Read KITAB SUCI ZABUR INJIL LUKAS 20 Bible Online

LUKAS 20 - KITAB SUCI ZABUR INJIL bible

LUKAS 20

¹Léq sopoq jelo, Deside Isa kenyeke ngajahang dait nyampéang Kabar Solah léman Allah tipaq dengan-dengan saq araq léq dalem Gedéng Allah. Imam-imam kepale, ahli-ahli Taurat dait pemimpin-pemimpin Yahudi parek

²dait metakén léq Deside Isa, “Tunas Pelungguh sampéang léq tiang pade atas dasar napi Pelungguh ngelaksaneang selapuq hal niki? Sai saq aturin Pelungguh kuase nike?”

³Jawab Deside Isa, “Tiang éndah mélé beketuan. Tunas side pade badaq Tiang,

⁴Yahya baptis dengan siq kuase sai? Kuase Allah atao kuase manusie?”

⁵Beterus ie pade mulai berunding, dait bebase, “Lamun ite jawab siq kuase Allah, Ie gen bemanik, ‘Kembéq side pade ndéq percaye léq Yahya?’

⁶Laguq lamun ite jawab, ‘Siq kuase manusie,’ selapuq dengan gen meléwas ite siq batu, séngaq ie pade percaye bahwe Yahya nike nabi.”

⁷Jari jawab ie pade, “Mindah tiang.”

⁸Terus Deside Isa bemanik léq ie pade, “Lamun maraq nike Tiang éndah ndéq gen badaq side pade siq kuase sai Tiang laksaneang selapuqne niki.”

⁹ Deside Isa nyeriteang perumpamean niki léq dengan-dengan nike, “Araq sopoq dengan saq nalet anggur léq kebonne. Séweangne kebon anggur nike ojok penyakap-penyakap, terus ie lumbar ojok negeri lain, dait ndot ngonéq léq derike.

¹⁰Sewaktu dateng musim buaq anggur, épén dowé kebon nike ngutus pelayanne ojok penyakap-penyakapne nike jari nerimaq bagianne. Laguq penyakap-penyakap nike ngempuk pelayan nike dait suruqne ie pade uléq ndéq jauq napi-napi.

¹¹Sesampun nike épén dowé kebon nike ngutus malik pelayanne saq lain; laguq pelayan nike éndah tempuk dait tehine terus suruqne uléq ndéq jauq napi-napi.

¹²Terus épén dowé kebon nike ngutus malik pelayan saq ketelu. Laguq pelayan nike éndah tempuk dait tetetéh ojok luah kebon anggur nike.

¹³Ahirne épén dowé kebon nike bebase, ‘Napi saq harus tiang piaq malik? Tiang gen ngutus anak tiang mésaq saq tiang tunah gati, pasti ie pade gen hormatin anak tiang!’

¹⁴Laguq sewaktu penyakap-penyakap kebon nike serioq bije épén dowé kebon nike, ie pade berunding, ‘Niki ie ahli warisne, silaq ite matéq ie, adéq ite mauq warisanne.’

¹⁵Make orosne ie sugul ojok luah kebon nike terus ie tematéq.” Beterus Deside Isa beketuan, “Lamun épén dowé kebon nike tulak, napi saq gen ie piaq tipaq penyakap-penyakap nike?

¹⁶Pasti ie gen dateng dait nyematéq penyakap-penyakap nike, beterus nyerahang kebon nike ojok penyakap-penyakap saq lain.” Dengah hal nike, ie pade matur léq Deside Isa, “Sampunang gati jangke maraq nike!”

¹⁷ Deside Isa merhatiang ie pade, terus bemanik, “Lamun maraq nike napi artine ayat Kitab Suci niki? ‘Batu saq tetetéh siq tukang bangunan, sampun jari batu saq paling utame.’

¹⁸Sai-sai saq geriq léq batu nike gen ancur, dait sai-sai saq tendet siq batu nike, ie gen remuk.”

¹⁹Ahli-ahli Taurat dait imam-imam kepale nenaoq bahwe perumpamean nike tetujuang tipaq ie pade siq Deside Isa. Keranaq nike ie pade mélé bau Deside Isa waktu nike éndah, laguq ie pade takut léq dengan luwéq.

²⁰Jari ie pade boyaq kesempatan saq solah. Ie pade upaq dengan adéqne puraq-puraq jari dengan jujur, dait suruqne dengan-dengan nike boyaq-boyaq kesalaqan Deside Isa siq care besoal jawab, adéq ie pade bau serahang Deside Isa ojok gubernur.

