Read KITAB SUCI ZABUR INJIL LUKAS 14 Bible Online

LUKAS 14 - KITAB SUCI ZABUR INJIL bible

LUKAS 14

¹Léq sopoq jelo, waktu nike jelo Sabat, Deside Isa lumbar medaran léq gedéng salaq sopoq pemimpin dengan Parisi. Léq derike dengan-dengan merhatiang Deside Isa secare teliti.

²Terus araq sopoq dengan mame saq sakit kembaq aiq saq naé dait imene baq parek ojok Deside Isa.

³Beterus Deside Isa beketuan léq ahli-ahli Taurat dait dengan-dengan Parisi saq araq léq derike, “Menurut Hukum Taurat, kanggo atao ndéq ite selahang dengan sakit léq jelo Sabat?”

⁴Ahli-ahli Taurat dait dengan-dengan Parisi nike meneng doang. Terus Deside Isa ngemanikang dengan nike dait nyelahang ie, beterus suruq ie lumbar.

⁵ Sesampun nike Deside Isa bemanik tipaq dengan-dengan, “Seandéne salaq sopoq léman side pade bedowé sopoq bije atao sopoq sampi saq geriq ojok dalem lingkoq léq jelo Sabat, napi ie ndéq gen nyerepek nyugulang bijene nike atao sampi nike léq jelo nike éndah?”

⁶Laguq ndéq sopoq dengan juaq bau jawab Deside Isa mengenai hal nike.

⁷Deside Isa cingakin araq temué-temué saq miléq taoq-taoq saq paling tehormat. Keranaq nike Deside Isa bemanik tipaq ie pade selapuq.

⁸ “Lamun side pade tepesilaq ojok gawé ngawinang, ndaq tokol léq kursi kehormatan. Séngaq ndaq-ndaq araq dengan lain saq pentingan léman side sampun tepesilaq éndah,

⁹sehingge épén balé saq sampun pesilaq side pade, gen dateng tipaq side dait bebase, ‘Maap, taoq niki sampun tesadangang jari temué niki.’ Make siq ilaq side terpakse tokol léq taoq saq paling mudi.

¹⁰Keranaq nike lamun side pade tepesilaq, piléq taoq saq paling mudi, sang épén balé gen dateng dait bebase léq side, ‘Batur, silaq tokol léq taoq saq solahan.’ Siq care nike side tehormatin léq julun selapuq temué saq lain.

¹¹ Séngaq dengan saq nyombongang diriqne gen terendahang, dait dengan saq ngerendahang diriqne gen tetinggiang.”

¹²Beterus Deside Isa bemanik léq épén balé, “Lamun side ngaraqang gawé léq kenjelo atao kekelem, ndaq pesilaq batur atao semeton, atao kadang jari, atao tetangge side saq sugih. Séngaq laun ie pade gen pesilaq side éndah, dait siq care nike side nerimaq balesan perbuatande.

¹³Jari, lamun side ngaraqang gawé, pesilaq dengan miskin, dengan cacat, dengan képaq dait dengan bute.

¹⁴Side gen bahagie, séngaq dengan-dengan nike ndéq gen mauq bales kesolahande. Kesolahande gen tebales siq Allah léq waktu dengan-dengan saq soléh teidupang malik léman ninggal.”

¹⁵Léq waktu salaq sopoq temué saq bareng-bareng medaran léq derike dengah manik Deside Isa, ie bebase, “Bahagie gati dengan saq gen tejamu dalem Kerajaan Allah!”

¹⁶Laguq Deside Isa bemanik tipaq dengan nike, “Léq sopoq waktu araq sopoq dengan ngaraqang gawé saq beléq dait pesilaq luwéq dengan.

¹⁷Sewaktu gawé nike gen temulai, dengan nike suruq pelayanne lumbar ojok dengan saq tepesilaq dait bebase, ‘Silaq dateng, selapuqne sampun tesiepang!’

¹⁸Laguq ie pade selapuq, sopoq-sopoq dengan mulai tunas maap. Saq penembéq bebase léq pelayan nike, ‘Tiang baruq gati beli lendang, dait tiang harus lalo periksaq ie. Tiang tunas maap.’

¹⁹Saq lain bebase, ‘Tiang baruq beli lime pasang sampi, dait tiang harus lalo periksaq sampi-sampi nike. Maapang tiang.’

²⁰Saq lain malik bebase, ‘Tiang baruq gati merariq, keranaq nike tiang ndéq bau dateng.’

²¹Pelayan nike uléq, dait nyampéang hal nike ojok majikanne. Majikan nike sili gati, dait bebase léq pelayanne, ‘Becat lalo ojok rurung-rurung dait pengorong-pengorong léq kote. Jauq ojok deriki dengan miskin, dengan cacat, dengan bute dait dengan képaq.’

²²Beterus pelayan nike bebase, ‘Paq, préntah pelungguh sampun tiang laksaneang, laguq masih luwéq taoq saq kosong.’

²³Beterus majikan nike bebase, ‘Lalo ojok rurung-rurung beléq dait pengorong-pengorong léq luah kote, dait paksaq dengan-dengan dateng, adéq balén tiang penoq.

²⁴Tiang badaq side, ndéq sopoq dengan juaq léq antare temué-temué saq sampun tepesilaq nike gen nikmatin keloran saq tesadangan léq gawe tiang niki!’ ”

²⁵Luwéq dengan milu ngiring Deside Isa. Deside Isa ngéngat andang ie pade dait bemanik,

²⁶ “Lamun dengan dateng tipaq Tiang, laguq lebih ngasihin inaqne, amaqne, seninene, anak-anakne, semeton-semetonne, malahan diriqne mésaq, ie ndéq bau jari pengiring Tiang.

²⁷ Dengan saq ndéq ngelémbah salibne, dait ngiring Tiang, ndéq bau jari pengiring Tiang.

²⁸Lamun salq sopoq léman side pade mélé penganjeng sopoq menare, pasti ie gen tokol rékéng juluq biayene adéq ie nenaoq napi képéngne cukup jari nyeleséang menare nike atao ndéq.

²⁹Séngaq lamun ternyate ie ndéq bau nyeleséang, padahal dasarne sampun tepiaq, make selapuq dengan saq serioq pegawéan nike gen ngeleléqang ie.

³⁰Ie pade gen bebase, ‘Dengan niki penganjeng sopoq menare, laguq ndéq bau nyeleséang!’

³¹Lamun sopoq raje saq bedowé sepulu iyu tentere mélé perang kance raje lain saq bedowé due pulu iyu tentere, pasti raje nike gen melinggih pertimbangang juluq napi ie sanggup ngelawan musuhne nike.

³²Lamun ie nenaoq bahwe ie ndéq kuat, pasti sewaktu musuhne nike masih jaoq, ie gen ngirim utusanne jari tunas bedamé.”

³³Ahirne Deside Isa bemanik, “Maraq nike éndah léq side pade. Ndéq sopoq dengan juaq léman side pade bau jari pengiring Tiang, lamun ie ndéq ngorbanang selapuq-lapuqne.”

³⁴“Sie nike solah, laguq lamun jari tawah, napi bau tepaéqang malik?

³⁵Ndéq araq manpaatne malik, timaq jari nyuburang tanaq atao jari raboq. Ie gen tetetéh siq dengan. Lamun bedowé kentok, dengahang!”