Read KITAB SUCI ZABUR INJIL LUKAS 22 Bible Online

LUKAS 22 - KITAB SUCI ZABUR INJIL bible

LUKAS 22

¹ Perayaan Ruti Ndéq Beragi saq tesebut Paskah sampun rapet.

²Imam-imam kepale dait ahli-ahli Taurat kenyeke boyaq langan jari nyematéq Deside Isa secare tedoq-tedoq, séngaq ie pade takut léq dengan luwéq.

³Beterus Belis tamein Yudas saq tesebut éndah Iskariot, salaq sopoq léman kedue olas pengiring Deside Isa.

⁴Beterus Yudas lumbar dait berunding kance imam-imam kepale dait kepale-kepale pengawal Gedéng Allah mengenai berembé entane adéqne bau nyerahang Deside Isa tipaq ie pade.

⁵Ie pade seneng gati dait bejanji gen ngebéng képéng tipaq Yudas.

⁶Yudas éndah setuju, dait mulai boyaq kesempatan jari nyerahang Deside Isa tipaq ie pade ndéq tetaoq siq dengan luwéq.

⁷Jelo Perayaan Ruti Ndéq Beragi sampun dateng. Nike jelone dombe jari keloran Paskah tesembeléh.

⁸Make Deside Isa ngemanikang Petrus dait Yahya, “Lumbar sedieang ite keloran Paskah.”

⁹Ie pade metakén, “Léq mbé taoq saq Pelungguh kayunang adéq tiang pade siepang?”

¹⁰Jawab Deside Isa, “Léq waktu side pade tame ojok kote, side pade gen bedait kance sopoq dengan mame saq kenyeke jauq cérét berisi aiq. Turut ie ojok balé saq ie tamein,

¹¹dait badaq épén balé nike: Guru bemanik, ‘Léq mbé taoq Tiang kance pengiring-pengiring Tiang ngelorang keloran Paskah?’

¹²Dengan nike gen petitoq side sopoq kamar beléq saq araq léq atas lengkap kance perabotanne. Sidieang selapuqne léq derike.”

¹³Make Petrus dait Yahya lumbar, terus daitne selapuqne tepat maraq saq sampun temanikang siq Deside Isa. Ie pade sedieang keloran Paskah nike.

¹⁴Sewaktu sampun wayene ngelorang keloran Paskah nike, Deside Isa melinggih teiring pengiring-pengiring-Ne léq taoq perjamuan.

¹⁵Terus Ie bemanik léq ie pade, “Tiang melét gati ngelor keloran Paskah niki bareng kance side pade, sendéqman Tiang menderite!

¹⁶Tiang badaq side: Tiang ndéq gen ngelorang niki malik jangke arti perjamuan niki tenyatayang dalem Kerajaan Allah.”

¹⁷Sesampun nike, Deside Isa ngangkat cawan saq berisi anggur nike, terus ngucapang do'e syukur tipaq Allah, beterus bemanik, “Silaq bait niki, dait bagi-bagiang;

¹⁸Tiang badaq side: Mulai mangkin niki Tiang ndéq gen nginem anggur niki malik jangke Kerajaan Allah rauh.”

¹⁹Sesampun nike, Deside Isa bait ruti. Dait sesampun ngucapang do'e syukur, Ie peleng-peleng ruti nike kadu gading-Ne, terus ngicanin tipaq ie pade, dait bemanik, “Niki ragen Tiang saq teserahang umaq side pade. Laksaneang niki jari nginget Tiang.”

²⁰ Maraq nike éndah sesampun medaran, Ie ngicanin cawan saq berisi anggur tipaq ie pade dait bemanik, “Cawan niki perjanjian baru siq daraq Tiang, daraq saq tetumpahang tipaq side pade.”

²¹ “Laguq serioq! Dengan saq behianat léq Tiang araq léq deriki bareng Tiang!

²²Bije Manusie mule gen ninggal maraq saq sampun tetentuang Allah; laguq celake dengan saq behianat léq Ie!”

²³Make ie pade mulai saling ketuan sopoq kance saq lain, sai léq antare ie pade saq gen ngelaksaneang hal nike.

²⁴ Léq antare pengiring-pengiring Deside Isa araq pegejuhan mengenai sai saq harus teanggep paling beléq léq antare ie pade.

