Read KITAB SUCI ZABUR INJIL LUKAS 2 Bible Online

LUKAS 2 - KITAB SUCI ZABUR INJIL bible

LUKAS 2

¹Léq waktu nike Kaisar Agustus mréntahang selapuq warge negare Kerajaan Roma daptarang diriqne jari tesensus.

²Niki sénsus saq penembéq telaksaneang sewaktu Kirenius jari gubernur negeri Siria.

³Keranaq nike selapuq dengan lumbar daptarang diriqne léq kotene mésaq.

⁴Yusup éndah berangkat léman Nazaret léq Galilea, ojok Betlehem léq Yudea, taoq Raje Daud tebijeang; séngaq Yusup keturunan Daud.

⁵Yusup daptarang diriqne kance Mariam tunanganne, saq kenyeke betian.

⁶Waktu ie pade léq Betlehem sampun wayene Mariam gen bebije.

⁷Ie bijeang sopoq kanak mame, bijene saq sengake. Kanak nike bungkusne kadu kain lampin, terus toloqne léq dalem palung berisi jami; séngaq ie pade ndéq mauq taoq mererepan.

⁸Léq kelem nike araq pengarat-pengarat saq kenyeke jagaq dombe-dombene léq lendang pupaq léq daérah nike.

⁹Selung-selung nganjeng malaékat Tuhan léq dékét ie pade, dait kemuliean Tuhan besinar menahin ie pade, dait ie pade takut gati.

¹⁰Laguq malaékat nike bebase, “Ndaq takut! Séngaq tiang dateng jauq kabar solah tipaq side pade -- berite saq nyenengang gati tipaq selapuq dengan.

¹¹Jelo niki léq kote Daud sampun tebijeang Juruselamet, Almasih, Junjungan Saq Mulie.

¹²Niki tandene: Side pade gen ndait sopoq bebéaq tebungkus kadu kain lampin, dait tetindoqang léq dalem palung.”

¹³Selung-selung malaékat nike teiring siq luwéq malaékat lain saq memuji Allah. Ie pade bebase,

¹⁴“Kemuliean tipaq Allah léq taoq saq maheagung! Dait damé sejahtere léq gumi tipaq manusie saq nyenengang Allah!”

¹⁵Sesampun malaékat-malaékat nike bilin ie pade dait tulak ojok sorge, pengarat-pengarat nike bebase sopoq kance saq lainne, “Silaq ite ojok Betlehem dait serioq peristiwe saq telaksane nike, saq temanikang siq Tuhan tipaq ite.”

¹⁶Ie pade becat-becat lumbar, beterus daitne Mariam kance Yusup, dait bebéaq nike kenyeke tetindoqang léq dalem palung.

¹⁷Waktu pengarat-pengarat serioq bebéaq nike, ie pade nuturang napi saq tesampéang siq pare malaékat mengenai bebéaq nike.

¹⁸Dait selapuq dengan bengaq dengah cerite pengarat-pengarat nike.

¹⁹Laguq Mariam seboq selapuq hal nike léq dalem angenne dait tetep mikirang hal nike.

²⁰Pengarat-pengarat nike tulak sambil memuji dait mulieang Allah, séngaq selapuq saq sampun ie pade dengah dait serioq, pade maraq saq sampun tesampéang siq malaékat tipaq ie pade.

²¹ Sesampun beumur baluq jelo, bebéaq nike tesunat. Dait ie pade ngaranin Ie Isa, maraq saq tesampéang siq malaékat tipaq ie pade, sendéqman Ie tepetianang siq mamiq bini-Ne.

²² Tipaq wayene Mariam dait Yusup ngelaksaneang adat penyucian menurut Hukum Taurat Musa. Jari ie pade jauq Kanak nike ojok Yerusalem jari teserahang tipaq Tuhan.

²³ Séngaq léq dalem Hukum Tuhan tetulis maraq niki, “Sebilang kanak mame saq sengake, harus tesuciang bagi Tuhan.”

²⁴Ie pade éndah beniat ngaturang kurban sepacek kedit petuq atao due anak kedit dare, maraq saq tetentuang léq dalem Hukum Tuhan.

²⁵Waktu nike léq Yerusalem araq sopoq dengan aranne Simeon. Ie dengan soléh dait taat léq Allah serte kenyeke ngantih penghiburan tipaq Israel. Roh Suci araq bareng kance ie,

²⁶dait Roh Suci sampun nyampéang léq ie bahwe ie ndéq gen ninggal sendéqman serioq Almasih saq tejanjiqang siq Tuhan.