²¹Beterus dengan-dengan saq teupaq nike matur léq Deside Isa, “Paq Guru, tiang pade nenaoq bahwe selapuq saq Pelungguh manikang dait ajahang nike kenaq. Tiang pade nenaoq éndah bahwe Pelungguh ngajahang secare terus-terang mengenai langan saq kenaq tipaq Allah, séngaq Pelungguh nénten piléq kasih.

²²Keranaq nike, tunas Pelungguh sampéang léq tiang pade, menurut aturan agamente, kanggo napi nénten bayah pajek léq Kaisar?”

²³Laguq Deside Isa wikan tipu muslihat ie pade. Keranaq nike Ie bemanik,

²⁴“Cobaq petitoqang léq Tiang sopoq képéng perak. Gambar dait aran sai niki?” “Kaisar!” jawab ie pade.

²⁵Make Deside Isa bemanik tipaq ie pade, “Lamun maraq nike, serahang ojok Kaisar, napi saq jari dowén kaisar, dait tipaq Allah napi saq jari dowén Allah.”

²⁶Ternyate léq julun dengan luwéq nike ie pade ndéq iniq mauq sopoq juaq kesalaqan Deside Isa. Ie pade cume tedoq dait bengaq siq manik Deside Isa nike.

²⁷ Dengan-dengan léman golongan Saduki parek ojok Deside Isa. (Ie pade golongan saq bedowé pendapet bahwe dengan ninggal ndéq gen idup malik). Ie pade metakén léq Deside Isa,

²⁸ “Bapaq Guru, Musa nulis hukum niki tipaq ite: Lamun sopoq dengan mame ninggal dait ie ndéq bedowé bije, make semetonne harus merariq kance bebalune adéq ie bau ngebéng keturunan tipaq dengan saq sampun ninggal nike.

²⁹Araq pituq dengan besemetonan. Saq sengake merariq, terus ninggal ndéq bedowé bije.

³⁰Beterus saq kedue merariq kance bebalune, laguq ie éndah ninggal ndéq bedowé bije.

³¹Maraq nike éndah telaksane léq semetonne saq ketelu dait seterusne jangke saq kepituq.

³²Ahirne dengan nine nike éndah ninggal.

³³Léq jelo dengan ninggal teidupang malik, sai semame dengan nine nike? Séngaq kepituq-pituqne sampun merariq kance ie.”

³⁴Jawab Deside Isa, “Dengan-dengan saq idup mangkin niki merariq,

³⁵laguq dengan-dengan saq patut teidupang malik léman ninggal dait idup léq akhirat, ie pade merariq malik.

³⁶Keadaan ie pade maraq malaékat, dait ndéq iniq ninggal. Ie pade nike bije-bije dowén Allah, séngaq ie pade sampun teidupang malik léman ninggalne.

³⁷ Musa mésaq secare jelas nyatayang bahwe dengan ninggal gen teidupang malik. Dalem tulisanne mengenai bebenes saq nyale, ie sebut Tuhan nike ‘Allahne Ibrahim, Allahne Ishak dait Allahne Yakub’.

³⁸Allah nike nénten Allah dengan ninggal, laguq Allah dengan saq idup! Séngaq léq arepan Allah, selapuq dengan idup.”

³⁹Ahli-ahli Taurat matur, “Jawaban Paq Guru solah gati.”

⁴⁰Keranaq nike ie pade ndéq bani malik metakén napi-napi léq Deside Isa.

⁴¹Deside Isa beketuan léq ie pade, “Berembé dengan-dengan iniq paran bahwe Almasih nike keturunan Daud?

⁴² Padahal Daud mésaq bebase léq dalem kitab Zabur, ‘Tuhan bemanik léq Junjungan Tiang: Melinggih léq sedi kanan Tiang,

⁴³jangke Tiang piaq musuh-musuh Deside takluk léq Deside.’

⁴⁴Jari, lamun Daud nyebut Almasih nike ‘Junjungan Saq Mulie’, segerah Ie keturunan Daud?”

⁴⁵Sewaktu dengan luwéq kenyeke dengahang Deside Isa bebaos, Ie bemanik léq pengiring-pengiring-Ne,

⁴⁶ “Onyaq-onyaq léq ahli-ahli Taurat. Ie pade seneng lampaq-lampaq kadu jubah saq bélo, dait seneng tehormatin léq peken-peken. Ie pade seneng melinggih léq kursi saq paling julu léq balé-balé ibadah dait seneng melinggih léq taoq saq paling tehormat léq taoq-taoq gawé.

⁴⁷Ie pade nipu bebalu-bebalu dait ngerampas baléne. Dait jari seboq kejahatanne nike, ie pade bedo'e bélo-bélo! Pasti ie pade gen nerimaq hukuman saq beratan!”