Read KITAB SUCI ZABUR INJIL LUKAS 15 Bible Online

LUKAS 15 - KITAB SUCI ZABUR INJIL bible

LUKAS 15

¹ Léq sopoq jelo, luwéq penagih pajek dait dengan-dengan saq bedose, dateng dengahang Deside Isa.

²Dengan-dengan Parisi dait ahli-ahli Taurat mulai ngerumun. Ie pade bebase, “Dengan niki nerimaq dengan-dengan saq bedose dait malahan bareng medaran kance ie pade!”

³Keranaq nike Deside Isa nyeriteang perumpamean niki léq ie pade,

⁴“Lamun salaq sopoq léman side pade bedowé satus dombe, terus ie kélangan sopoq -- napi saq gen ie piaq? Pasti ie gen bilin dombe saq siwaq pulu siwaq nike léq lendang pupaq, dait lumbar boyaq saq telang nike jangke kendaitan.

⁵Lamun ie ndait malik dombe nike, ie cemoh gati sehingge ponggoqne dombe nike,

⁶terus jauqne uléq. Beterus ie ngempoh batur-batur dait tetangge-tetanggene, dait bebase, ‘Silaq ite beseneng-seneng. Séngaq dombe tiang saq telang sampun tiang ndait malik!’

⁷Tiang badaq side, maraq nike éndah léq sorge gen araq sukecite saq beléqan lantaran sopoq dengan bedose saq betobat, ketimbang siwaq pulu siwaq dengan saq sampun keruan kenaq dait ndéq perlu betobat.”

⁸“Atao lamun sopoq dengan nine bedowé sepulu képéng perak, terus telang sopoq -- napi saq gen ie piaq? Ie gen penyalaq dilah dait sapu baléne terus boyaq léq mbé-mbé jangke ie ndait képéng nike.

⁹Sewaktu ie ndait képéng nike, ie ngempoh batur-batur dait tetangge-tetanggene, terus bebase, ‘Tiang seneng gati sampun ndait malik képéng tiang saq telang. Silaq ite beseneng-seneng!’

¹⁰Tiang badaq side, maraq nike éndah malaékat Allah gen gembire lamun araq sopoq dengan bedose betobat léman dose-dosene.”

¹¹Deside Isa bemanik malik, “Araq sopoq amaq saq bedowé due bije mame.

¹²Saq sengari bebase tipaq amaqne, ‘Amaq, béng tiang dowé saq jari bagian tiang.’ Make amaqne bagi kesugihanne nike tipaq kedue bijene.

¹³Pire jelo sesampun nike bijene saq sengari nike jual bagianne nike terus lumbar ojok negeri saq jaoq. Léq derike ie ambur-amburang képéngne siq idup loyar dait beseneng-seneng.

¹⁴Sewaktu selapuq képéngne bis, léq negeri nike araq musibah kelapahan saq beléq, sehingge ie mulai melarat.

¹⁵Terus ie lumbar begawéan léq salaq sopoq penduduk léq derike. Dengan nike suruq ie ojok lendang jagaq bawine.

¹⁶Saking lapahne ie melét ngisiq tianne siq kakenan bawi-bawi nike laguq ndéq araq sopoq dengan juaq saq ngebéng ie kakenan bawi nike.

¹⁷Ahirne ie sadar dait bebase, ‘Dengan-dengan saq begawéan léq amaq tiang belimpah-limpah keloranne, dait tiang léq deriki maté kelapahan!

¹⁸Tiang gen tulak ojok amaq tiang, dait bebadaq léq ie: Amaq, tiang sampun bedose tipaq Allah dait léq side.

¹⁹Ndéq patut malik tiang tesebut bijende. Anggep tiang niki salaq sopoq pesuruqde.’

²⁰Terus ie lalo uléq ojok amaqne. Masih jaoq léman balé, ie sampun teserioq siq amaqne. Amaqne jari periak léq ie dait pelai sambut ie, terus kapongne dait sidukne bijene nike.

²¹‘Amaq,’ basen bijene nike, ‘tiang sampun bedose tipaq Allah dait léq side. Tiang ndéq patut malik tesebut bijende.’

²²Laguq amaqne ngempoh pelayan-pelayanne, dait bebase, ‘Becat! Baitang kelambi saq paling solah, dait kaduang léq ie. Pasangang ali-ali léq ranggotne dait sepatu léq naéne.

²³Sesampun nike bait anak sampi saq mokoh dait sembeléh. Ite gen roah dait besukecite.

²⁴Séngaq bije tiang niki sampun milinang, mangkin idup malik; ie sampun telang laguq mangkin tedait malik.’ Terus ie pade mulai begawé.

²⁵Léq waktu nike, bijene saq sengake araq léq lendang. Sewaktu ie uléq dait sampun rapet baléne, ie dengah suare gending dait igel-igelan.

²⁶Ie ngempoh salaq sopoq pelayan-pelayanne, terus beketuan, ‘Araq napi niki léq balé?’

²⁷Jawab pelayan nike, ‘Adiqde sampun tulak! Dait amaqde sampun suruq dengan sembeléh anak sampi saq mokoh, séngaq bijene sampun tulak malik dalem keadaan selamet!’

²⁸Bije saq sengake nike gedek gati, jangke ie ndéq mélé tame balé. Beterus amaqne sugul dait ngodop ie adéqne tame.

²⁹Laguq ie bebase léq amaqne, ‘Betaun-taun ngonéqne tiang begawéan maté-matéan umaq side. Tiang ndéq uwah ngelawan préntahde. Dait napi saq side béng léq tiang? Timaq sopoq bémbéq ndéq uwah tiang terimaq léman side jari begawé kance batur-batur tiang!

³⁰Bijende nike sampun nyembih kesugihande kance pelacur-pelacur, laguq waktu ie tulak, side sembeléh anak sampi saq mokoh umaq ie!’

³¹‘Anak,’ jawab amaqne, ‘side tetep araq léq deriki bareng kance tiang. Selapuq saq tiang épéang éndah jari dowénde.

³²Laguq ite harus roah dait beseneng-seneng, séngaq adiqde nike sampun milinang, laguq mangkin idup malik; ie sampun telang, laguq mangkin sampun tedait malik.’ ”