²⁵ Deside Isa bemanik léq ie pade, “Raje-raje bangse-bangse saq ndéq kenal kance Allah perlakuang rakyatne semélé-mélé dait penguase-penguasene tesebut ‘Pelindung Rakyat’.

²⁶ Laguq side pade ndéq kanggo maraq nike. Sebalikne, dengan saq paling beléq léq antare side harus jari maraq saq paling kodéq, dait pemimpin-pemimpin harus jari maraq pelayan.

²⁷ Sai saq beléqan: Dengan saq tokol bekelor léq méje, atao dengan saq ngelayanin ie? Pasti dengan saq tokol nike. Laguq Tiang araq léq antare side pade jari pelayan.

²⁸Side pade tetep bareng-bareng kance Tiang léq dalem selapuq cobe saq Tiang alamin.

²⁹Tiang nentuang hak-hak Kerajaan tipaq side, pade maraq Bapa Tiang nentuang hak-hak Kerajaan tipaq Tiang,

³⁰ adéq éraq side bekelor dait nginem seméje kance Tiang léq dalem Kerajaan Tiang dait side gen tokol léq atas tahte jari hakimin kedue olas suku Israel.”

³¹“Simon, Simon, dengahang! Belis sampun tebéng ijin jari nguji side pade; maraq gandum tekelin léman léndongne sehingge saq solah tekelin léman saq lengé.

³²Laguq Tiang sampun do'eang side, Simon, adéq imande ndéq luntur. Dait lamun side sampun tulak tipaq Tiang, side harus teguqang iman semeton-semetonde.”

³³Jawab Petrus, “Junjungan Saq Mulie, tiang réde tame bui dait maté bareng-bareng kance Pelungguh!”

³⁴Laguq Deside Isa bemanik, “Tiang badaq side, Petrus, sendéqman manuk ngungkung jelo niki, side telu kali nilas Tiang.”

³⁵ Sesampun nike Deside Isa bemanik tipaq ie pade, “Laéq sewaktu Tiang ngutus side pade dait ndéq ngijinang side pade jauq dompét, kantong atao sepatu, napi side pade kekurangan?” “Nénten!” jawab ie pade.

³⁶Terus Deside Isa bemanik léq ie pade, “Laguq mangkin, sai bedowé dompét atao kantong, harus tejauq; dait sai ndéq bedowé kléwang, harus jual jubahne jari beli kléwang.

³⁷ Tiang badaq side, bahwe ayat Kitab Suci saq tetulis maraq niki, ‘Ie tame itungan léq antare dengan-dengan jahat,’ harus telaksane léq diriq Tiang. Séngaq napi saq tetulis léq dalem Kitab Suci mengenai Tiang kenyeke telaksane mangkin niki.”

³⁸Pengiring-pengiring Deside Isa matur, “Junjungan Saq Mulie silaq cingakin, léq deriki araq due kléwang.” “Nike sampun cukup!” jawab Deside Isa.

³⁹Deside Isa bilin kote dait maraq biasene lumbar ojok Bukit Zaitun, dait pengiring-pengiring-Ne lumbar éndah ngiring Ie.

⁴⁰Sewaktu rauh léq derike, Ie bemanik léq ie pade, “Pade bedo'e adéq side pade ndéq ngalamin cobe.”

⁴¹Beterus Deside Isa lumbar jaoqan sekediq léman ie pade, kire-kire sejaoq peléwasan batu, terus sujut dait bedo'e,

⁴²“Bapa, lamun bau, jaoqang léman Tiang cawan penderitean saq harus Tiang alamin niki. Laguq sampunang menurut keméléq Tiang, laguq menurut pekayunan Deside mésaq.” [

⁴³Sopoq malaékat rauh tipaq Deside Isa jari ngicanin Ie kekuatan.

⁴⁴Deside Isa menderite gati secare batin sehingge Ie sayan pacu-pacu bedo'e. Daur-Ne maraq ruen daraq ngitik ojok tanaq.]

⁴⁵Sesampun tutuq bedo'e, Deside Isa tulak malik ojok pengiring-pengiring-Ne. Dait-Ne pengiring-pengiring-Ne kenyeke tindoq séngaq sedih gati.

⁴⁶Terus Ie bemanik léq ie pade, “Kembéq side pade tindoq? Pade ures dait bedo'e adéq side pade ndéq ngalamin cobe.”

⁴⁷Léq waktu Deside Isa masih bebaos, dateng serombongan dengan. Ie pade tepimpin siq Yudas, salaq sopoq pengiring Deside Isa. Beterus Yudas ngerapetin Deside Isa jari siduk Ie.

