Read KITAB SUCI ZABUR INJIL LUKAS 16 Bible Online

LUKAS 16 - KITAB SUCI ZABUR INJIL bible

LUKAS 16

¹Deside Isa bemanik léq pengiring-pengiring-Ne, “Araq sopoq dengan sugih bedowé sopoq bendahare jari ngurus selapuq kesugihanne. Dengan sugih nike dengah laporan bahwe bendaharene nike ngambur-amburang képéngne.

²Empohne bendahare nike dait bebase léq ie, ‘Napi niki laporan saq tiang dengah mengenai side? Mangkin, serahang léq tiang laporan saq lengkap mengenai tugasde ngurus kesugihan tiang. Side ndéq bau malik jari bendahare tiang.’

³Jari bendahare nike mikir, ‘Napi saq harus tiang piaq mangkin? Majikan tiang mélé pengkah tiang. Nambah tiang ndéq tao, jari tukang mekir, tiang ilaq.

⁴Tiang araq akal adéq lamun tiang tepengkah, araq dengan saq mélé nerimaq tiang léq baléne!’

⁵Terus bendahare nike ngempoh sebilang dengan saq berutang léq majikanne. Léq saq penembéq ie beketuan, ‘Pire utangde léq majikan tiang?’

⁶Jawab dengan nike, ‘Satus gentong minyak zaitun.’ Bendahare nike bebase, ‘Niki surat utangde. Silaq tokol terus becat tulis utangde séket gentong.’

⁷Beterus ie bebase léq dengan saq kedue, ‘Pire utangde?’ Jawab dengan nike, ‘Siyu karung gandum.’ Bendahare nike bebase léq ie, ‘Niki surat utangde, tulis baluq ratus.’

⁸Make majikan nike puji bendahare saq ndéq jujur nike, lantaran entane saq ceket nike; séngaq bije-bije dunie niki ceketan ngatur urusanne mésaq ketimbang bije-bije terang.

⁹Tiang badaq side: Manpaatang kesugihan dunie niki jari mauq sahabat, adéq lamun kesugihan dunie niki sampun ndéq bau nulung malik, side pade gen teterimaq léq balé saq kekel.

¹⁰Dengan saq bau tesaduq léq hal-hal saq kodéq, bau éndah tesaduq léq hal-hal saq beléq. Laguq dengan saq ndéq bau tesaduq léq hal saq kodéq, ndéq bau éndah tesaduq léq hal saq beléq.

¹¹Jari lamun dalem hal kesugihan dunie niki side sampun ndéq bau tesaduq malik, sai saq mélé percayeang tipaq side kesugihan saq sejati?

¹²Dait lamun side ndéq setie léq dowé dengan lain, sai saq gen mélé nyerahang léq side napi saq jari dowénde mésaq?

¹³ Ndéq araq dengan saq tao begawéan léq due majikan; séngaq lamun maraq nike ie gen meriq léq saq sopoq dait ngasihin saq lain, atao ie gen setie léq saq sopoq dait ndéq gen merhatiang saq lain. Maraq nike éndah halne side pade; side pade ndéq bau begawéan tipaq Allah dait tipaq dowé bande éndah.”

¹⁴Dengan-dengan Parisi dengahang selapuq saq temanikang siq Deside Isa. Terus ie pade ngeréréqang Deside Isa, séngaq ie pade demen képéng.

¹⁵Laguq Deside Isa bemanik léq ie pade, “Side pekenaq diriqde léq julun dengan lain, laguq Allah wikan angende. Séngaq napi saq teagung-agungang siq manusie, temeriq siq Allah.

¹⁶ Hukum Taurat dait kitab nabi-nabi, tetep tekadu jangke jaman Yahya. Léman waktu nike Kabar Solah mengenai Kerajaan Allah terus teberiteang. Dait luwéq dengan berebutan tame léq dalem Kerajaan Allah nike.

¹⁷ Laguq molahan gumi dait langit musnah ketimbang sopoq hurup dalem Hukum Taurat tebatalang.

¹⁸ Sai-sai saq séang seninene, terus merariq malik kance dengan nine lain, ie bezinah. Dait dengan saq merariq kance dengan saq teséang siq semamene nike, ie éndah bezinah.”

¹⁹“Araq dengan sugih. Kelambine mahel-mahel dait idupne méwah sebilang jelo.

²⁰Dait araq dengan miskin aranne Lazarus, awakne penoq siq koréng, tindoq léq dékét lawang balén dengan sugih nike.

²¹Lazarus melét ngisiq tianne siq napi juaq saq geriq léman méje dengan sugih nike. Malahan acong dateng délat koréngne.

²²Beterus dengan miskin nike ninggal terus jauqne siq malaékat ojok iwean Ibrahim. Dengan sugih nike éndah ninggal terus tekubur.

²³Léq alam maut ie menderite gati. Dait sewaktu ie nongaq, léman jaoq serioqne Ibrahim dait Lazarus araq léq iweanne.

²⁴‘Bapaq Ibrahim!’ basen dengan sugih nike. ‘Periakang tiang! Suruq Lazarus tamaq ranggotne ojok dalem aiq terus dateng basaqang élaq tiang. Tiang sengsare gati léq dalem api niki!’

²⁵Laguq jawab Ibrahim, ‘Inget anak tiang: Sengonéq side idup, side sampun mauq selapuq hal saq solah-solah, laguq Lazarus mauq saq lengé-lengé. Mangkin Lazarus seneng léq deriki, laguq side sengsare.

²⁶Selain nike, léq antare side kance tiang pade araq sopoq jurang saq dalem, adéq dengan léman deriki ndéq bau ojok derike dait dengan léq derike ndéq bau ojok deriki!’

²⁷Basen dengan sugih nike, ‘Lamun maraq nike, sanget siq tiang tunas adéq Pelungguh ngutus Lazarus ojok balé bapaq tiang.

²⁸Araq lime semeton tiang léq derike. Suruq Lazarus peringet ie pade, adéq ndaq jangke ie pade éndah tame ojok taoq siksaqan niki.’

²⁹Jawab Ibrahim, ‘Dengan-dengan nike sampun bedowé Kitab Suci saq tesampéang langan Musa dait kitab nabi-nabi saq lainne! Alurang ie pade taat léq napi saq tetulis léq dalem kitab-kitab nike!’

³⁰Laguq dengan sugih nike bejawab, ‘Nike ndéq cukup, Bapaq Ibrahim. Laguq lamun araq dengan ninggal idup malik dait dateng léq ie pade, pasti ie pade gen tobat léman dose-dosene.’

³¹Laguq jawab Ibrahim, ‘Lamun ie pade ndéq dengahang kesaksian Musa dait nabi-nabi, pasti ie pade éndah ndéq percaye, timaqne araq dengan ninggal idup malik.’ ”