²⁷Siq bimbingan Roh Suci, Simeon tame ojok Gedéng Allah. Léq waktu nike Yusup dait Mariam jauq tame Deside Isa, saq masih kodéq nike jari ngelaksaneang upacare saq tepréntahang siq Hukum Taurat.

²⁸Make Simeon bait Kanak nike dait umbaq Ie, terus Simeon memuji Allah,

²⁹“Mangkin Tuhan, menengang hambe Deside niki lumbar léq dalem damé sejahtere, sesuai manik Deside,

³⁰séngaq siq penenteng tiang mésaq sampun tiang serioq keselametan saq léman Deside,

³¹nike keselametan saq sampun Deside siepang umaq selapuq bangse,

³² nike terang saq nyatayang pekayunan Deside umaq bangse-bangse lain, dait jari kemuliean bagi umat Deside, Israel.”

³³Yusup dait Mariam jari bengaq dengah napi saq teucapang siq Simeon mengenai Bije ie pade.

³⁴Simeon ngucapang berkah léq ie pade, dait bebase léq Mariam, mamiq bini Kanak nike, “Kanak niki sampun tetentuang siq Allah jari binaseang atao jari nyelametang luwéq dengan Israel. Ie éndah gen jari tande saq nimbulang pertentangan,

³⁵sehingge pikiran dait angen luwéq dengan jari nyate. Kesedihan gen nusuk aténde maraq kléwang saq merang.”

³⁶Araq éndah sopoq nabi nine saq sampun lingsir gati, aranne Hana, bije Panuel léman suku Asyer. Sesampun pituq taun merariq,

³⁷Hana jari bebalu, dait mangkin umurne baluq pulu empat taun. Sengonéq nike ie ndéq uwah bilin Gedéng Allah. Kenjelo-kekelem ie beribadah tipaq Allah léq derike dait bedo'e kance puase.

³⁸Tepat waktu nike éndah ie dateng ojok derike, terus ngucapang syukur tipaq Tuhan dait bebaos mengenai Kanak nike tipaq selapuq dengan saq ngantih waktu pembébasan Yerusalem.

³⁹ Sesampun Yusup dait Mariam ngelaksaneang selapuq saq tewajibang Hukum Tuhan, ie pade uléq ojok Nazaret léq Galilea.

⁴⁰Kanak nike sayan beléq dait kuat. Ie bijaksane gati dait rahmat Allah araq léq Ie.

⁴¹ Sebilang taun mamiq bini dait mamiq laki Deside Isa lumbar ojok Yerusalem jari ngerayeang Jelo Paskah.

⁴²Dait sewaktu Deside Isa beumur due olas taun, ie pade lumbar ojok perayaan nike maraq biasene.

⁴³Sesampun perayaan nike inggas ie pade uléq, laguq Deside Isa, Bijene nike, masih ndot léq Yerusalem, ndéq tetaoq siq mamiq bini dait mamiq laki-Ne.

⁴⁴Ie pade paran Deside Isa lumbar turut rombongan. Sesampun lampaq sejeloan, baruq ie pade boyaq Deside Isa léq antare selapuq keluarge dait selapuq saq ie pade kenal.

⁴⁵Laguq ie pade ndéq ndait Ie, jari ie pade tulak ojok Yerusalem boyaq Deside Isa.

⁴⁶Sesampun telu jelo boyaq Deside Isa, daitne Deside Isa araq léq Gedéng Allah kenyeke melinggih pirengang guru-guru agame dait metakén mengenai luwéq hal léq ie pade.

⁴⁷Selapuq dengan saq dengahang Ie bengaq lantaran pengertian saq araq léq Ie dait jawaban-jawaban saq Ie sampéang.

⁴⁸Mamiq bini dait mamiq laki-Ne éndah bengaq serioq Ie. Mamiq bini-Ne bebase léq Ie, “Nune, kembéq maraq niki entan-De léq tiang pade? Bapaq-De dait tiang kuatir boyaq Side!”

⁴⁹Jawab Deside Isa, “Kembéq side pade boyaq Tiang? Napi side pade ndéq nenaoq Tiang harus araq léq dalem gedéng Bapa Tiang?”

⁵⁰Laguq ie pade ndéq ngerti jawaban Deside Isa.

⁵¹Beterus Deside Isa mantuk bareng ie pade ojok Nazaret, dait Deside Isa taat léq ie pade. Selapuq hal nike seboqne léq dalem angenne siq Mariam.

⁵² Deside Isa jari sayan beléq dait sayan bijaksane, serte sayan tekasihin siq Allah dait manusie.