⁴⁸Laguq Deside Isa bemanik léq ie, “Yudas, napi siq sidukan nike side mélé behianat léq Bije Manusie?”

⁴⁹Sewaktu pengiring-pengiring Deside Isa saq araq léq derike serioq napi saq gen telaksane, ie pade matur, “Junjungan Saq Mulie, tiang pade serang doang ie pade kadu kléwang!”

⁵⁰Terus salaq sopoq dengan léman ie pade ngerantek pelayan Imam Agung kadu kléwang jangke pegat kentokne saq kanan.

⁵¹Laguq Deside Isa bemanik, “Engkahang!” Terus Ie jamah kentok dengan nike dait nyelahang ie.

⁵²Beterus Deside Isa bemanik léq imam-imam kepale dait kepale-kepale pengawal Gedéng Allah, serte pemimpin-pemimpin Yahudi saq dateng ojok derike jari bau Ie, “Napi Tiang niki perampok, jangke side pade dateng jauq kléwang dait gegitik jari bau Tiang?

⁵³ Sebilang jelo Tiang araq bareng side pade léq Gedéng Allah, side pade ndéq bau Tiang. Laguq niki waktune side pade ngelaksaneang, léq waktu penguase saq nguasein peteng negel kekuasean.”

⁵⁴Ie pade bau Deside Isa dait jauqne ojok gedéng Imam Agung. Petrus turut mudi léman jaoq.

⁵⁵Léq tengaq-tengaq leléah gedéng nike, dengan sampun penyalaq api dait ie pade tokol keliningin api nike. Petrus éndah tokol léq antare ie pade.

⁵⁶Salaq sopoq pelayan nine serioq Petrus tokol léq dékét api nike; ie perhatiang Petrus, beterus bebase, “Onéq dengan niki éndah araq bareng-bareng Deside Isa!”

⁵⁷Laguq Petrus nilas. Ie bebase, “Tiang tetu-tetu ndéq kenal dengan nike!”

⁵⁸Ndéq ngonéq sesampun nike, araq dengan lain serioq Petrus dait bebase, “Side éndah salaq sopoq léman ie pade!” Laguq Petrus bejawab, “Ndéq, ndéqne tiang!”

⁵⁹Kire-kire sejam sesampun nike, araq dengan lain malik saq teges entane ngeraos, “Mule dengan niki pengiring Deside Isa, séngaq ie éndah dengan Galilea!”

⁶⁰Laguq Petrus bejawab, “Tiang ndéq nenaoq, napi maksut side!” Waktu nike éndah, sewaktu Petrus masih ngeraos, manuk ngungkung.

⁶¹Deside Isa ngéngat andang Petrus. Beterus Petrus inget Junjungan Saq Mulie sampun bemanik léq ie, “Sendéqman manuk ngungkung jelo niki, side telu kali nilas Tiang.”

⁶²Terus Petrus sugul léman derike dait nangis éroq aséq.

⁶³Dengan-dengan saq kenyeke jagaq Deside Isa, pade ngoloq dait ngempuk Ie.

⁶⁴Ie pade tungkem penjarupan-Ne dait beketuan léq Ie, “Cobaq badéq sai saq ngempuk Side?”

⁶⁵Luwéq éndah raos ie pade jari menghine Deside Isa.

⁶⁶Kelémaqne, pemimpin-pemimpin Yahudi, imam-imam kepale, dait ahli-ahli Taurat bekumpul, terus Deside Isa tejauq ojok arepan Mahkamah Agame ie pade.

⁶⁷Ie pade bebase léq Deside Isa, “Badaq tiang pade, napi Side niki Almasih?” Jawab Deside Isa, “Lamun Tiang badaq side, side pade tetep ndéq gen percaye.

⁶⁸Dait lamun Tiang beketuan léq side, side pade tetep ndéq gen bejawab.

⁶⁹Laguq mulai mangkin, Bije Manusie gen melinggih léq sedi kanan Allah Saq Mahekuase.”

⁷⁰Ie pade selapuq bebase, “Lamun maraq nike, Side niki Bije saq asalne léman Allah?” Jawab Deside Isa, “Maraq nike basen side pade.”

⁷¹Make ie pade bebase, “Ndéq perlu malik saksi! Ite sampun dengah léman cangkem-Ne mésaq!”