Read KITAB SUCI ZABUR INJIL LUKAS 18 Bible Online

LUKAS 18 - KITAB SUCI ZABUR INJIL bible

LUKAS 18

¹Sesampun nike Deside Isa nyeriteang sopoq perumpamean jari ngajah pengiring-pengiring-Ne adéq ie pade tetep bedo'e dait ndaq nyerah.

²Deside Isa bemanik, “Léq sopoq kote araq sopoq hakim saq ndéq takut tipaq Allah, dait ndéq peduli léq sai-sai.

³Léq kote nike araq éndah sopoq bebalu saq rimpes gati ojok hakim nike tunas adéq pelekarene tebéle, ‘Silaq béle pelekara tiang ngelawan dengan saq nuduh tiang,’ basen bebalu nike.

⁴Bégaq ngonéqne hakim nike ndéq mélé tulung bebalu nike. Laguq ahirne hakim nike mikir, ‘Timaq tiang ndéq takut léq Allah dait ndéq peduli léq sai-sai,

⁵laguq lantaran bebalu niki terus doang ganggu tiang, bagusan tiang béle pelekarene. Lamun ndéq, ie gen terus-terusan dateng dait nyusahang tiang.’ ”

⁶Beterus Junjungan Saq Mulie Deside Isa bemanik, “Perhatiang napi saq teucapang siq hakim saq ndéq adil nike!

⁷Napi Allah nénten gen béle pelekare dengan-dengan piléqan-Ne saq kenjelo kekelem tunas léq Ie? Napi Allah gen ngulur-ngulur waktu jari nulung ie pade?

⁸Tiang badaq side: Allah gelis gen béle pelekare ie pade! Laguq lamun Bije Manusie rauh, napi léq gumi niki masih araq tedait dengan saq bedowé iman?”

⁹Deside Isa nyeriteang éndah perumpamean niki saq Ie tujuang tipaq dengan saq girang ngeréméhang dengan lain, laguq yakin bahwe diriqne mésaq saq paling kenaq.

¹⁰Manik Deside Isa, “Araq due dengan lumbar bedo'e ojok Gedéng Allah. Saq sopoq dengan Parisi, saq lainne penagih pajek.

¹¹Dengan Parisi nike nganjeng mésaq-mésaq dait bedo'e, ‘Ya Allah, tiang besyukur léq Deside, séngaq tiang ndéq maraq dengan lain, saq serakah, ndéq adil, atao bezinah. Tiang besyukur séngaq tiang ndéq maraq penagih pajek nike.

¹²Tiang puase due kali seminggu, dait tiang ngaturang sepersepulu léman selapuq pengasilan tiang.’

¹³Laguq penagih pajek nike nganjeng jaoq-jaoq dait malahan ndéq bani nongaq andang langit. Sambilne empuk dadene, ie matur, ‘Ya Allah periakang tiang dengan bedose niki!’ ”

¹⁴ “Tiang badaq side, waktune uléq ojok balé, penagih pajek nike saq tejariang kenaq siq Allah, dait ndéqne dengan Parisi nike. Séngaq dengan saq nyombongang diriqne gen terendahang, dait dengan saq ngerendahang diriqne gen tetinggiang.”

¹⁵Araq dengan-dengan jauq kanak-kanak kodéq ojok Deside Isa adéq ie pade tejamah dait teicanin berkah siq Deside Isa. Sewaktu pengiring-pengiring Deside Isa serioq nike, ie pade siliq dengan-dengan nike.

¹⁶Laguq Deside Isa ngemanikang kanak-kanak nike dait bemanik léq pengiring-pengiring-Ne, “Alurang kanak-kanak nike dateng ojok Tiang! Ndaq balaq ie pade, séngaq dengan maraq niki saq dowéang Kerajaan Allah.

¹⁷Tiang badaq side: Setetune dengan saq ndéq nerimaq Kerajaan Allah maraq sopoq kanak, ie ndéq gen bau tame léq dalemne.”

¹⁸Araq sopoq pemimpin Yahudi metakén léq Deside Isa, “Paq Guru saq solah, napi saq harus tiang piaq adéq tiang bau nerimaq idup sejati dait kekel?”

