Read KITAB SUCI ZABUR INJIL LUKAS 23 Bible Online

LUKAS 23 - KITAB SUCI ZABUR INJIL bible

LUKAS 23

¹Selapuq dengan saq araq léq sidang nike nganjeng, terus Deside Isa tejauq ngadep Pilatus.

²Léq derike ie pade mulai tuduh Deside Isa, basen ie pade, “Tiang pade ndait Dengan niki nyesatang rakyat. Ie balaq dengan bayah pajek léq Kaisar, séngaq Ie badaqang diriqne Almasih, sopoq Raje.”

³Terus Pilatus metakén léq Deside Isa, “Napi tetu Pelungguh raje dengan Yahudi?” Jawab Deside Isa, “Maraq nike basen Pelungguh.”

⁴Make Pilatus bebase léq imam-imam kepale dait dengan luwéq nike, “Tiang ndéq ndait sopoq juaq kesalaqan léq Dengan niki.”

⁵Laguq ie pade sayan maksaq dait bebase, “Siq pengajahan-Ne Ie hasut dengan léq selapuq Yudea; penembéqne léq Galilea dait mangkin sampun dateng deriki.”

⁶Sewaktu Pilatus pirengang hal nike, ie beketuan, “Napi Dengan niki dengan Galilea?”

⁷Dait sewaktu ie nenaoq bahwe Deside Isa asalne léman daérah kekuasean Herodes, Pilatus préntah dengan adéqne jauq Deside Isa ojok Herodes, saq waktu nike araq éndah léq Yerusalem.

⁸Herodes seneng gati waktu nyereminang Deside Isa, séngaq sampun ngonéq gati ie pireng mengenai Deside Isa, dait melét sereminang Deside Isa. Herodes beharep mauq nyaksiang Deside Isa piaq muqjizat.

⁹Keranaq nike Herodes beketuan luwéq hal léq Deside Isa, laguq Deside Isa nénten bejawab napi-napi.

¹⁰Imam-imam kepale dait ahli-ahli Taurat nganjeng dait nyampéang tuduhan-tuduhan saq berat tipaq Deside Isa.

¹¹Make Herodes dait prajurit-prajuritne ngoloq-oloq dait menghine Deside Isa, terus kaduangne jubah kehormatan, dait jauq Ie tulak ojok Pilatus.

¹²Léq jelo nike éndah Herodes dait Pilatus, saq sendéqmanne bemusuhan jari besahabat.

¹³Pilatus ngumpulang imam-imam kepale, pemimpin-pemimpin dait rakyat,

¹⁴dait bebase léq ie pade, “Side pade jauq dengan niki ojok tiang dait paran Ie nyesatang dengan-dengan lain. Mangkin léq julu side pade sampun tiang periksaq Ie, dait selapuq kesalaqan saq side pade tuduhang tipaq Ie ndéq araq saq tiang ndait léq Ie.

¹⁵Maraq nike éndah pendapet Herodes, séngaq ie éndah sampun suruq dengan jauq Deside Isa nike tulak ojok tiang pade. Ndéq araq sopoq juaq kesalaqan-Ne saq miaq Ie patut tehukum maté.

¹⁶Keranaq nike, tiang gen pecut Ie dait bébasang Ie.” [

¹⁷Sebilang perayaan Paskah, Pilatus bébasang sopoq tahenan tipaq rakyat.]

¹⁸Selapuq dengan saq bekumpul léq derike nyurak, “Matéq Ie! Bébasang Barabas tipaq tiang pade!” (

¹⁹Barabas tebui lantaran miaq keributan léq dalem kote dait nyematéq dengan.)

²⁰Pilatus kayun bébasang Deside Isa, keranaq nike ie bebase karing sekali tipaq dengan luwéq nike.

²¹Laguq ie pade nyurak, “Pakuq Ie léq kayuq salib! Pakuq Ie léq kayuq salib!”

²²Terus saq ketelu kaline Pilatus bebase léq ie pade, “Laguq pegawéan jahat napi saq sampun Ie piaq? Tiang ndéq ndait sopoq kesalaqan léq Ie saq miaq Ie patut tehukum maté. Tiang gen pecut Ie, terus gen tiang bébasang Ie!”

²³Laguq ie pade tetep nyurak sekuat-kuatne bahwe Deside Isa harus tepakuq léq kayuq salib. Dait ahirne surakan ie pade menang.

²⁴Beterus Pilatus mutusang adéq tuntutan ie pade tekabulang,

²⁵dait bébasangne dengan saq tebui lantaran pemberontakan dait nyematéq dengan pade maraq saq tetuntut siq ie pade. Terus Deside Isa teserahang tipaq ie pade jari teperlakuang semélé ie pade.

²⁶Beterus Deside Isa tejauq siq ie pade. Léq tengaq kelampanne, ie pade bedait kance sopoq dengan aranne Simon, saq asalne léman Kirene, saq kenyeke tame kote. Ie pade paksaq Simon ngelémbah kayuq salib nike dait lampaq léq mudi Deside Isa.

²⁷Luwéq dengan ngiring Deside Isa; léq antarene araq éndah dengan-dengan nine. Dengan-dengan nine nike ngerung dait tangisin Deside Isa.

