tame ojok dalem dengan nike dait ndot léq derike. Dait ahirne keadaan dengan nike jari lengéan léman saq mule.”

²⁷Sesampun Deside Isa bemanik maraq nike, sopoq dengan nine saq araq léq antare dengan luwéq nike matur léq Deside Isa, “Bahagie gati dengan nine saq bijeang dait penyusuq Pelungguh!”

²⁸Laguq jawab Deside Isa, “Bahagiean malik dengan saq dengahang dait ngelaksaneang Manik Allah!”

²⁹ Léq waktu dengan-dengan keriwung Deside Isa, Deside Isa bemanik malik, “Jahat gati dengan-dengan jaman niki. Ie pade tunas sopoq tande, laguq tipaq ie pade ndéq gen teican sopoq juaq tande, kecuali tande Nabi Yunus.

³⁰ Séngaq pade maraq Nabi Yunus jari tande dengan-dengan kote Niniwe, maraq nike éndah Bije Manusie gen jari tande léq dengan-dengan jaman niki.

³¹ Léq jelo Penghakiman, ratu léman negeri Lauq gen teidupang bareng kance dengan-dengan jaman niki, dait nuduh ie pade. Séngaq, jari dengahang pengajahan Nabi Sulaiman saq bijaksane, ratu nike dateng léman poton gumi. Laguq léq deriki mangkin araq saq beléqan léman Nabi Sulaiman!

³² Léq jelo Penghakiman, penduduk Niniwe gen teidupang bareng kance dengan-dengan jaman niki, dait penduduk Niniwe nike gen ngukum ie pade, séngaq dengan-dengan Niniwe nike betobat sesampun ie pade dengah Nabi Yunus hotbah. Laguq léq deriki mangkin araq saq beléqan léman Nabi Yunus!”

³³ “Ndéq araq dengan saq nyalaqang dilah terus ie seboq atao kudungne kadu tepaq. Ie gen noloq dilah nike léq naén dilah, adéq dengan saq tame bau serioq menahne.

³⁴Penentengde nike dilah léq awak. Lamun penentengde solah, selapuq awakde jari terang. Laguq lamun penentengde jahat, selapuq awakde jari peteng dedet.

³⁵Keranaq nike, onyaq-onyaq, ndaq jangke terang saq araq léq side nike jari peteng.

³⁶Lamun selapuq awakde menah, dait ndéq araq bagian saq peteng, make selapuq awakde nike gen menah maraq tesinarin cahaye dilah.”

³⁷Sesampun Deside Isa tutuq bebaos, sopoq dengan Parisi pesilaq Ie medaran léq baléne. Make Deside Isa lumbar medaran léq derike.

³⁸Dengan Parisi nike bengaq serioq Deside Isa medaran séngaq nénten bisoq gading-Ne juluq menurut aturan agame.

³⁹Keranaq nike Deside Isa, Junjungan Saq Mulie bemanik léq ie, “Mule side pade dengan-dengan Parisi biasene persiq jembung dait piring bagian luahne, laguq léq dalem diriqde mésaq penoq secare pakse dait serakah.

⁴⁰Side pade bodo! Tekan Allah saq jariang bagian luah nike, Ie éndah sampun jariang bagian dalemne?

⁴¹Saq araq léq dalem piring jembungde nike, nike saq harus side pade béng ojok dengan-dengan miskin. Siq care nike, selapuqne gen jari bersi umaq side.

⁴² Celake side pade, dengan-dengan Parisi! Hasil taletande maraq misal selasih dait inggu dait selapuq jenis sayuran, side pade aturin sepersepulune ojok Allah, laguq keadilan dait kasih tipaq Allah ndéq side pade perhatiang. Padahal nike saq seharusne side pade laksaneang dait ndaq lupaqang saq lain-lainne éndah.

⁴³Celake side pade, dengan-dengan Parisi! Side pade seneng melinggih léq kursi saq paling julu léq balé-balé ibadah, dait seneng tehormatin léq peken-peken.

⁴⁴Celake side pade! Side pade maraq kuburan saq ndéq ngadu tande, sehingge dengan lampaq léq atasne ndéq sadar bahwe ie pade lampaq léq atas kuburan.”

⁴⁵Salaq sopoq ahli Taurat matur léq Deside Isa, “Paq Guru, siq ucapan-ucapan nike, Pelungguh menghine tiang pade éndah!”

⁴⁶Jawab Deside Isa, “Celake side pade éndah, ahli-ahli Taurat! Side pade nuntut hal-hal saq sengke dait ngebéng aturan-aturan saq berat, laguq side pade sekediq juaq ndéq mélé nulung dengan ngelaksaneang hal nike.

⁴⁷Celake side pade! Side pade piaq makam nabi-nabi, saq malahan tematéq siq leluhur side mésaq.

⁴⁸Jari side pade mésaq ngakuq, bahwe side pade setuju napi saq sampun telaksaneang siq leluhurde; séngaq mule ie pade saq nyematéq nabi-nabi nike dait side pade saq piaq makamne.

⁴⁹Keranaq nike Allah bemanik secare bijaksane, ‘Tiang gen ngutus tipaq ie pade nabi-nabi dait utusan-utusan Tiang; separo gen tematéq, dait separo gen teaniaye!’

⁵⁰Allah ngelaksaneang hal nike adéq dengan-dengan jaman niki tehukum lantaran ie pade nyematéq selapuq nabi-nabi léman mulai dunie niki tecipteang,

⁵¹ mulai léman Habil tematéq jangke Zakaria tematéq, saq telaksane léq antare méje taoq kurban dait Gedéng Allah. Tiang badaq side: Dengan-dengan jaman niki pasti gen tehukum lantaran selapuqne nike.

⁵²Celake side pade, ahli-ahli Taurat! Kunci jari lekaq lawang penenaoq tesimpen léq side pade, laguq side pade ndéq mélé tame ojok dalem jari boyaq penenaoq nike. Sebalikne side pade halang-halangin dengan-dengan saq berusahe tame ojok dalemne!”

⁵³Sewaktu Deside Isa bilin taoq nike, ahli-ahli Taurat dait dengan-dengan Parisi sayan peringet Deside Isa secare keras. Ie pade mulai boyaq-boyaq hal léq Deside Isa adéq Ie kayun bebaos mengenai luwéq hal.

⁵⁴Dait léq waktu nike ie pade perhatiang Deside Isa pacu-pacu jari boyaq-boyaq kesalaqan saq teucapang siq Deside Isa, adéq Ie tebau.