¹⁹Jawab Deside Isa, “Kembéq side paran Tiang solah? Ndéq araq saq solah kecuali Allah.

²⁰ Side sampun nenaoq préntah-préntah Allah: ‘Ndaq bezinah, ndaq nyematéq, ndaq memaling, ndaq jari saksi duste, dait pade hormatin amaq dait inaqde.’ ”

²¹“Selapuq préntah nike sampun tiang turut léman masih bajang,” atur dengan nike.

²²Sesampun Deside sa pireng dengan nike bebase maraq nike, Ie bemanik léq dengan nike, “Masih araq sopoq hal saq harus side laksaneang: Jual selapuq dowénde, béng képéngne tipaq dengan-dengan miskin, dait side gen mauq harte léq sorge. Sesampun nike dateng turut Tiang.”

²³Laguq sewaktu dengan nike dengah hal nike, ie jari sedih séngaq ie sugih gati.

²⁴Deside Isa wikan dengan nike sedih angenne, keranaq nike Ie bemanik, “Sengke gati dengan sugih tame ojok dalem Kerajaan Allah!

²⁵Molahan sopoq onte tame loang jarum, ketimbang sopoq dengan sugih tame ojok dalem Kerajaan Allah.”

²⁶Dengan-dengan saq dengah Deside Isa bemanik maraq nike metakén, “Lamun maraq nike, sai saq bau selamet?”

²⁷Jawab Deside Isa, “Napi saq ndéq mungkin bagi manusie, jari mungkin bagi Allah!”

²⁸Terus Petrus matur, “Tiang pade sampun bilin selapuq saq tiang pade épéang jari ngiring Pelungguh.”

²⁹Jawab Deside Isa, “Tiang badaq side, setetune sebilang dengan saq sampun bilin baléne, atao seninene, atao semetonne, atao inaq amaqne atao anak-anakne lantaran Kerajaan Allah,

³⁰dengan nike gen tebales belipet-lipet léq waktu niki, dait léq jaman saq gen dateng, ie gen nerimaq idup sejati dait kekel.”

³¹Deside Isa ngumpulang kedue olas pengiring-Ne secare husus, terus bemanik, “Silaq mangkin ite lumbar ojok Yerusalem. Léq derike, selapuq saq tetulis siq nabi-nabi mengenai Bije Manusie gen telaksane.

³²Ie gen teserahang tipaq bangse-bangse saq ndéq kenal kance Allah, saq gen ngoloq-oloq, menghine, dait nijuh Ie.

³³Ie pade gen siksaq dait nyematéq Ie, laguq léq jelo ketelu, Ie gen idup malik.”

³⁴Pengiring-pengiring Deside Isa nénten paham napi saq teucapang siq Deside Isa nike. Arti ucapan-ucapan-Ne nike terahasieang léman ie pade. Ndéqne pade taoq napi maksut Deside Isa.

³⁵Sewaktu Deside Isa sampun rapet kote Yeriko, araq sopoq dengan bute kenyeke tokol nunas-nunas léq sedin rurung.

³⁶Sewaktu ie dengah dengan luwéq nike liwat, ie beketuan, “Araq napi?”

³⁷“Deside Isa dengan Nazaret nike, liwat,” basen ie pade léq ie.

³⁸Make dengan bute nike bekuih, “Deside Isa, keturunan Daud! Periakang tiang!”

³⁹Ie tesiliq siq dengan-dengan saq léq julu, dait suruq ie tedoq. Laguq sayan keras ie bekuih, “Bije Daud! Periakang tiang!”

⁴⁰Deside Isa mentelah, terus ngemanikang dengan jauq dengan bute nike tipaq Ie. Sesampun ie dateng, Deside Isa beketuan,

⁴¹“Napi saq side melétang adéq Tiang piaq léq side?” “Junjungan Saq Mulie,” jawab dengan bute nike, “tiang melét tao nyerioq.”

⁴²Terus Deside Isa bemanik, “Cobaq nyerioq! Imande sampun miaq side selah.”

⁴³Waktu nike éndah ie tao nyerioq, terus ie ngiring Deside Isa sambil ngucap syukur tipaq Allah. Dengan luwéq saq serioq hal nike éndah mulieang Allah.