²⁸Laguq Deside Isa ngéngat andang ie pade dait bemanik, “Hai, putri-putri Yerusalem! Ndaq tangisin Tiang. Laguq tangisin diriqde mésaq dait bije-bijende.

²⁹Séngaq gen dateng waktune dengan gen bebase, ‘Aget gati dengan-dengan nine saq ndéq uwah betian, saq ndéq uwah bedowé bije dait ndéq uwah penyusuq bebéaq!’

³⁰ Léq waktu nike éndah dengan gen bebase tipaq gunung-gunung, ‘Silaq ndet tiang pade!’ Dait tipaq bukit-bukit, ‘Silaq tumput tiang pade!’

³¹Séngaq lamun léq kayuq saq masih idup, dengan sampun piaq maraq niki, lebih-lebih saq gen ie pade piaq léq kayuq saq gero!”

³²Araq éndah due dengan lain -- deduaqne dengan jahat -- saq ie pade jauq jari tehukum maté bareng kance Deside Isa.

³³Ssesampun dateng léq taoq saq tearanin, “Jerangkong”, ie pade pakuq Deside Isa léq kayuq salib bareng-bareng kance due dengan jahat nike -- sopoq léq sedi kanan dait sopoqne malik léq sedi kiri-Ne.

³⁴ Beterus Deside Isa bedo'e, “Bapa, ampunin ie pade! Séngaq ie pade ndéq ngerti napi saq ie pade piaq.” Ie pade bagi kuace Deside Isa kadu undian.

³⁵ Dengan luwéq nganjeng léq derike sambil manto, léq waktu nike éndah pemimpin-pemimpin Yahudi ngoloq-oloq Deside Isa, dait bebase, “Ie sampun selametang dengan lain; dait mangkin alurang Ie selametang diriq-Ne mésaq. Tekan Ie Almasih, saq tepiléq siq Allah?”

³⁶ Prajurit-prajurit éndah ngoloq Deside Isa. Ie pade dateng dait ngebéng Deside Isa aiq anggur saq pedis

³⁷dait bebase, “Lamun Side raje dengan Yahudi, selametang diriq-De.”

³⁸Léq bagian atas kayuq salib Deside Isa, tetoloq tulisan: “Niki Raje Dengan Yahudi.”

³⁹Salaq sopoq penjahat saq bareng tepakuq léq kayuq salib menghine Deside Isa. Ie bebase, “Tekan Side Almasih? Nah, selametang diriq-De dait tiang pade!”

⁴⁰Laguq penjahat saq sopoqne malik peringet baturne nike, “Napi side ndéq takut léq Allah séngaq side éndah tehukum maté pade maraq Ie.

⁴¹Hukumante kance due mule setimpal kance perbuatante, laguq Ie niki, ndéq araq perbuatan-Ne saq salaq!”

⁴²Terus ie bebase, “Deside Isa, iling léq tiang lamun Pelungguh rauh jari Raje!”

⁴³Manik Deside Isa, “Tiang badaq side, setetune jelo niki éndah side gen bareng kance Tiang léq Pirdaus.”

⁴⁴Kire-kire jam due olas tengari, ndéq araq sinar jelo, dait selapuq negeri nike jari peteng gati jangke jam telu kebian.

⁴⁵ Kelambu saq araq léq dalem Gedéng Allah, soék jari due.

⁴⁶ Beterus Deside Isa bekuih keras-keras, “Bapa! Léq gading Deside Tiang serahang nyawe Tiang!” Sesampun bemanik maraq nike, Ie nyerahang nyawe-Ne.

⁴⁷Waktu kepale pasukan serioq hal nike, ie mulieang Allah. Terus ie bebase, “Setetune Deside Isa ndéq salaq!”

⁴⁸Dengan luwéq saq dateng manto léq derike, serioq selapuq saq telaksane. Beterus selapuqne pade uléq dait nyesel gati angenne.

⁴⁹ Dait selapuq kenalan Deside Isa lantong dengan-dengan nine saq ngiring Ie léman Galilea, nganjeng léman jaoq dait serioq selapuqne nike.

⁵⁰Araq sopoq dengan aranne Yusup, asalne léman kote Arimatea léq negeri Yudea. Yusup niki dengan soléh saq tehormatin siq dengan, dait saq kenyeke ngantos Kerajaan Allah. Timaq ie anggote Mahkamah Agame, ie ndéq setuju siq keputusan dait tindakan mahkamah nike.

⁵¹

⁵²Yusup niki lumbar ngadep Pilatus dait tunas adéq jenazah Deside Isa teserahang léq ie.

⁵³Terus ie turunang jenazah Deside Isa léman kayuq salib, dait bungkusne kadu kain lénen alus saq putéq. Sesampun nike, toloqne jenazah Deside Isa léq makam saq tepiaq léq dalem bukit batu -- makam nike ndéq uwah tekadu.

⁵⁴Jelo nike jelo persiepan; séngaq jelo Sabat gen mulai.

⁵⁵Dengan-dengan nine saq ngiring Deside Isa léman Galilea turut Yusup dait serioq makam nike. Ie pade serioq éndah berembé entan jenazah Deside Isa tetoloq léq dalem makam.

⁵⁶ Terus ie pade uléq dait siepang ramuan-ramuan dait minyak sengéh jari minyakin jenazah Deside Isa. Léq jelo Sabat, ie pade mentelah begawéan jari taat léq Hukum Taurat.